ជាតិ
សេដ្ឋកិច្ច
លោក គិត ម៉េង ស្នើឱ្យអាជ្ញាធររាជធានីភ្នំពេញ លុបបំបាត់ការយកតម្លៃសេវាកម្មក្រៅផ្លូវការ 20, Sep 2015 , 4:44 pm
![](https://image.thmeythmey.com/pictures/2015/09/20/thumb2/kit-meng.jpg)
×![]()
សភាពាណិជ្ជកម្មកម្ពុជា បានស្នើឱ្យអាជ្ញាធររាជធានីភ្នំពេញ ចូលរួមលុបបំបាត់ការយកកម្រៃសេវាក្រៅផ្លូវការ ដើម្បីបង្កើនប្រសិទ្ធភាពនៃការវិនិយោគនៅកម្ពុជា ឱ្យកាន់តែប្រសើរឡើង។
លោក គិត ម៉េង ប្រធានសភាពាណិជ្ជកម្មកម្ពុជា បានស្នើសុំឱ្យអាជ្ញាធររាជធានីភ្នំពេញជួយអន្តរាគមន៍ ឱ្យថ្នាក់ដឹកនាំតាមខណ្ឌទាំងអស់ ក្នុងរាជធានីភ្នំពេញ ត្រូវបំពេញសេវាសាធារណៈឱ្យបានល្អ និងលុបបំបាត់ការយកលុយក្រោមតុ ឬតម្លៃសេវាក្រៅផ្លូវការ ជាដើម។
ប្រធានសភាពាណិជ្ជកម្មរូបនេះ បានបន្ថែមទៀតថា រាល់សេវាសាធារណៈផ្សេងៗ អាជ្ញាធរគួរកំណត់ពេលវេលា និងតម្លៃឱ្យបានច្បាស់លាស់ ហើយធ្វើការងារដោយទទួលខុសត្រូវ ជៀសវាងការបំពេញការងារទៅតាមអារម្មណ៍ដែលនាំឱ្យរាំងស្ទះដល់ការបំពេញ ឯកសារ ឬកិច្ចការវិនិយោគ ជាដើម។
ការលើកសំណូមពររបស់លោក គិត ម៉េង ខាងលើនេះ បានធ្វើឡើងនៅចំពោះមុខ លោក ប៉ា សុជាតិវង្ស អភិបាលរាជធានីភ្នំពេញ ក្នុងកិច្ចប្រជុំលើកទី១ រវាង សាលារាជធានីភ្នំពេញ និងអាជ្ញាធរទាំង១២ខណ្ឌ រួមទាំងផ្នែកឯកជនផ្សេងទៀត ដែលប្រព្រឹត្តនៅសភាពាណិជ្ជកម្មកម្ពុជា កាលពីថ្ងៃទី១៧ ខែកញ្ញា ឆ្នាំ២០១។
ទាក់ទងនឹងការលើកឡើងនេះ លោក ប៉ា សុជាតិវង្ស បានឆ្លើយតបថា រាល់តម្លៃសេវាសាធារណៈផ្សេងៗ ត្រូវបានអនុវត្តតាមគោលការណ៍កំណត់របស់រាជរដ្ឋាភិបាល ដែលមានបិទផ្សាយតាមការិយាល័យច្រកចេញចូលតែមួយ នៅគ្រប់ខណ្ឌទាំងអស់។
លើសពីនេះទៅទៀត លោក អភិបាលរាជធានីភ្នំពេញរូបនេះ ក៏បានព្រមានអាជ្ញាធរថ្នាក់ខណ្ឌ និងថ្នាក់សង្កាត់ទាំងអស់ ថាត្រូវតែប្តូរគោលជំហរពីអ្នកដឹកនាំទៅជាអ្នកយកចិត្តទុកដាក់ផ្តល់ សេវាសាធារណៈជូនប្រជាពលរដ្ឋឱ្យកាន់តែប្រសើរ និងមានប្រសិទ្ធភាពខ្ពស់ ដើម្បីឱ្យប្រជាពលរដ្ឋ មានទំនុកចិត្តមកលើរដ្ឋបាលសាធារណៈ។
សូមបញ្ជាក់ផងដែរថា ក្រោយបញ្ចប់កិច្ចប្រជុំ លោក ប៉ា សុជាតិវង្ស អភិបាលរាជធានីភ្នំពេញ និងលោក គិត ម៉េង ប្រធានសភាពាណិជ្ជកម្មកម្ពុជា បានឯកភាពគ្នាបង្កើតក្រុមការងារចម្រុះមួយ ដែលមានសមាសភាពមកពីភាគីទាំង២ ដើម្បីដោះស្រាយរាល់បញ្ហា ទាក់ទងនឹងមុខជំនួញទាំងអស់នៅក្នុងខណ្ឌទាំង១២ ដើម្បីធានា ឲ្យបាននូវប្រសិទ្ធភាពនៃការវិនិយោគនៅរាជធានីភ្នំពេញ ឱ្យកាន់តែប្រសើរឡើង៕
ប្រភព៖ AKP
© រក្សាសិទ្ធិដោយ thmeythmey.com