ជាតិ
អ្នករាយការណ៍ថ្មីរបស់ UNសន្យាថា ប្រមូលភស្តុតាងឲ្យបានច្បាស់មុននឹងសន្និដ្ឋាន 21, Sep 2015 , 7:59 pm
![](https://image.thmeythmey.com/pictures/2015/09/21/thumb2/2192015172148un_special_reportor.jpg)
×![]()
អ្នករាយការណ៍ពិសេសរបស់អង្គការសហប្រជាជាតិ (UN) លោកស្រី រ៉ូណា ស្ម៊ីត សន្យាថានឹងខិតខំប្រឹងប្រែងបំពេញតួនាទីរបស់ខ្លួន ក្នុងការជួយលើកកម្ពស់សិទ្ធមនុស្សនៅកម្ពុជា ដោយមិនឲ្យមានការប៉ះពាល់ដល់អធិបតេយ្យភាព និងបូរណភាពទឹកដីរបស់កម្ពុជាឡើយ។លោកស្រី រ៉ូណា ស្ម៊ីត ជួបជាមួយ លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី ២១ ខែកញ្ញានេះ នាវិមានសន្តិភាព ដើម្បីពិភាក្សាគ្នាអំពីតួនាទីរបស់ខ្លួនក្នុងអាណត្តិដែលត្រូវបំពេញក្នុងប្រទេសកម្ពុជា។
បើតាមលោក អ៊ាង សុផល្លែត ជំនួយការផ្ទាល់លោកនាយករដ្ឋមន្ត្រីហ៊ុន សែន លោកស្រី រ៉ូណា ស្ម៊ីត អះអាងថា ខ្លួននឹងធ្វើការជាមួយស្ថាប័ន និងបុគ្គលពាក់ព័ន្ធនានា ដើម្បីប្រមូលព័ត៌មាននិងភស្តុតាងឲ្យបានគ្រប់ជ្រុងជ្រោយ មុននឹងសន្និដ្ឋាននៅក្នុងរបាយការណ៍ខ្លួនឲ្យមានភាពត្រឹមត្រូវ ស្របតាមច្បាប់អ្នកធ្វើរបាយការណ៍ ដោយមិនធ្វើឲ្យប៉ះពាល់ដល់អធិបតេយ្យភាព និងបូរណភាពទឹកដីនៃប្រទេសណាមួយឡើយ។
ជាការឆ្លើយតបប្រមុខរដ្ឋាភិបាល បញ្ជាក់ថា បញ្ហាសិទ្ធិមនុស្សជាបញ្ហាកញ្ចប់មួយ ដែលតម្រូវឲ្យធ្វើការរួមគ្នា ដើម្បីលើកស្ទួយសិទ្ធមនុស្សនៅកម្ពុជា។ នេះបើតាមលោក អ៊ាង សុផល្លែត។
លោកស្រី រ៉ូណា ស្ម៊ីត ត្រូវបានតែងតាំងដោយក្រុមប្រឹក្សាសិទ្ធិមនុស្ស UN ក្នុងខែមីនា ឆ្នាំ២០១៥ ស្នងតំណែងរបស់លោក សុរិយា ប្រាសាទ ស៊ូប៊ែឌី ដែលបានបញ្ចប់អាណត្តិ ៦ឆ្នាំ នៅខែមីនា ឆ្នាំ២០១៥ ដើម្បីធ្វើសេចក្តីរាយការណ៍ និងផ្តល់ប្រឹក្សាយោបល់ស្តីពី ស្ថានភាពសិទ្ធិមនុស្សនៅកម្ពុជា។
គួររម្លឹកដែរថា អតីតអ្នករាយការណ៍ពិសេសរបស់អង្គការសហប្រជាជាតិប្រចាំកម្ពុជាលោក សុរិយា ប្រាសាទ ស៊ូប៊ែឌី តែងតែប៉ះសម្ដីគ្នាជាមួយរដ្ឋាភិបាលលោក ហ៊ុន សែន ដោយរាល់សេចក្តីរាយការណ៍ និងការផ្តល់ប្រឹក្សាយោបល់ស្តីពី ស្ថានភាពសិទ្ធិមនុស្សនៅកម្ពុជានោះ ត្រូវបានរដ្ឋាភិបាលបដិសេធច្រានចោលជានិច្ច៕
© រក្សាសិទ្ធិដោយ thmeythmey.com