ជាតិ
សង្គមជាតិ
មន្ត្រីជំនាញកម្ពុជានឹងទៅសម្ភាសព័ត៌មានជនភៀសខ្លួនកោះណូរូនៅដើមខែក្រោយ 22, Sep 2015 , 10:30 am
![](https://image.thmeythmey.com/pictures/2015/09/22/thumb2/22920151031571692015950061092015105901nehru_cambodia.jpg)
×![]()
កម្ពុជានឹងបញ្ជូនមន្ត្រីជំនាញទៅត្រួតពិនិត្យ និងសម្ភាសព័ត៌មានពីជនភៀសខ្លួនកោះណូរូ ដែលគ្រោងចង់មកតាំងទីរស់នៅក្នុងប្រទេសកម្ពុជា នៅដើមខែតុលាក្រោយនេះ។
ថ្លែងប្រាប់សារព័ត៌មានថ្មីៗ លោក ខៀវ សុភ័គ អ្នកនាំពាក្យក្រសួងមហាផ្ទៃ បានឲ្យដឹងថា មន្ត្រីជំនាញកម្ពុជាទទួលបន្ទុកជនភៀសខ្លួន នឹងទៅត្រួតពិនិត្យសម្ភាសជនភៀសខ្លួនកោះណូរូ នៅសប្ដាហ៍ទី១ ខែតុលា ដើម្បីយកពួកគេមកតាំងទីរស់នៅកម្ពុជា តាមគោលការណ៍ស្ម័គ្រចិត្ត។ គម្រោងទៅត្រួតពិនិត្យជនភៀសខ្លួននេះ ដោយសារតែមានជនភៀសខ្លួនពីកោះណូរូ ចំនួន៤ទៀត ស្ម័គ្រចិត្តចង់មករស់នៅប្រទេសកម្ពុជា។
ចំណែកជនភៀសខ្លួនរ៉ូហ៊ីងយ៉ាម្នាក់ ដែលចង់ត្រឡប់ទៅកាន់ស្រុកកំណើតខ្លួនវិញនោះ មកដល់ពេលនេះមិនទាន់មានការឆ្លើយតបពីស្ថានទូតមីយ៉ាន់ម៉ា ក្នុងការអនុញ្ញាតិបើកផ្លូវឲ្យជនភៀសខ្លួននោះនៅឡើយទេ។ នេះបើតាមលោក ខៀវ សុភ័គ។
គួររម្លឹកថា កាលពីព្រឹកថ្ងៃទី៤មិថុនាកន្លងទៅ ជនភៀសខ្លួន៤នាក់ពីកោះណូរូ មករស់នៅរាជធានីភ្នំពេញ ក្រោមកិច្ចព្រមព្រៀងរវាងអូស្ត្រាលី-កម្ពុជា ដែលត្រូវបានចុះហត្ថលេខាកាលពីចុងឆ្នាំ២០១៤ ។ ជនភៀសខ្លួនទាំងនោះ រួមមាន ជនជាតិរ៉ូហ៊ីងយ៉ាម្នាក់ និងជនជាតិអ៊ីរ៉ង់ ៣នាក់ (ស្រី១នាក់)។ រដ្ឋាភិបាលកម្ពុជាបានផ្តល់ទីលំនៅដល់ ពួកគេរស់នៅក្នុងខណ្ឌច្បារអំពៅ៕
© រក្សាសិទ្ធិដោយ thmeythmey.com