ជាតិ
សង្គមជាតិ
រង់ចាំលោកនាយករដ្ឋមន្ត្រីធ្វើទំនាក់ទំនងផ្ទាល់ជាមួយអ្នកគាំទ្រលើហ្វ៊េសប៊ុក 22, Sep 2015 , 10:45 am
![](https://image.thmeythmey.com/pictures/2015/09/22/thumb2/hun_sen_status.jpg)
×![]()
នៅថ្ងៃទី២០កញ្ញា ខុទ្ទកាល័យលោកនាយករដ្ឋមន្ត្រី ហ៊ុន សែន បានប្រកាសអំពីគណនីហ្វ៊េសប៊ុកផ្លូវការរបស់លោកនាយករដ្ឋមន្ត្រីដែលមានឈ្មោះថា Samdech Hun Sen, Cambodian Prime minister។ បើទោះជាគណនីហ្វ៊េសប៊ុកមួយនេះទំនងជាត្រូវបានបង្កើត និងមានសកម្មភាពជាប្រចាំតាំងពីឆ្នាំ២០១០មកមែន ប៉ុន្តែកន្លងមក មន្ត្រីជាន់ខ្ពស់នានាបានបដិសេធថា គណនីហ្វ៊េសប៊ុកនេះ មិនមែនជារបស់លោកនាយករដ្ឋមន្ត្រីឡើយ។
គ្មានការអះអាងណាមួយថា វាជាគណនីហ្វ៊េសប៊ុករបស់លោកនាយករដ្ឋមន្ត្រីមែន ប៉ុន្តែរាល់សកម្មភាពការងាររបស់លោកនាយករដ្ឋមន្ត្រី រូបភាពនៃការជួបពិភាក្សាការងាររវាងលោកនាយករដ្ឋមន្ត្រី និងប្រតិភូបរទេស ត្រូវបានបង្ហោះផ្សាយនៅលើទំព័រហ្វ៊េសប៊ុកនេះ ពេលខ្លះ យ៉ាងរហ័សទៀតផង។ មានតែប្រព័ន្ធផ្សព្វផ្សាយ ដូចជាទូរទស្សន៍ និងកាសែតមួយចំនួនដែលមានសម្មានចិត្តចំពោះរដ្ឋាភិបាល ដែលបានដកស្រង់ព័ត៌មានទាំងនោះពីទំព័រហ្វ៊េសប៊ុក Samdech Hun Sen, Cambodian Prime minister យកមកផ្សព្វផ្សាយ បើទោះជាមិនមានការប្រកាសផ្លូវការថាគណនីមួយនេះ ពិតជារបស់លោកនាយករដ្ឋមន្ត្រី ហ៊ុន សែន។ ប៉ុន្តែ សារព័ត៌មានមួយចំនួនដែលប្រកាន់វិជ្ជាជីវៈខ្ពស់ខ្ពស់ និងភ្នាក់ងារព័ត៌មានបរទេសប្រចាំនៅកម្ពុជា មិនអាចប្រើប្រាស់ទិន្នន័យ ឬព័ត៌មាននៅលើទំព័រហ្វ៊េសប៊ុក Samdech Hun Sen, Cambodian Prime minister នោះទេ។
ឥឡូវនេះ ខុទ្ទកាល័យរបស់លោកនាយករដ្ឋមន្ត្រីបានប្រកាសអំពីទំព័រហ្វ៊េសប៊ុកផ្លូវការរបស់លោកនាយករដ្ឋមន្ត្រីហើយ។ ការប្រកាសនេះត្រូវបានធ្វើឡើង បន្ទាប់ពីមានគណនីហ្វ៊េសប៊ុកជាច្រើនដែលបន្លំអត្តសញ្ញាណថា ជាគណនីរបស់លោកនាយករដ្ឋមន្ត្រី នេះបើតាមការបញ្ជាក់របស់ខុទ្ទកាល័យលោកនាយករដ្ឋមន្ត្រី និងបន្ទាប់ពីគណនីពិតប្រាកដរបស់លោកនាយករដ្ឋមន្ត្រី មានអ្នកគាំទ្រលើសពី១លាននាក់ហើយ។
បើសិនជាហ្វ៊េសប៊ុកនេះជារបស់លោកនាយករដ្ឋមន្ត្រីហើយនោះ គេនៅរង់ចាំអានការសរសេរដោយផ្ទាល់ពីសំណាក់លោកនាយករដ្ឋមន្ត្រី នៅក្នុងកាលៈទេសៈចាំបាច់នានា។ គឺជាពាក្យពេចន៍របស់លោកនាយករដ្ឋមន្ត្រីម្ចាស់គណនី ដែលប្រើពាក្យ «ខ្ញុំ»។ គឺមិនមែនក្រុមការងារ ដែលនិយាយអំពី ហើយសារព័ត៌មានធំៗ និងមហាជនកាន់តែច្រើននឹងបន្ថែមការយកចិត្តទុកដាក់ទៅលើគណនីហ្វ៊េសប៊ុករបស់មេដឹកនាំប្រទេសនេះ។
តាមពិត តាំងពីទំព័រហ្វ៊េសប៊ុកនេះ ត្រូវបានបង្កើតឡើងក្នុងឆ្នាំ២០១០ គេឃើញម្ចាស់គណនីពិតជាបានធ្វើទំនាក់ទំនងផ្ទាល់ដោយសរសេរពីគំនិតរបស់ខ្លួនទៅកាន់អ្នកគាំទ្រ គ្រាន់តែពេលនោះ status ទាំងនោះត្រូវបានសរសេរជាភាសាអង់គ្លេស។ មានសារសំខាន់ៗមួយចំនួននៅពេលនោះ ដែលអ្នកសារព័ត៌មានអាចយកទៅប្រើប្រាស់ក្នុងអត្ថបទរបស់ពួកគេ ប៉ុន្តែបញ្ហានៅត្រង់ថា នៅពេលនោះវាមិនមានការបញ្ជាក់ណាមួយថា គណនីនោះជារបស់លោកនាយករដ្ឋមន្ត្រី។
គួរបញ្ជាក់ថា លោក ហ៊ុន សែន បានបង្ហាញអំពីសកម្មភាពរស់រវើកខ្លាំងនៅលើប្រព័ន្ធព័ត៌មានវិទ្យា ជាពិសេសនៅលើបណ្តាញសង្គម ដែលលោកត្រូវប្រើដើម្បីធ្វើទំនាក់ទំនងជាមួយមន្ត្រីរបស់លោកនៅទូទាំងប្រទេស៕
Tag:
ហ៊ុន សែន
ហ្វ៊េសប៊ុក
© រក្សាសិទ្ធិដោយ thmeythmey.com