ជាតិ
សេដ្ឋកិច្ច
ការចំណាយថវិកាក្រៅផ្លូវការបង្កឲ្យមានកូដកម្មក្នុងវិស័យកាត់ដេរ 22, Sep 2015 , 4:43 pm
×
ភ្នំពេញ៖ មូលនិធិក្រុមប្រឹក្សាអាជ្ញាកណ្តាល (The Arbitrations Council) បានសិក្សារកឃើញពី មូលហេតុមួយចំនួន បង្កើតឲ្យមានកូដកម្មនៅក្នុងវិស័យឧស្សាហកម្មកាត់ដេរ និងផលិតស្បែក ជើង ក្នុងនោះ រួមមាន ភាពទន់ខ្សោយនៅក្នុងការដោះស្រាយ និងការបង្ការវិវាទនៅកន្លែង ការងារ ការចំណាយថវិកាក្រៅផ្លូវការ និងឥរិយាបថដែលបង្ខិតបង្ខំ ចំណោមសហជីព និងនិយោជកនៅកម្ពុជា។
លោក រឿន ភារុន លម្អិតព័ត៌មានដូចតទៅ៖
មូលនិធិក្រុមប្រឹក្សាអាជ្ញាកណ្តាលបានចេញផ្សាយនូវការសិក្សាថ្មីមួយពីកត្តាចម្បង និងកត្តារួមផ្សំ បង្កើតឲ្យមានកូដកម្មនៅក្នុងវិស័យឧស្សាហកម្មកាត់ដេរ និងផលិតស្បែកជើងនៅកម្ពុជា។ ក្រៅពីកត្តារួមផ្សំ ការសិក្សាក៏រកឃើញផងដែរ នូវបញ្ហាប្រឈមក្នុងការដោះស្រាយវិវាទការងារ ចំណោមកត្តានានា ដែលបណ្តាលឲ្យកូដកម្មបន្តកើតឡើង។
នាយកប្រតិបត្តិស្តីទីមូលនិធិក្រុមប្រឹក្សាអាជ្ញាកណ្តាលលោក ម៉ែន និម្មិត មានប្រសាសន៍ថា ផ្អែកតាមការវិភាគទិន្នន័យឧស្សាហកម្ម និងការសម្ភាសន៍ ការសិក្សានេះ បានរកឃើញថា កូដកម្មទាក់ទងនឹងការទាមទារប្រាក់ឈ្នួលច្រើនជាងមុន គឺជាកត្តាចម្បងបំផុត ស្របពេល វិវាទទាក់ទងនឹងការបញ្ឈប់ និងការចោទប្រកាន់ អំពីការរើសអើងសហជីពស្ថិតក្នុងលំដាប់ទីពីរ ក្នុងសំណុំរឿងពាក់ព័ន្ធនឹងកូដកម្ម។
លើសពីនេះ កម្មករនិយោជិត និងនិយោជកដែលបានផ្តល់សម្ភាសន៍បានលើកឡើង អំពីការអនុវត្តការងារមិនប្រកបដោយវិជ្ជាជីវៈ ការស៊ីសំណូក ការគំរាមកំហែង និងការជ្រៀត ជ្រែកដោយមិនស្របច្បាប់ ក៏ជាកត្តាបង្កឲ្យមានកូដកម្មដែរ។ មួយវិញទៀត ការសិក្សាចេញផ្សាយកាលពីថ្ងៃទី១៧ ខែកញ្ញា ឆ្នាំ២០១៥ ក៏បានរកឃើញអំពីទម្លាប់អនុវត្តជាទូទៅ ចំពោះការផ្តល់ ប្រាក់ឈ្នួល បើទោះបីកម្មករនិយោជិតកំពុង ធ្វើកូដកម្មក៏ដោយ ក៏កម្មករអាចទទួលបាន ប្រាក់ឈ្នួលដដែល។ ការអនុវត្តការបើកប្រាក់ ឈ្នួលក្នុងពេលកម្មករធ្វើកូដកម្មនេះ ជាកត្តារួមចំណែកបង្កបរិយាកាស អំណោយផលដល់សកម្មភាពកូដកម្ម។
ដើម្បីដោះស្រាយបញ្ហានេះ មូលនិធិក្រុមប្រឹក្សាអាជ្ញាកណ្តាលបានលើកឡើងជាគំនិត មួយចំនួន រូមមាន ទីមួយ, កែលម្អវិធានកិច្ចសហប្រតិបត្តិការនៅកន្លែងការងារឲ្យរឹងមាំ ពោលគឺ កសាងវិជ្ជាជីវៈការងារឲ្យកាន់តែប្រសើរ និងពង្រឹងទំនាក់ទំនងការងារឲ្យកាន់តែមាន ផលិតភាពថែមទៀតរវាងភាគីនានាវិស័យក្នុងឧស្សាហកម្ម។ ទីពី,បញ្ឈប់ការអនុវត្តការងារ ដែលមានភាពអយុត្តិធម៌ និងបង្កើនតម្លាភាព ពង្រឹងការគោរពច្បាប់ និងអនុវត្តច្បាប់ក្នុងវិស័យឧស្សាហកម្ម។
បើតាមមូលនិធិក្រុមប្រឹក្សាអាជ្ញាកណ្តាល ចាប់តាំងពីបង្កើតនៅឆ្នាំ ២០០៣ មកទល់បច្ចុប្បន្ន ក្រុមប្រឹក្សាអាជ្ញាកណ្តាលបានទទួលសំណុំរឿងវិវាទការងារចំនួន ២៣០០ សំណុំរឿងដែល ពាក់ព័ន្ធនឹងកម្មករនិយោជិតជាងមួយលាននាក់នៅកម្ពុជា ហើយក្រុមប្រឹក្សាអាជ្ញាបានដោះស្រាយសំណុំរឿងរួចក្នុងអត្រា ៧៣ភាគរយ ចំណោមវិវាទទាំងអស់៕
© រក្សាសិទ្ធិដោយ thmeythmey.com