ជាតិ
សេដ្ឋកិច្ច
ADB៖ កម្ពុជាមានកំណើនសេដ្ឋកិច្ចយឺតជាងការព្យាករណ៍ 22, Sep 2015 , 8:19 pm
![](https://image.thmeythmey.com/pictures/2015/09/22/thumb2/2292015171231untitled-1.jpg)
×![]()
កម្ពុជា នៅតែរក្សាបានកំណើនសេដ្ឋកិច្ចក្នុងរង្វង់៧ភាគរយ សម្រាប់ឆ្នាំ២០១៥នេះ និង ៧.២% សម្រាប់ឆ្នាំ ២០១៦ ។ ធនាគារអភិវឌ្ឍន៍អាស៊ី ADB បានបញ្ជាក់ពីការថយចុះនៃកំណើនសេដ្ឋកិច្ចកម្ពុជា នៅក្នុងរបាយការណ៍សេដ្ឋកិច្ច«ទស្សនវិស័យអភិវឌ្ឍន៍អាស៊ី (ADO) ២០១៥» ដែលរបស់បោះពុម្ពផ្សាយជាប្រចាំឆ្នាំរបស់ខ្លួន។
បើទោះជាកំណើននេះ មានការល្បឿនយឺតជាងការព្យាករណ៍កាលពីដើមឆ្នាំក៏ដោយ ប៉ុន្តែADB បានគូសបញ្ជាក់ថាសេដ្ឋកិច្ចរបស់ប្រទេសកម្ពុជា នឹងនៅតែរឹងមាំរហូតដល់ឆ្នាំ២០១៦ របាយការណ៍ដែលចេញផ្សាយដោយ ADB កាលពីខែមីនា ដើមឆ្នាំ២០១៥នេះ បានព្យាករណ៍ថា កម្ពុជានឹងមានកំណើនសេដ្ឋកិច្ច៧.៣ភាគរយសម្រាប់ឆ្នាំ២០១៥ និង៧.៥ភាគរយនៅឆ្នាំ២០១៦ ។បើតាមADB ការថយចុះនេះ ឆ្លុះបញ្ចាំងពីការថយចុះនូវសក្តានុពលកំណើន សម្រាប់បណ្តាប្រទេសកំពុងអភិវឌ្ឍនៅអាស៊ី និងសន្ទុះយឺតនៃសេដ្ឋកិច្ចប្រទេសឧស្សាហកម្មធំ។
លោក Jan Hansen សេដ្ឋវិទូជាន់ខ្ពស់ប្រចាំប្រទេសរបស់ADB មានប្រសាសន៍ថា៖«ឧស្សាហកម្មកាត់ដេរ សំណង់ និងសេវាកម្ម ជាពិសេសវិស័យទេសចរណ៍ ហិរញ្ញវត្ថុ និងអចលនទ្រព្យ នៅតែបន្តជំរុញកំណើនបន្ថែមទៀត ខណៈការនាំចេញថមថយបន្តិចក្នុងឆមាសទី១ ឆ្នាំ ២០១៥នេះ ស្របពេលវិស័យកសិកម្មទទួលរងផលប៉ះពាល់ដោយសារភ្លៀងធ្លាក់មានកម្រិតទាប និងអូសបន្លាយពេលយូរ»។ លោក បន្តថា៖«តម្រូវការក្នុងស្រុកមានការកើនឡើងខ្លាំង ទន្ទឹមនឹងការនាំចូលក៏មានកំណើនខ្ពស់។ ជាក់ស្តែងការផ្តល់ឥណទានដល់វិស័យឯកជនកើនលើស៣០ភាគរយ ក្នុងខែឧសភា ឆ្នាំនេះ ធៀបនឹងរយៈពេលដូចគ្នាកាលពីឆ្នាំ២០១៤» ។
ADB ក៏បានបង្ហាញទឡ្ហីករណ៍មួយចំនួនទៀតដែលនាំឲ្យសេដ្ឋកិច្ចកម្ពុជាមានភាពយឺតយ៉ាវ។ ទឡ្ហីករណ៍ទាំងនោះរួមមាន ការថយចុះការនាំចេញសម្លៀកបំពាក់ និងស្បែកជើង និងទំនិញ ក្នុងឆមាសទី១ ឆ្នាំ២០១៤ ការថយចុះចំនួនភ្ញៀវទេសចរ កម្រិតអតិផរណាប្រចាំឆ្នាំ និងការប្រឈមនឹងការប្រកួតប្រជែងរបស់ឧស្សាហកម្មកាត់ដេរ ព្រោះការឡើងថ្លៃប្រាក់ដុល្លារ និងគូ ប្រជែងដែលផ្តល់ប្រាក់ឈ្នួលទាប ដូចជាប្រទេសមីយ៉ាន់ម៉ាជាដើម៕
© រក្សាសិទ្ធិដោយ thmeythmey.com