ជាតិ
AII និងក្រុមហ៊ុន AYC Intercultural Programs Thailand ចុះ MOU លើកម្មវិធី TESOL 22, Sep 2015 , 5:33 pm
វិស័យអប់រំ ជាវិស័យស្នូលនៃការអភិវឌ្ឍធនធានមនុស្ស ហើយបច្ចុប្បន្ននេះក្រសួងអប់រំ យុវជន និងកីឡា ដែលមាន ឯកឧត្តមបណ្ឌិត ហង់ ជួន ណារ៉ុន ជារដ្ឋមន្ត្រី បានយកចិត្ដទុកដាក់ និងរឹតបន្តឹងយ៉ាង ខ្លាំងលើគុណភាពនៃការអប់រំទាំងក្នុងគ្រឹះស្ថានរដ្ឋ និងឯកជន។ ជាមួយគ្នានេះផងដែរ វិទ្យាស្ថាន និង សាលារៀន អន្ដរទ្វីប អាមេរិកាំង ដែលបច្ចុប្បន្នកំពុងមានប្រជាប្រិយភាពយ៉ាងខ្លាំង ចំពោះមាតាបិតា និងអ្នកអាណាព្យាបាលសិស្ស បាននិងកំពុងយកចិត្តទុកដាក់យ៉ាងហ្មត់ចត់ទៅលើ គុណភាពសិក្សារបស់ សិស្ស។
កាលពីសប្តាហ៍កន្លងទៅនេះ នៅសាលសន្និសីទ សូវ សុកហួង នៃវិទ្យាស្ថាន អន្តរទ្វីប អាមេរិកាំង លោកឧកញ៉ា វេជ្ជបណ្ឌិត គួច ម៉េងលី ប្រធាន និងប្រធានចាងហ្វាង នៃវិទ្យាស្ថាន និង សាលារៀន អន្តរទ្វីប អាមេរិកាំង និងលោក Suthee Buranacharu អគ្គនាយករងនៃក្រុមហ៊ុន AYC Intercultural Programs Thailand បានអញ្ជើញជាអធិបតី និងចុះហត្ថលេខាលើអនុស្សរណៈនៃការយោគយល់គ្នាស្ដីពី “ការបង្កើតកម្មវិធី TESOL នៅវិទ្យាស្ថាន អន្តរទ្វីប អាមេរិកាំង។
អនុស្សរណៈនេះមានបំណងបង្កើនកិច្ចសហប្រតិបត្តិការក្នុងវិស័យអប់រំ បណ្តុះបណ្តាលវិធីសាស្ត្រក្នុងការបង្រៀនភាសាអង់ គ្លេសទៅកាន់ជនជាតិផ្សេងៗដែលប្រើប្រាស់ភាសាអង់គ្លេសជាភាសាទី2 ជាពិសេសទៅទៀតនោះគឺចង់ពង្រឹង និង ពង្រីកចំណេះដឹងគ្រូបង្រៀនឲ្យទទួលបានចំណេះដឹងថ្មីៗ ដែលចំណេះទាំងនោះធ្វើឲ្យពួកគាត់មាន វិធីសាស្ដ្របង្រៀនកាន់តែច្រើន និងសម្បូរបែប។
ដូច្នេះចាប់ពីពេលនេះតទៅសិស្ស និស្សិត និង សាធារណជនទូទៅ ដែលមានបំណងចង់សិក្សាវគ្គបណ្តុះ បណ្តាលអំពីវិធីសាស្ត្រក្នុងការបង្រៀនភាសា អង់គ្លេស (TESOL) គឺអាចទំនាក់ទំនងសិក្សានៅវិទ្យាស្ថាន អន្តរទ្វីប អាមេរិកាំង ប្រចាំនៅកម្ពុជា ដោយ មិនចាំចាច់ទៅសិក្សានៅក្រៅប្រទេស ហើយសញ្ញាបត្រចេញពីចក្រភពអង់គ្លេស និងត្រូវបានទទួលស្គាល់ ទូទាំងពិភពលោក។ វគ្គបណ្តុះបណ្តាល “វិធីសាស្ត្រក្នុងការបង្រៀនភាសាអង់គ្លេស (TESOL)” នេះ មានរយៈពេល 120ម៉ោង រួមមានការសិក្សាទ្រឹស្តី និងការអនុវត្តផ្ទាល់ ដែលបង្រៀនដោយសាស្ត្រាចារ្យ ដែលមាន បទពិសោធន៍មកពីសហរដ្ឋអាមេរិក។
លោកឧកញ៉ា គួច ម៉េងលី បានមានប្រសាសន៍ថា វិទ្យាស្ថាន អន្តរទ្វីប អាមេរិកាំង មានមោទនភាព និងក្តីសោមនស្សរីករាយយ៉ាងខ្លាំង ដែលបានក្លាយជាដៃគូសហប្រតិបត្តិការក្នុងវិស័យអប់រំ ជាមួយក្រុម ហ៊ុន AYC Intercultural Programs Thailand។ តាមរយៈកិច្ចព្រមព្រៀងនេះ ស្ថាប័នទាំងពីរនឹងចាប់ ដៃគ្នាចូលរួម ចំណែកក្នុងការពង្រឹងគុណភាពអប់រំនៅកម្ពុជាឲ្យកាន់តែមានប្រសិទ្ធភាពជាងមុន ជាពិសេស គឺបំពេញនូវចន្លោះខ្វះខាតបច្ចេកទេសនៃការបង្រៀនរបស់គ្រូទៅសិស្សឲ្យកាន់តែប្រសើរជាងមុន៕
(អត្ថបទសាលា)
© រក្សាសិទ្ធិដោយ thmeythmey.com