ជាតិ
នយោបាយជាតិ
លោក ហ៊ុន សែន ប្រាប់ខ្មែរក្រៅប្រទេសថា កម្ពុជាមិនមែនជារបស់អ្នកកាន់អំណាចក្រុមណាមួយទេ! 25, Sep 2015 , 10:04 am
![រូបពីហ្វេសប៊ុកលោកនាយករដ្ឋមន្រ្តី ហ៊ុន សែន](https://image.thmeythmey.com/pictures/2015/09/25/thumb2/2592015100414hun_sen.jpg)
រូបពីហ្វេសប៊ុកលោកនាយករដ្ឋមន្រ្តី ហ៊ុន សែន
×![]()
ក្នុងពេលជួបជាមួយប្រជាពលរដ្ឋខ្មែរនៅក្រៅប្រទេសនៅក្នុងទីក្រុងញ៉ូវយកសហរដ្ឋអាមេរិក លោក ហ៊ុន សែន ប្រាប់ទៅអ្នកគាំទ្រខ្លួននៅក្រៅប្រទេសទាំងនោះ ឲ្យឈប់លាបពណ៌គ្នាទៅវិញទៅមក។ ជាមួយគ្នានេះ លោក ហ៊ុន សែន ក៏អះអាងប្រាប់ប្រជាពលរដ្ឋនៅក្រៅប្រទេសទាំងនោះថា កម្ពុជា មិនមែនជាប្រទេស របស់ក្រុមអ្នកមានអំណាចណាមួយនោះឡើយ ។
លោក ហ៊ុន សែន បានថ្លែងថា កម្ពុជាមិនមែនជាកម្មសិទ្ធិរបស់ក្រុមអ្នកមានអំណាចណាមួយទេ តែជាប្រទេសរបស់ប្រជាជនខ្មែរទាំងអស់។ ប្រសាសន៍របស់លោកនាយករដ្ឋមន្ត្រីបន្លឺឡើងដូច្នេះ នៅចំពោះមុខពលរដ្ឋខ្មែរ-អាមេរិកាំង ខ្មែរ-កាណាដា និងនិស្សិតខ្មែរ នៅក្នុងទីក្រុងទីក្រុងញ៉ូវយ៉ក កាលពីរសៀលថ្ងៃព្រហស្បតិ៍។ បើតាមទំព័រហ្វេសប៊ុករបស់លោកនាយករដ្ឋមន្ត្រី ក្នុងជំនួបជាមួយប្រជាពលរដ្ឋខ្មែរក្រៅប្រទេសនោះ លោក ហ៊ុន សែន បានបញ្ជាក់បែបនេះថា៖« ប្រទេសកម្ពុជា គឺជាប្រទេសរបស់ប្រជាជនកម្ពុជាទាំងអស់ រាប់ទាំងបងប្អូនជនរួមជាតិខ្មែរទាំងអស់ ដែលកំពុងមានវត្តមានរស់នៅក្រៅប្រទេសទាំងអស់ផងដែរ»។
លោកនាយរដ្ឋមន្ត្រី ក៏ប្រាប់ពលរដ្ឋខ្មែរក្រៅប្រទេសទាំងនោះ ឲ្យឈប់លាបពណ៌គ្នាផងដែរ។«យើងកុំខ្វល់ពីអតីតកាលថាជាអ្វីនោះ តែផ្ទុយទៅវិញយើងទាំងអស់គ្នាជាជាតិសាសន៍ខ្មែរតែមួយ ហើយកាលដែលយើងមករស់នៅបែកឃ្លាតពីប្រទេសកំណើតគឺកើតឡើងដោយសារតែអ្នកនយោបាយមួយចំនួន ដែលបង្ខំឲ្យយើងទៅនៅទីនេះទៅនៅទីនោះបែបនេះ»។ លោក ហ៊ុន សែន បរិយាយយ៉ាងនេះហើយ ក៏បន្តនិយាយសរសើរប្រទេសកម្ពុជាបច្ចុប្បន្នថា «កម្ពុជាឥឡូវមិនដូចពីពេលមុនតទៅទៀតទេ គឺកម្ពុជាកំពុងធ្វើការអភិវឌ្ឍស្ទើរគ្រប់ទីកន្លែងទាំងអស់ ចាប់តាំងពីទីក្រុងរហូតដល់តំបន់ចុងកាត់មាត់ញក»។
មានប្រសាសន៍ដល់ចំណុចនេះ លោក ហ៊ុន សែន ឆ្លៀតថ្លែងការពារថា ខ្លួននិយាយនៅពេលនេះ គឺមិនមែននិយាយក្នុងនាមជាមេដឹកនាំគណបក្សនយោបាយនោះទេ គឺលោកនិយាយក្នុងនាមជាប្រមុខដឹកនាំរាជរដ្ឋាភិបាល ដែលលោកអះអាងថា «កំពុងដឹកនាំប្រទេសមួយកំពុងដើរលើផ្លូវត្រូវ និងកំពុងមានការអភិវឌ្ឍរីកចំរើនលើគ្រប់វិស័យ»។ លោក ហ៊ុន សែន ស្នើឲ្យពលរដ្ឋនៅក្រៅប្រទេសត្រឡប់ទៅកម្ពុជា ដើម្បីពិនិត្យមើលជាក់ស្តែងជាជាងដឹងពីស្ថានភាពកម្ពុជា តាមតែប្រព័ន្ធផ្សព្វផ្សាយ។ លោក ហ៊ុន សែន អត្ថាធិប្បាយបន្ថែមយ៉ាងនេះថា៖«អ្វីដែលបងប្អូនបានឮនិងបានឃើញនៅ តាមបណ្តាញសារព័ត៌មានពីប្រទេសកំណើតរបស់ខ្លួនគឺវាមិនទាន់គ្រប់គ្រាន់នោះទេ ផ្ទុយទៅវិញគឺមានតែបងប្អូនជនរួមជាតិទាំងអស់ ធ្វើដំណើរទៅលេងស្រុកកំណើតដោយផ្ទាល់ទេ ទើបអាចដឹងថា តើកម្ពុជាបច្ចុប្បន្ន កំពុងស្ថិតនៅក្នុងស្ថានភាពបែបណានោះ»។
សូមបញ្ជាក់ថា គោលដៅសំខាន់របស់លោកនាយករដ្ឋមន្ត្រី ហ៊ុន សែន ទៅអាមេរិកនៅពេលនេះ ដើម្បីចូលរួមកិច្ចប្រជុំកំពូលរបស់អង្គការសហប្រជាជាតិស្តីពីរបៀបវារៈនៃការអភិវឌ្ឍន៍ក្រោយឆ្នាំ២០១៥ នៅទីស្នាក់ការកណ្តាលរបស់អង្គការសហប្រជាជាតិក្នុងក្រុងញូវយ៉កពីថ្ងៃទី២៥ ដល់ថ្ងៃទី២៧ ខែកញ្ញា៕
Tag:
លោក ហ៊ុន សែន
លាបពណ៌
© រក្សាសិទ្ធិដោយ thmeythmey.com