ជាតិ
ក្រសួងព័ត៌មានសម្រេចបិទការផ្សាយភាពយន្តបរទេសចាប់ពីម៉ោង៧ទៅម៉ោង៩យប់ 25, Sep 2015 , 11:43 am
![](https://image.thmeythmey.com/pictures/2015/09/25/thumb2/2592015114526_________-___________________________.jpg)
×![]()
ភ្នំពេញ៖ ក្រសួងព័ត៌មានបានសម្រេចមិនឲ្យចាក់ផ្សាយភាពយន្តបរទេសនៅតាមកញ្ចក់ទូរទស្សន៍ចាប់ពីម៉ោង៧ដល់ម៉ោង៩យប់ ចាប់ពីថ្ងៃទី០១ ខែវិច្ឆិកា ឆ្នាំ២០១៥តទៅ។ សេចក្តីសម្រេចបិទការផ្សាយភាពយន្តបរទេសនេះ ធ្វើឡើងនៅក្នុង សន្និសីទសារព័ត៌មាននៅក្រសួងព័ត៌មាន នៅថ្ងៃទី២៥ ខែកញ្ញា នេះ។
បន្ទាប់ពីមានការរិះគន់យ៉ាងខ្លាំងពីមហាជន ចំពោះការចាក់ផ្សព្វផ្សាយភាពយន្តបរទេសនៅតាមកញ្ចក់ទូរទស្សន៍នោះ នៅថ្ងៃនេះក្រសួងព័ត៌មាន បានចេញសេចក្តីសម្រេច បិទការចាក់ផ្សាយភាពយន្តបរទេសនៅតាមកញ្ចក់ទូរទស្សន៍ទាំងអស់ក្នុងប្រទេសកម្ពុជាចន្លោះពីម៉ោង៧ ដល់ម៉ោង ៩យប់។ ក្នុងអំឡុងពេលនេះ ក្រសួងអនុញ្ញាតឲ្យតែផលិតកម្មឬវណ្ណកម្មក្នុងស្រុក ទើបអាចចាក់ផ្សាយតាមកញ្ចក់ទូរទស្សន៍បាន។ ការសម្រេចនេះ ត្រូវបានក្រសួងព័ត៌មានអះអាងថា គឺក្នុងគោលបំណងលើកតម្កើងមោទនភាពជាតិ។
សេចក្តីសម្រេចនេះនឹងអនុវត្តន៍ចាប់ពីថ្ងៃទី០១ ខែវិច្ឆិកា ឆ្នាំ២០១៥តទៅ។ បើសិនជាស្ថានីទូរទស្សន៍ណា ល្មើសទៅនឹងការសម្រេចរបស់ក្រសួងព័ត៌មាន ក្រសួងនឹងធ្វើការដកអាជ្ញាប័ណ្ណស្ថានីទូទស្សន៍ទាំងនោះ។
ក្នុងសន្និសីទកាសែតនៅព្រឹកនេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានថ្លែងដូច្នេះថា៖«កាលពីឆ្នាំ១៩៩៣ ក្រសួងក៏ធ្លាប់បានសម្រេចឲ្យចាក់បញ្ចាំងភាពយន្តបរទេសចំនួន៤០ភាគរយ ប៉ុន្តែដោយសារតែមិនមានភាពយន្តក្នុងស្រុក ទើបធ្វើឲ្យយើងមានការលំបាក ដែលយើងត្រូវគាបសង្កត់លើទូរទស្សន៍។ ប៉ុន្តែឥឡូវនេះ យើងលែងកំណត់ជាភាគរយទៀតហើយ គឺយើងកំណត់ជាម៉ោងវិញ»។ លោកបន្ថែមថា នៅពេលមានភាពយន្តខ្មែរមានគ្រប់គ្រាន់ហើយ ក្រសួងនឹងកំណត់ជាភាគរយភាពយន្តបរទេស ឲ្យដូចប្រទេសដទៃដែរ។
លោកខៀវ កាញារីទ្ធ បានអំពាវនាវឲ្យម្ចាស់ឧបត្ថម្ភទូរទស្សន៍ គួរជួយលើកស្ទួយផលិតកម្មក្នុងស្រុកដើម្បីបានចាក់បញ្ចាំងផ្សាយនៅតាមកញ្ចក់ទស្សន៍ ព្រោះទូរទស្សន៍បើគ្មានការឧបត្ថម្ភ ទូរទស្សន៍នឹងមិនអាចផ្សាយបានទេ។
គួររម្លឹកថា ក្រសួងព័ត៌មាន ធ្លាប់បានសម្រេច មិនអនុញ្ញាតឲ្យផ្សព្វផ្សាយផលិតផលគ្រឿងស្រវឹងចាប់ពីម៉ោង ៦ ដល់៨យប់នៅលើកញ្ចក់ទូរទស្សន៍។ ហើយនៅថ្ងៃនេះ ក្រសួងព័ត៌មាន បានសម្រេចបិទការផ្សាយភាពយន្តបរទេសនៅលើកញ្ចក់ទូរទស្សន៍ចាប់ពីម៉ោង៧ ដល់ម៉ោង៩យប់។
Tag:
ភាពយន្ត
ខៀវ កាញារីទ្ធ
© រក្សាសិទ្ធិដោយ thmeythmey.com