ជាតិ
នយោបាយជាតិ
CPP និងCNRP ចាប់ផ្តើមសរសើររៀងខ្លួនថា កំពុងមានសំឡេងគាំទ្រច្រើន
25, Sep 2015 , 5:00 pm
×![]()
អនុប្រធានគណបក្សសង្គ្រោះជាតិ លោក កឹម សុខា បានថ្លែងថា នាពេលបច្ចុប្បន្ននេះ គណបក្សសង្គ្រោះជាតិ មានសំឡេងគាំទ្រពីសំណាក់ប្រជាពលរដ្ឋភាគច្រើន បើទោះបីបក្សខ្លួនមានសំឡេងភាគតិចក្នុងរដ្ឋសភាក្តី។ អ្នកនាំពាក្យគណបក្សប្រជាជនកម្ពុជា បានចាត់ទុកការលើកឡើងរបស់លោក កឹម សុខា ថា ជាការស្រមើស្រមៃប៉ុណ្ណោះ តែគណបក្សប្រជាជនកម្ពុជាវិញទេ ដែលមានសំឡេងគាំទ្រច្រើន។ 
គ្រាន់តែលោក កឹម សុខា សរសើរគណបក្សសង្គ្រោះជាតិថា បច្ចុប្បន្នមានសំឡេងគាំទ្រភាគច្រើន បើទោះខ្លួនមានសំឡេងតិចក្នុងរដ្ឋសភាក្តី លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា បានចាត់ទុកការលើកឡើងរបស់លោកអនុប្រធានគណបក្សប្រឆាំងថា ជាការដេកស្រមើស្រមៃរបស់លោក កឹម សុខា ដែលផ្ទុយពីការពិត។ ការពិត ដែលអ្នកនាំពាក្យរូបនេះអះអាងផ្ទុយពីលោក កឹម សុខា ថា គណបក្សប្រជាជនកម្ពុជាវិញទេ ដែលកំពុងកើតប្រជាប្រិយភាពជាលំដាប់ និងមានសំឡេងគាំទ្រភាគច្រើន។
ជាការកត់សម្គាល់ក្រោយពីស្ងប់ស្ងាត់អស់មួយរយៈលោក កឹម សុខា អនុប្រធានគណបក្សសង្គ្រោះជាតិ បានថ្លែងសារនយោបាយជាបន្តបន្ទាប់ បន្ទាប់ពី លោក ហ៊ុន សែន បានថ្លែងសារនយោបាយរិះគន់មេដឹកនាំគណបក្សប្រឆាំងមិនដាច់ក្នុងរយៈពេលប៉ុន្មានសប្តាហ៍ចុងក្រោយនេះ។ នៅពោះមុខគាំទ្ររបស់ខ្លួនដែលភាគច្រើនជាពលរដ្ឋខ្មែរឥស្លាមកាលពីថ្ងៃព្រហស្បតិ៍ម្សិលមិញលោក កឹម សុខា បានលើកឡើងយ៉ាងនេះថា៖« ទោះបីគណបក្សសង្គ្រោះជាតិបច្ចុប្បន្នមានសំឡេងភាគតិចនៅក្នុងរដ្ឋសភាក៏ដោយ ក៏ប៉ុន្ដែជាក់ស្ដែងនៅក្នុងស្រទាប់មហាជនខ្មែរ គណបក្សសង្គ្រោះជាតិមានសំឡេងភាគច្រើន។ នេះជាក្ដីសង្ឃឹមរបស់ប្រជាពលរដ្ឋយើង និងរបស់ជាតិយើង»។
ជាថ្មីម្តងទៀត លោក ឈឹម ផលវរុណ និយាយថា បច្ចុប្បន្ននេះ គណបក្សប្រជាជនកម្ពុជា មានអ្នកគាំទ្រកាន់តែច្រើនឡើង ខណៈប្រជាប្រិយភាពរបស់គណបក្សសង្គ្រោះជាតិ ធ្លាក់ចុះយ៉ាងខ្លាំង ដោយសារតែសម្តីភូតកុហករបស់ លោក សម រង្ស៊ី និងលោក កឹម សុខា។ អ្នកនាំពាក្យរូបនេះ បញ្ជាក់យ៉ាងនេះថា៖ « ពាក្យកុហកទាំងនោះ យើងដឹងគ្រប់គ្នាហើយថា ក្រោយបោះឆ្នោតមេដឹកនាំគណបក្សនេះ ប្រាប់អ្នកគាំទ្រខ្លួនថា ទាមទារឲ្យរាប់សន្លឹកឆ្នោតឡើងវិញ បោះឆ្នោតឡើងវិញមុនអាណត្តិ និងប្រកាសអត់ចូលសភា។ តែខ្លួនទាមទារមិនបាន និងមិនគោរពសម្តីខ្លួនឯង។ ហើយពេលបានចូលសភា ឃ្លានអំណាច»។ ជាងនេះទៅទៀតលោក ឈឹម ផលវរុណ បន្តលើកឡើងថា ការបង្កើតគណបក្សតូចៗ មានគណបក្សលោក ម៉ម សូណង់ដូ គណបក្ស លោក សួន សេរីរដ្ឋា និងគណបក្សមូលដ្ឋាន ជាដើម ដែលលោកនិយាយថា ជាអតីតអ្នកគាំទ្រគណបក្សសង្គ្រោះជាតិនោះ នឹងធ្វើឲ្យគណបក្សដែលមានសំឡេងនៅក្នុងសភា ៥៥ កៅអីបច្ចុប្បន្នមួយនេះ ធ្លាក់ចុះអ្នកគាំទ្រ។
លោក ឈឹម ផលវរុន ថែមទាំងហ៊ាននិយាយទៀតថា ឧបមាថា ប្រសិនបើរយៈពេល ១ សប្តាហ៍ទៀត មានការបោះឆ្នោតជ្រើសតាំងតំណាងរាស្ត្រនោះ គណបក្សសង្គ្រោះជាតិ នឹងធ្លាក់កៅអីមកសល់តែ ២០ កៅអីប៉ុណ្ណោះ ហើយគណបក្សប្រជាជនកម្ពុជា នឹងទទួលកៅអីបន្ថែមទៀតប្រមាណ ១៥ និងជាង ២០ កៅអីទៀត នឹងបានទៅគណបក្សតូចៗធ្លាប់គាំទ្រគណបក្សប្រឆាំង។ លោក ឈឹម ផលវរុណ មានជំនឿយ៉ាងខ្លាំងថា បោះឆ្នោតនៅឆ្នាំ ២០១៨ ខាងមុខគណបក្សប្រជាជនកម្ពុជា នឹងឈ្នះឆ្នោត៕
Tag:
លោក កឹម សុខា
លោក ឈឹម ផលវរុណ
© រក្សាសិទ្ធិដោយ thmeythmey.com
