មន្ត្រី និងអ្នកនយោបាយខ្លះ ចូលចិត្តពុករលួយម៉ោងរដ្ឋ

ពីនេះ ពីនោះ

មន្ត្រី និងអ្នកនយោបាយខ្លះ ចូលចិត្តពុករលួយម៉ោងរដ្ឋ

26, Sep 2015 , 9:43 am

រូបភាព

ដោយ: ថ្មីៗ

មានមន្ត្រីល្អ មានអ្នកនយោបាយល្អ ធ្វើការពេញលេញដើម្បីបម្រើប្រយោជន៍ជាតិ ប្រយោជន៍ប្រជាជន គោរពតាមតួនាទី និងមុខដំណែងរបស់ខ្លួន គឺជាសុបិន្តល្អសម្រាប់ស្រុកទេសមួយ។

ចុចទីនេះដើម្បីទទួលបានព័ត៌មានរហ័ស

តែមន្ត្រីរាជការមួយចំនួន ទៅធ្វើការមិនទៀងទាត់ពេលវេលា ធ្វើការមិនបានពេញលេញ ទៅធ្វើការបំពេញតែអវត្តមាន ។ ព្រឹកធ្វើការ៤ម៉ោង មន្ត្រីមួយចំនួនធ្វើតែមួយ១ម៉ោង ល្ងាចធ្វើការ៤ម៉ោង មន្ត្រីខ្លះទៅតែមួយភ្លេត។ មានបងៗមន្ត្រីរាជការតាមក្រសួងស្ថាប័នមួយចំនួន គាត់ពិតជាឆ្លាត់វៃក្នុងការគេងចំណេញម៉ោងធ្វើការងាររដ្ឋទៅរកស៊ីការងារឯកជនផ្ទាល់ខ្លួន ដែលនាំឲ្យក្រសួងស្ថាប័នមួយចំនួន ហាក់មិនសូវមានដំណើរការ។ ដល់ខែបើកលុយ ហើយនិយាយថា ប្រាក់ខែទាប់ ផ្គត់ផ្គងគ្រួសារមិនគ្រប់ ទើបមិនចង់នៅកន្លែងហើយទៅរកក្រៅ។ សួរថារដ្ឋគួរឲ្យប្រាក់ខែច្រើនទេ បើមានមន្ត្រីបែបហ្នឹង?

ចំណែកមន្ត្រីខ្លះមានមុខនាទីក្នុងវិស័យនយោបាយ ហើយយកម៉ោងរដ្ឋទៅផ្សព្វផ្សាយគោលនយោបាយរបស់បក្ស យកវេទិការជួបជាមួយប្រជាពលរដ្ឋបែបលក្ខណៈសាធារណៈទៅផ្សព្វផ្សាយមនោគមន៍វិជ្ជាបក្ស យកវេទិកាជួបជាមួយសិស្សនិស្សិតជាឈ្នាន់ដើម្បីថ្លែងសារនយោបាយក្ដៅ។ ធ្វើទាំងបំពានច្បាប់ការងារ តួនាទី កាតព្វកិច្ច និងខុសកាល ខុសវេលាជាមន្ត្រីរដ្ឋ និងអ្នកនយោបាយ។ តើនេះសមជាអ្នកនយោបាយចេះបែងចែក កិច្ចការរដ្ឋ និងកិច្ចការបក្ស ឬនយោបាយហើយឬនៅ?

ជាការពិត ទោះបីព្យាយាមបកស្រាយឲ្យល្អ ក៏នៅតែជាសកម្មភាពពុករលួយម៉ោងរដ្ឋ ដើម្បីប្រយោជន៍បុគ្គល យកឈ្មោះរដ្ឋដើម្បីបំពេញបេសកកម្មផ្សព្វផ្សាយពីបក្ស យកមុខងារក្នុងស្ថាប័នរដ្ឋដើម្បីលើកដំកើងកិត្តិនាមបក្ស ដែលជាគំរូអាក្រក់មួយចំពោះយុវជនសម័យថ្មីដែលកំពុងត្រៀមខ្លួនបន្តវេនបន្ទាប់ពីមន្ត្រីចាស់ៗចូលនិវត្ត។ បើសិនជាអាចគឺត្រូវតែបញ្ឈប់ទង្វើបែបនេះ។ បើសិនចង់បានប្រាក់ខែខ្ពស់ពីរដ្ឋសូមឲ្យប្រសិទ្ធភាពការងារមានសមទ្ធផល ។ ព្រោះតែមានមន្ត្រីបែបហ្នឹងហើយ ដែលជាហេតុនាំឲ្យក្នុងក្រសែភ្នែកប្រជាជនខ្មែរ វាយតម្លៃមន្ត្រីរាជការទាំងអស់ក្នុងផ្លូវអវិជ្ជមាន មើលទៅអ្នកនយោបាយក្នុងផ្លូវអាក្រក់។ តែតាមពិតមន្ត្រីរាជការក៏មនុស្សល្អស្គាល់តួនាទី អ្នកនយោបាយជាច្រើនក៏ជាមនុស្សស្មោះត្រង់ផងដែរ។

Tag:

ពីនេះពីនោះ