ពីនេះ ពីនោះ
តើគំនិតដូចគ្នា នាំទៅរកភាពតូចចង្អៀត និងគ្រោះថ្នាក់ឬយ៉ាងណា? 27, Sep 2015 , 7:59 am
![](https://image.thmeythmey.com/pictures/2015/09/27/thumb2/279201572648think.gif)
×![]()
នៅក្នុងផ្នត់គំនិតរបស់មនុស្សស្ទើរតែជាទូទៅតែងតែចង់បានមតិរួមមួយ គំនិតរួមមួយដើម្បីធ្វើកិច្ចការងាយចុះសម្រុងគ្នា។ ក៏ប៉ុន្តែបើយើងសម្លឹងមើលទៅអ្នកគិតស៊ីជម្រៅ អ្នកគិតបែបទស្សនវិជ្ជាសម័យមុនៗក៏ដូចជាបច្ចុប្បន្ន និងអ្នកគិតបែបវិទ្យាសាស្ត្រ តែងតែមានគំនិតផ្សេងៗគ្នា ហើយបង្កើតបានរបកគំហើញផ្សេងៗគ្នា ទៅតាមអ្វីដែលជនទាំងនោះបានគិត បានឆ្ងល់ បានលើកជាទឡ្ហីករណ៍ ជាទ្រឹស្ដី និងវិធីសាស្ត្ររបស់ពួកគាត់។
តាមពិតទៅការមានគំនិតដូចគ្នាគឺល្អ តែយើងក៏ត្រូវតែពិចារណាផងដែរថា គំនិតខ្វែងគ្នាធ្វើឲ្យមានការរីកចម្រើន និងកែតម្រូវនាំទៅរកបរិបទថ្មី។ ជាក់ស្ដែងគំនិតផ្ទុយគ្នារវាងអារីស្តូត និងគ្រូរបស់ខ្លួនប្លាតុង បានធ្វើឲ្យអារីស្តូតរកឃើញអ្វីដែលថ្មី ប្លែក និងមានទឡ្ហីករណ៍រឹងមាំជាងប្លាតុងទៅទៀត។ ចំណែកទស្សនវិទូផ្សេងៗជាច្រើនទៀតគឺកម្រមានជំហរគាំទ្រគំនិតអ្នកគិតផ្សេងៗណាស់ គាត់តែងតែព្យាយាមស្វែងរកចំណុចខ្សោយគំនិតទាំងឡាយដែលបានលើកឡើង ហើយធ្វើការរិៈគន់ ដើម្បីក៏សាងប្រព័ន្ធគំនិតនិងទឡ្ហីករណ៍ថ្មីមួយ ដែលមានលក្ខណៈសមហេតុ សមផល ទៅតាមបរិបទសង្គមជាដើម។
យ៉ាងណាម៉ិញ គំនិតដូចគ្នា ឬហៅថាមតិឯកច្ឆន្ទអាចនាំទៅរកគ្រោះថ្នាក់ដោយសារតែមតិភាគច្រើន។ ព្រោះថានៅពេលខ្លះមតិភាគច្រើន រួមគំនិតគ្នាក្នុងមាគ៌ាខុស អាចនាំឲ្យស្ថាប័ន ឬសង្គមមួយប្រឈមនិងគ្រោះថ្នាក់ធំ។ បញ្ហានេះភាគច្រើនតែងតែកើតក្នុងសង្គមប្រជាធិបតេយ្យ ក្រោមស្លាក់ក្រុមអ្នកដឹកនាំ ដែលតែងតែគិតថាយកមតិភាគច្រើនជាធំ តែមតិភាគច្រើននោះវាជាគំនិតខុសឆ្គង បម្រើឲ្យផលប្រយោជន៍អ្នកមួយក្រុមធំនោះ។
ជារួមចំពោះ ការមានគំនិតដូចគ្នា ការមានមតិឯកច្ឆន្ទ គឺជាសញ្ញាណល្អមួយដើម្បីធ្វើកិច្ចការ។ ក៏ប៉ុន្តែ គំនិតបែបនេះ កន្លងទៅក៏កម្រនាំទៅរកការរីកចម្រើន និងរក្សាបានសន្តិភាពបានទាំងស្រុងណាស់។ ក្នុងន័យនេះមិនមែនមានន័យថាបោះចោលមាគ៌ានេះទេ។ តែយើងត្រូវតែទាមទាររកឲ្យបាននៅការយល់ឃើញផ្សេងៗគ្នា គំនិតផ្សេងៗគ្នា ទឡ្ហីករណ៍ផ្សេងៗគ្នា និងវិធីសាស្ត្រផ្សេងៗគ្នា យកមកធ្វើជាប្រធានបទដើម្បីជជែកឆ្ពោះទៅរកការបើកទូលាយនៃគំនិត។ ដូចពាក្យមួយឃ្លាថា «មនុស្សដប់នាក់មានគំនិតដប់» ហេតុនេះមនុស្សម្នាក់ទទួលយកគំនិតផ្សេងៗគ្នាច្រើន វាល្អជាងមនុស្សច្រើនប្រមូលផ្ដុំគ្នាទទួលយកគំនិតតែមួយ។
© រក្សាសិទ្ធិដោយ thmeythmey.com