ពីនេះ ពីនោះ
ជាង៣០ឆ្នាំពាក្យកុហកនៅតែពេញនិយមក្នុងផ្នត់គំនិតមនុស្សខ្មែរ! 10, Dec 2015 , 9:01 am
× ភ្នំពេញ៖ ពាក្យកុហក បោកប្រាស់ គឺជាពាក្យមួយដែលនរណាៗក៏ស្អប់ តែពេលខ្លះអ្នកដែលស្អប់ពាក្យនេះស្រាប់តែកំពុងប្រើប្រាស់ជាប្រចាំថ្ងៃដោយមិនដឹងខ្លួន។ សម័យកម្ពុជាប្រជាធិបតេយ្យមនុស្សនិយាយកុហកដើម្បីរក្សាជីវិត នោះគេហៅថាចេះបត់បែន និងមើលកាលៈទេសៈ។
ការនិយាយកុហកមិនមែនអាក្រក់ទាំងស្រុងនោះទេ តែក៏មិនមែនជាសកម្មភាព ទង្វើ និងជាចេតនាល្អនោះដែរនៅក្នុងជីវិតទំនាក់ទំនងក្នុងសង្គម។ ជាពិសេសចេតនា ទង្វើ និងសកម្មភាពកុហកវាមិនមែនជាសញ្ញាណល្អទៀតទេ សម្រាប់សង្គមមនុស្សបច្ចុប្បន្ន។
សកម្មភាពមិត្តកុហកមិត្ត បុគ្គលកុហកបុគ្គលដើម្បីប្រយោជន៍ខ្លួនគឺជារូបភាពមួយដែលតែងតែកើតមាន។ កត្តានេះបានធ្វើឲ្យមានទំនាស់ និងការបែកបាក់មិត្តភាព ព្រោះជាមិត្តភាពដែលស្ថិតនៅក្រោមរូបភាពនៃការបោកប្រាស់។ នៅកន្លែងការងារ បុគ្គលិកកុហកចៅហ្វាយនាយ ចៅហ្វាយនាយបោកប្រាស់កូនចៅក្នុងរូបភាពផ្សេងៗដែលជាលទ្ធផលគ្មានអ្វីដែលចំណេញចំពោះស្ថាប័នដែលខ្លួនកំពុងបំពេញការងារនៅពេលការពិតត្រូវបានគេដឹង។
ទោះជាយ៉ាងណាសកម្មភាពកុហកបោកប្រាស់ខាងលើ ថ្វីត្បិតតែវាមិនល្អ តែវាជះឥទ្ធិពលត្រឹមតែបុគ្គលនិងបុគ្គលដែលបានប្រព្រឹត្ត ប៉ុន្តែអ្វីដែលកាន់តែធ្ងន់ធ្ងរនោះគឺ បច្ចុប្បន្នអ្នកនយោបាយ បែរជាធ្វើនយោបាយបោកប្រាស់ ភូតភរ កុហក ប្រជារាស្ត្រខ្លួនឯងដើម្បីតែប្រយោជន៍បក្សពួកខ្លួន។ ចំណែកអ្នកនយោបាយខ្លះនៅតែបន្តកុហករឿងរ៉ាវប្រវត្តិសាស្ត្រដែលកើតមាន បំភ្លៃការពិត ព្រោះតែខ្លាចគេស្គាល់រឿងអាស្រូវរបស់ខ្លួនក្នុងអតីតកាល។ បើនិយាយរឿងរ៉ាវប្រវត្តិអាស្រូវខ្លួនថាប៉ះពាល់កិត្តិយសខ្លួនមិនហ៊ាននិយាយមិនថ្វីទេ តែរឿងរ៉ាវមួយចំនួនគឺជារឿងដែលពាក់ព័ន្ធនិងប្រយោជន៍ជាតិ ក៏អ្នកនយោបាយហ៊ានកុហកប្រជាជនខ្លួនឯងដែរ។
ជាការពិតណាស់ពាក្យថា«ការពិតនៅតែជាការពិត» គឺនៅតែមានភាពត្រឹមត្រូវ នៅពេលដែលវិសាលភាពនៃព័ត៌មានកាន់តែទូលំទូលាយ និងចំណេះដឹងរបស់មនុស្ស ផ្នែកការគិតពិចារណាបានច្បាស់លាស់ និងស៊ីជ្រៅ។ ពេលនោះហើយដែលគំនិតកុហក បោកប្រាស់ត្រូវបានវាយបកទៅបុគ្គលទាំងនោះវិញ ដែលជាផលសងនៃទង្វើរបស់ខ្លួន៕
© រក្សាសិទ្ធិដោយ thmeythmey.com