ជាតិ
សង្គមជាតិ
កម្ពុជាបានជំនួយជាង ២សែនដុល្លារទៀតពីជប៉ុនលើគម្រោងអភិវឌ្ឍន៍ចំនួនបី
17, Dec 2015 , 9:17 am
ឯកអគ្គរដ្ឋទូតជប៉ុនប្រចាំកម្ពុជា លោក យូជិ គូម៉ាម៉ារ៉ូ
×![]()
ភ្នំពេញ៖ រដ្ឋាភិបាលជប៉ុន បានផ្តល់ជំនួយឥតសំណងចំនួន ២៦៨,២៤៨ ដុល្លារអាមេរិក ដល់កម្ពុជា ដើម្បីអនុវត្តគម្រោងអភិវឌ្ឍន៍ចំនួន៣ គឺគម្រោងស្តារប្រព័ន្ធធារាសាស្ត្រអន្លុងរូង ខេត្តពោធិ៍សាត់ គម្រោងស្តារឡើងវិញ ប្រឡាយរងស្តៅ ខេត្តព្រៃវែង និងគម្រោងសាងសង់ទីស្នាក់ការអភិរក្សព្រៃការពារជួរភ្នំក្រវាញភាគកណ្តាល ខេត្តពោធិ៍សាត់។
ក្នុងពិធីចុះហត្ថលេខាលើកិច្ចសន្យាផ្តល់ជំនួយសម្រាប់គម្រោងទ្រង់ទ្រាយតូចសន្តិសុខមនុស្សជាតិ (គូសាណូណិ) នារសៀលថ្ងៃទី១៦ធ្នូ ឯកអគ្គរដ្ឋទូតជប៉ុនប្រចាំកម្ពុជា លោក យូជិ គូម៉ាម៉ារ៉ូ (Yuji KUMAMARU) បានបញ្ជាក់ពីមូលហេតុដែលរដ្ឋាភិបាលជប៉ុនផ្តល់ជំនួយនេះ។ លោកនិយាយថា ប្រជាជនជប៉ុនបានទទួលស្គាល់ពីសារៈសំខាន់នៃវិស័យប្រព័ន្ធធារាសាស្ត្រ និងបរិស្ថាន ដូចនេះទើបប្រជាជន និងរដ្ឋាភិបាលជប៉ុន បាននិងកំពុងជួយដល់កិច្ចខិតខំប្រឹងប្រែង របស់ប្រជាជនកម្ពុជានៅក្នុងវិស័យទាំងនេះ តាមរយៈគម្រោងទ្រង់ទ្រាយតូចសន្តិសុខមនុស្សជាតិ។
ក្នុងនាមប្រជាជនជប៉ុន លោកសង្ឃឹមថា គម្រោងទាំងបីនេះ នឹងអនុវត្តន៍យ៉ាងរលូន និងប្រកបដោយប្រសិទ្ធភាពខ្ពស់។ ជាពិសេស លោកសង្ឃឹមថា សំណង់ជំនួយខាងលើនេះ នឹងត្រូវបានថែទាំយ៉ាងត្រឹមត្រូវ ដើម្បីឲ្យប្រជាជនកាន់តែច្រើនអាចទទួលបានអត្ថប្រយោជន៍ពីគម្រោងទាំងនេះ។ លោកបញ្ជាក់ផងដែរថា៖«ខ្ញុំសង្ឃឹមថា គម្រោងទាំងនេះ នឹងជួយពង្រឹងជាបន្តទៀត នូវទំនាក់ទំនងមិត្តភាពដែលមានរួចមកហើយរវាងប្រជាជនជប៉ុន និងប្រជាជនកម្ពុជា»។
បើតាមឯកអគ្គរដ្ឋទូតជប៉ុនប្រចាំកម្ពុជា លោក Yuji KUMAMARU ស្ថាប័នដែលត្រូវទទួលថវិកាជំនួយនេះ រួមមានទី១ មន្ទីរធនធានទឹក និងឧតុនិយមខេត្តពោធិ៍សាត់ ទទួលថវិកាជំនួយចំនួន៨៩,៧៧៥ដុល្លារអាមេរិក សម្រាប់គម្រោងស្តារប្រព័ន្ធធារាសាស្ត្រអន្លង់រូង១ខ្សែប្រវែង ២១០០ម៉ែត្រ សាងសង់លូជ្រុង១កន្លែង និងសំណង់លូបញ្ចេញទឹក៣កន្លែង ក្នុងខេត្តពោធិ៍សាត់។ ប្រជាកសិករជាង ១៥០០នាក់ នឹងទទួលបានទឹកស្រោចស្រពដីស្រែ តាមរយៈគម្រោងនេះ។
ទី២ មន្ទីរធនធានទឹក និងឧតុនិយមខេត្តព្រៃវែង ទទួលជំនួយថវិកា៨៩,៤២៣ដុល្លារអាមេរិក សម្រាប់គម្រោងស្តារឡើងវិញប្រឡាយរងស្តៅ១ខ្សែប្រវែង ២២៥០ម៉ែត្រ សំណង់បញ្ចូលទឹក១កន្លែង សំណង់ស្ទាក់ទឹក១កន្លែង និងសំណង់លូរំដោះទឹក២កន្លែង។ ប្រជាកសិករជាង ១០០០នាក់ នឹងទទួលបានទឹកស្រោចស្រពដីស្រែរបស់ពួកគេ ក្រោយពីគម្រោងនេះ ត្រូវបានបញ្ចប់។ និងទី៣ ខណ្ឌរដ្ឋបាលព្រៃឈើពោធិ៍សាត់ ទទួលជំនួយថវិកាចំនួន ៨៩,០៥០ដុល្លារអាមេរិក សម្រាប់គម្រោងសាងសង់ទីស្នាក់ការអភិរក្សតំបន់ការពារជួរភ្នំក្រវ៉ាញ ភាគកណ្តាលចំនួនមួយខ្នងកម្ពស់២ជាន់ ស្មើនឹង១០បន្ទប់ ក្នុងខេត្តពោធិ៍សាត់។ រដ្ឋាភិបាលជប៉ុនរំពឹងថា គម្រោងទីបីនេះ នឹងជួយពង្រឹងការយាមល្បាតពីការកាប់ព្រៃឈើខុសច្បាប់។
គួរបញ្ជាក់ផងដែរ ពិធីចុះហត្ថលេខាផ្តល់ជំនួយនៅរសៀលនេះ ប្រព្រឹត្តទៅក្រោមវត្តមានឯកអគ្គរដ្ឋទូតជប៉ុនប្រចាំកម្ពុជា ប្រតិភូរដ្ឋាភិបាលទទួលបន្ទុកប្រធានរដ្ឋបាលព្រៃឈើ អ្នកសម្របសម្រួលគម្រោង Kusanone និងប្រធានមន្ទីរពាក់ព័ន្ធនានា៕
Tag:
កម្ពុជា-ជប៉ុន
គម្រោងអភិវឌ្ឍ
ជំនួយឥតសំណង
© រក្សាសិទ្ធិដោយ thmeythmey.com
