អន្តរជាតិ
ភ្លើងឆេះមន្ទីរពេទ្យសម្លាប់មនុស្ស២៤នាក់នៅអារ៉ាប៊ី សាអូឌីត 25, Dec 2015 , 3:45 pm
× មនុស្ស២៤នាក់បានស្លាប់និងប្រហែល ១២៣នាក់ទៀតបានរងរបួស ដោយសារករណីភ្លើងឆេះមន្ទីរពេទ្យមួយនៅភាគនិរតីប្រទេសអារ៉ាប៊ី សាអូឌីត។ គេមិនទាន់ដឹងពីមូលហេតុដែលនាំឲ្យមានហេតុការណ៍នេះទេ តែនេះជាករណីលើកទីពីរហើយ ដែលមានមនុស្សជាច្រើនបានបាត់បង់ជីវិត ក្រោយហេតុការណ៍បាក់ដងស្ទូចកាលពីខែកញ្ញាមក។
មនុស្សយ៉ាងតិច២៣នាក់បានស្លាប់និង១២៣នាក់ទៀតបានរងរបួសក្នុងអគ្គីភ័យមួយនៅឯមន្ទីរពេទ្យក្នុងភាគនិរតីប្រទេសអារ៉ាប៊ី សាអូឌីត ។ ភ្លើងបានឆេះចេញពីបន្ទប់ ICU និងចេញពីបន្ទប់ថែទាំមាតានៃមន្ទីរពេទ្យរបស់ទីក្រុង Jazan ដែលជាតំបន់ក្រីក្របំផុតមួយរបស់អារ៉ាប៊ី សាអូឌីត។
បើតាមសាក្សីម្នាក់ដែលស្ថិតនៅក្បែរកន្លែងកើតហេតុ ការឆេះនេះបណ្ដាលមកពីឆ្លងប្រព័ន្ធអគ្គីសនី ហើយភ្លើងបានបន្តឆេះរាលដាលក្នុងអាគារមន្ទីរពេទ្យតែក្នុងរយៈពេលបីនាទីប៉ុណ្ណោះ ។ ទីភ្នាក់ងារការពារស៊ីវិលបានបញ្ចេញរូបភាពជាច្រើនដែលបានបង្ហាញពីផ្សែងហុយទ្រលោមនិងអណ្ដាតភ្លើងដែលបានបំផ្លាញផ្នែកខាងក្នុងអាគារមន្ទីរពេទ្យ ។ ហើយគេឃើញក្រុមអ្នកជួយសង្គ្រោះបានប្រើជណ្ដើរដើម្បីចូលទៅក្នុងអាគារ។
ហេតុការណ៍ខាងលើនេះបានបង្កឲ្យមានការរិះគន់យ៉ាងខ្លាំងជុំវិញបញ្ហាស្តង់ដាសុវត្ថិភាពនៅក្នុងរាជាណាចក្រមួយនេះ ។ អ្នកប្រើប្រាស់បណ្ដាញសង្គម Twitter បានរិះគន់ថា ភ្លើងឆេះនេះបណ្ដាលមកពីការធ្វេសប្រហែសរបស់មន្ត្រីអារ៉ាប៊ីសាអូឌីត។ អ្នករាយការណ៍ព័ត៌មានតំបន់ al-Ekhbariya បានអះអាងថា ទ្វារចេញបន្ទាន់របស់មន្ទីរពេទ្យបានចងជាប់ជាមួយច្រវ៉ាក់ ហើយថា មន្ទីរពេទ្យនេះក៏ធ្លាប់ទទួលការព្រមានពីបញ្ហាសុវត្ថិភាពផងដែរ។
យ៉ាងណាក៏ដោយ ប្រធានកិច្ចការសុខភាពប្រចាំតំបន់លោក Ahmed al-Sahli បានបដិសេធការចោទប្រកាន់ទាំងនេះ។ លោក al-Sahli បានបញ្ជាក់ថា មានមនុស្សជាច្រើនបានរត់ចេញទាន់ពេលវេលាតាមរយៈទ្វារដែលបានបើក ហើយឧបករណ៍សង្គ្រោះបន្ទាន់ក៏មាននៅកន្លែងកើតហេតុដែរ។
នេះគឺជាគ្រោះមហន្តរាយមួយទៀត ក្រោយហេតុការណ៍បាក់រលំដងស្ទូចកាលពីខែកញ្ញាកន្លងទៅ ។ ពេលនោះ មន្ត្រីអារ៉ាប៊ី សាអូឌីតបានរាយការណ៍ថា មនុស្សយ៉ាងតិច៧៦៩នាក់បានស្លាប់ តែចំនួននេះមានការកើនឡើងបើតាមទិន្នន័យរបស់ប្រទេសនៃជនរងគ្រោះ៕
© រក្សាសិទ្ធិដោយ thmeythmey.com