អន្តរជាតិ
ភាសាវៀតណាមកាន់តែពេញនិយមខ្លាំងនៅកោះតៃវ៉ាន់ 28, Dec 2015 , 3:27 pm
× ប្រជាជនតៃវ៉ាន់សម្លឹងឃើញសារសំខាន់នៃការសិក្សាភាសាប្រទេសអាស៊ាន មានថៃ ឥណ្ឌូនេស៊ី និងវៀតណាមជាដើម ប៉ុន្តែគេឃើញសិស្សតៃវ៉ាន់កាន់តែច្រើននាំគ្នារៀនភាសាវៀតណាម។ ពួកគេគិតថាវាជារឿងចាំបាច់ដែលត្រូវរៀនវៀតណាមព្រោះ វៀតណាម ចិន និងតៃវ៉ាន់មានវប្បធម៌ ប្រពៃណីប្រហាក់ប្រហែលគ្នា ។
ការសិក្សាភាសាវៀតណាមនៅតាមសាកលវិទ្យាល័យតៃវ៉ាន់ចាប់ផ្តើមមានប្រជាប្រិយភាពខ្លាំងក្នុងរយៈពេលចុងក្រោយនេះ។ មិនត្រឹមតែភាសាវៀតណាមទេដែលពេញនិយម ភាសាសមាជិកអាស៊ានមានថៃ ឥណ្ឌូនេស៊ីជាដើមក៏កាន់តែពេញនិយមដូចគ្នា។ ក្នុងរយៈពេល ១០ឆ្នាំចុងក្រោយចំនួនសិស្សរៀនភាសាអាស៊ាននៅតៃវ៉ាន់កើនឡើងរហូតដល់ ២០ដងឯណោះ។
សិស្សតៃវ៉ាន់ដែលរៀនភាសាវៀតណាមបានអះអាងថា វាជារឿងចាំបាច់ដែលត្រូវរៀនភាសាអាស៊ានជាពិសេសភាសាវៀតណាម ព្រោះវៀតណាម ចិន និងតៃវ៉ាន់សុទ្ធតែមានប្រពៃណី និងវប្បធម៌ប្រហាក់ប្រហែលគ្នា។ ម្យ៉ាងបណ្តាប្រជាជនតៃវ៉ាន់ក៏មើលឃើញពីប្រយោជន៍និងសក្តានុពលនៃទីផ្សារវៀតណាម និងតំបន់អាស៊ានទាំងមូលផងដែរ។
យោងតាម Channel News Asia សិស្សម្នាក់បានពន្យល់ពីមូលហេតុដែលខ្លួនរៀនភាសាវៀតណាមថា៖« នៅប្រទេសវៀតណាមបច្ចុប្បន្នមានសាលាតៃវ៉ាន់ច្រើនកំពុងដំណើរការ។ ខ្ញុំចង់រៀនភាសាវៀតណាម ហើយខ្ញុំរំពឹងអាចទទួលបានការងារជាគ្រូបង្រៀនភាសានៅទីនោះ»។
តាំងពីពេលដែលមេដឹកនាំអាស៊ានព្រមរួមគ្នាបង្កើតសហគមន៍សេដ្ឋកិច្ចមួយរួមគ្នាពឹងផ្អែកលើការផលិត មានលំហួរទំនិញ កម្លាំងពលកម្ម វិនិយោគ សេវាកម្មជាដើម ដែលនឹងចេញជារូបរាងដើមឆ្នាំ ២០១៦ អាស៊ានក្លាយជាតំបន់ដែលទាក់ទាញនិងស្ថិតក្នុងចំណាប់អារម្មណ៍ពិភពលោកទាំងមូល។
តាមពិតទៅ ប្រទេសចិន ជាទិសដៅលេខរៀងទី១ សម្រាប់អ្នកវិនិយោគ និងប្រជាជនតៃវ៉ាន់ ប៉ុន្តែអាស៊ាន ចាប់ផ្តើមក្លាយជាទិសដៅទាក់ទាញប្រជាជននិងអ្នកវិនិយោគតៃវ៉ាន់ខ្លាំងដែរ។
យ៉ាងណាមិញ ដោយសារបញ្ហាមួយចំនួនដូចជាអត្រាភាពក្រីក្រ និងបញ្ហាតម្លៃកម្លាំងពលកម្មនៅតំបន់អាស៊ាន ទើបបានជាអ្នកជំនួញតៃវ៉ាន់ពិបាកចាកចេញពីប្រទេសចិនដើម្បីទៅបណ្តាទុនរកស៊ីនៅក្នុងតំបន់អាស៊ាន។ តែក្នុងពេលដែលប្រទេសសមាជិកអាស៊ានចាប់ផ្តើមបើកព្រំដែនស្វាគមន៍សមាហរណកម្មសេដ្ឋកិច្ច ក្រុមហ៊ុនតៃវ៉ាន់ប្រហែលជាអាចមានលទ្ធភាពចូលប្រឡូកក្នុងទីផ្សារអាស៊ានកាន់តែជិតស្និទ្ធថែមទៀត៕
Tag:
តៃវ៉ាន់
វៀតណាម
អាស៊ាន
© រក្សាសិទ្ធិដោយ thmeythmey.com