ជាតិ
សង្គមជាតិ
សមត្ថកិច្ចចាប់ខ្លួនអ្នកគំរាមសម្លាប់សម្ដេច ហ៊ុន សែន តាមហ្វេសប៊ុក 08, Jan 2016 , 9:05 am
![រូបពីហ្វេសប៊ុកលោក ផែង វណ្ណៈ](https://image.thmeythmey.com/pictures/2016/01/08/thumb2/81201692233123.jpg)
រូបពីហ្វេសប៊ុកលោក ផែង វណ្ណៈ
×![]()
សមត្ថកិច្ច បានចាប់ខ្លួនជនសង្ស័យម្នាក់នៅខេត្តកំពង់ធំ កាលពីថ្ងៃទី៦ មករា ដែលបានគំរាមសម្លាប់សម្ដេចនាយករដ្ឋមន្ត្រី ហ៊ុន សែន តាមបណ្ដាញហ្វេសប៊ុក។
ស្នងការរងខេត្តកំពង់ធំ លោក ជូ សំអាន បានបញ្ជាក់ថា សមត្ថកិច្ចបានចាប់ខ្លួនជនសង្ស័យម្នាក់នោះ ដែលបានប្រើគណនីហ្វេសប៊ុកដោយដាក់ឈ្មោះក្លែងក្លាយ ខុសពីឈ្មោះពិតរបស់ខ្លួនដើម្បីជេរប្រមាថ និងគំរាមសម្លាប់នាយករដ្ឋមន្ត្រី ហ៊ុន សែន។ លោក ជូ សំអាន បានបន្ថែមថា ក្រោយពីសមត្ថកិច្ចបាននាំខ្លួនមកសាកសួរចម្លើយរួចមក ជនសង្ស័យម្នាក់នោះ ពិតជាបានសារភាពថា ខ្លួនបានជេរប្រមាថដល់អាយុជីវិតសម្ដេច ហ៊ុន សែន មែន។
ថ្លែងប្រាប់សារព័ត៌មានថ្មីៗ នៅព្រឹកនេះ ស្នងការរងខេត្តកំពង់ធំរូបនេះ បានបញ្ជាក់យ៉ាងដូច្នេះថា៖«យើងបានចាប់ខ្លួននាំមកសួរចម្លើយ ហើយជនសង្ស័យនោះពិតជាបានសារភាពខ្លួនបានសរសេរជេរប្រមាថអាយុជីវិតសម្ដេចហ៊ុន សែន មែន»។
លោក ជូ សំអាន អះអាងថា ការចាប់ខ្លួនជនសង្ស័យនេះ គឺមិនមានការបង្គាប់បញ្ជាពីប្រមុខរដ្ឋាភិបាលនោះទេ ពោលគឺសមត្ថកិច្ចអនុវត្តតាមនីតិវិធីខ្លួន ដើម្បីការពារថ្នាក់ដឹកនាំប្រទេស។ បើតាមលោក ជូ សំអាន នៅពេលនេះសមត្ថកិច្ចខេត្តកំពង់ធំ បានបញ្ជូនខ្លួនជនសង្ស័យនោះ មកអគ្គស្នងការនគរបាលរាជធានីភ្នំពេញហើយ ដើម្បីសាកសួរចម្លើយបន្ថែមទៀត ។ លោកថា ក្រោយពីសាកសួររួចសមត្ថកិច្ច នឹងឲ្យជនសង្ស័យនោះធ្វើលិខិតសុំទោសលោកនាយករដ្ឋមន្ត្រី ហើយនឹងដោះលែងឲ្យរូបគេមានសេរីភាពឡើងវិញ៕
© រក្សាសិទ្ធិដោយ thmeythmey.com