អន្តរជាតិ
ក្រុងប៉េកាំងចាប់ផ្ដើមវាយប្រហារលើប្រធានាធិបតីថ្មីតៃវ៉ាន់ 29, May 2016 , 8:39 pm
![លោកស្រី Tsai Ing-wen ប្រធានាធិបតីថ្មីរបស់កោះតៃវ៉ាន់](https://image.thmeythmey.com/pictures/2016/05/29/thumb2/tsai_ing-wen.jpg)
លោកស្រី Tsai Ing-wen ប្រធានាធិបតីថ្មីរបស់កោះតៃវ៉ាន់
×![]()
មិនបានប៉ុន្មានក្រោយការការកាន់តំណែងរបស់លោកស្រី Tsai Ing-wen ក្រុងប៉េកាំងបានចាប់ផ្ដើមវាយប្រហារលើប្រធានាធិបតីស្ត្រីរូបនេះទៅហើយ។ ក្រុងប៉េកាំងបានវាយប្រហារលើបញ្ហាផ្ទាល់ខ្លួនរបស់លោកស្រី Tsai ជាពិសេសលើបញ្ហាគ្រួសាររបស់លោកស្រី ដោយសារលោកស្រីនៅលីវ។
តាមរយៈសារព័ត៌មានរដ្ឋចិន មន្ត្រីចិនបានផ្ដើមការរិះគន់លើប្រធានាធិបតីស្ត្រីតៃវ៉ាន់លោកស្រី Tsai Ing-wen ដែលទើបតែស្បថចូលកាន់តំណែង។ មន្ត្រីទាំងនោះចាត់ទុកលោកស្រី Tsai ជាមនុស្សប្រើអារម្មណ៍ច្រើន និងពឹងផ្អែកលើចំណាត់ដែលខ្លាំងហួសហេតុ ព្រោះលោកស្រីមិនទាន់រៀបការនោះទេ។
ក្នុងសំណេរដែលចេញផ្សាយលើ International Herald Leader នៅថ្ងៃទី២៣ ខែឧសភា លោក Wang Weixing សមាជិកសមាគមទំនាក់ទំនងច្រកសមុទ្រតៃវ៉ាន់ បានឲ្យដឹងថា៖«ជាអ្នកនយោបាយស្ត្រីដែលនៅលីវ លោកស្រី Tsai មិនមានអារម្មណ៍ស្រលាញ់លើគ្រួសារ កូនចៅអ្វីទេ ហើយយុទ្ធសាស្ត្រនយោបាយលោកស្រីនឹងផ្ដោតលើអារម្មណ៍ បុគ្គលភាព និងភាពដាច់ណាត់»។
ក្រៅពីសរសេរវាយប្រហារបុគ្គលភាពលោកស្រី Tsai លោក Wang ក៏ចោទប្រកាន់របស់ប្រធានាធិបតីស្ត្រីថា មានទំនាក់ទំនងជិតស្និទ្ធជាមួយកងកម្លាំងជប៉ុនក្នុងពេលសង្គ្រាមលោកលើកទីពីរ។ បើតាមកាសែត South China Morning Post លោក Wang និយាយថា ប្រវត្តិអតីតកាលនិងការយល់ឃើញចំពោះអាណានិគមជប៉ុនរបស់គ្រូសារលោកស្រីTsai គឺខុសគ្នាពីអារម្មណ៍ប្រជាជនទាំងពីរខាង ដែលស្អប់និងងើបឡើងប្រឆាំងនឹងជប៉ុន។
លើសពីនេះ លោក Wang បានបន្តវាយប្រហារលោកស្រីTsai អះអាងថា លោកស្រីជាមនុស្សដែលគ្មានទំនុកចិត្ត ព្រោះលោកស្រីធំធាត់ក្នុងគ្រួសារដែលឪពុកមានប្រពន្ធចុង។ លោកក៏បានព្រមានអ្នកនយោបាយ ឲ្យប្រុងប្រយ័ត្ននឹងលោកស្រីTsai ដោយលោកនិយាយថា ប្រធានាធិបតីស្ត្រីតៃវ៉ាន់រូបនេះនឹងងាកទៅរកឯករាជ្យ ដោយប្រើវិធីទុច្ចរឹត ដែលនោះនឹងនាំឲ្យក្រុងប៉េកាំងធ្វើសកម្មភាពឆ្លើយតបមិនខាន។
សូមរម្លឹកដែរថា ក្រុងប៉េកាំងមិនសូវជាសប្បាយចិត្តនឹងការឡើងកាន់អំណាចរបស់លោកស្រី Tsai Ing-wen នោះទេ។ ជាពិសេសទៅទៀតនោះ លោកស្រីមិនបានប្រើពាក្យ «ព្រមព្រៀង» ទេ នៅពេលដែលលោកស្រីនិយាយដល់ «ការព្រមព្រៀងឆ្នាំ១៩៩២» ដែលរឿងនេះធ្វើឲ្យប៉េកាំងកាន់តែមិនសប្បាយចិត្ត និងគំរាមផ្ដាច់ការចរចាទៀតផង។
«ការព្រមព្រៀងឆ្នាំ១៩៩២» សំដៅដល់ជំនួបឆ្នាំ១៩៩២ រវាងមន្ត្រីថ្នាក់កណ្ដាលតំណាងសាធារណរដ្ឋប្រជាមានិតចិន (ចិនដីគោក) និងសាធារណរដ្ឋចិន (តៃវ៉ាន់) ដែលជំនួបនោះនាំឲ្យមានកិច្ចព្រមព្រៀង ដែលទទួលស្គាល់នយោបាយ «ចិនតែមួយ»។ ប៉ុន្តែគណបក្សប្រជាធិបតេយ្យជឿនលឿនរបស់លោកស្រី Tsai Ing-wen បានបដិសេធថា មិនដែលមានការព្រមព្រៀងគ្នាបែបនេះទេ៕
© រក្សាសិទ្ធិដោយ thmeythmey.com