អន្តរជាតិ
នយោបាយអន្តរជាតិ
លោកស្រី យីងឡាក់ នៅតែមិនអាចចេញក្រៅប្រទេសបាន ទោះបីរបបសឹក ដកបម្រាមក៏ដោយ
30, May 2016 , 5:30 pm
×![]()
រដ្ឋាភិបាលរបបសឹកថៃ សម្រេចដកបម្រាមនៃការធ្វើដំណើរទៅក្រៅប្រទេសលើអ្នកនយោបាយ និង ក្រុមសកម្មជនមួយចំនួនដើម្បីបង្ហាញពីលក្ខណៈល្អប្រសើរនៃស្ថានភាពនយោបាយ និងសិទ្ធិមនុស្ស។ តែបម្រាមនោះ នៅតែបន្តអនុវត្តទៅលើជនទាំងឡាយដែលកំពុងតែស្ថិតនៅក្នុងការចោទប្រកាន់ដែល រួមបញ្ចូលទាំងអតីតនាយករដ្ឋមន្ត្រីថៃ លោកស្រី យីងឡាក់ ស៊ីនណាវ៉ាត់ត្រា។
ក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ថៃ ដែលមាននាយករដ្ឋមន្ត្រីលោក ឧត្តមសេនីយ៍ប្រាយុទ្ធ ច័ន្ទ អូចាជាប្រធាន នៅថ្ងៃទី២៩ ខែឧសភា ម្សិលមិញ បានព្រមព្រៀងក្នុងការដកចេញនូវការហាមឃាត់ការធ្វើដំណើរទៅក្រៅប្រទេសលើក្រុមអ្នកនយោបាយ និងសកម្មជន លើកលែងតែអ្នកដែលកំពុងជាប់ពិរុទ្ធ និង ត្រូវបានហាមឃាត់ដោយតុលាការ។ នេះបើយោងតាមសារព័ត៌មាន The Nation។
អ្នកនាំពាក្យរដ្ឋាភិបាលលោកឧត្តមសេនីយ៍ Sansern Kaewkamnerd បានអះអាងថា ក្រុមប្រឹក្សាជាតិ ដើម្បីសន្តិភាព និងសណ្តាប់ នឹងប្រកាសបទបញ្ជាថ្មីនៅថ្ងៃទី០១ខែមិថុនាខាងមុខនេះ ។ លោក បញ្ជាក់ ថា បទបញ្ជាថ្មី នឹងជួយធ្វើឲ្យស្ថានភាពនៅក្នុងប្រទេសកាន់តែល្អប្រសើរ ជាពិសេស សង្គម នឹងកាន់តែ ដឹងច្បាស់ថារដ្ឋាភិបាលពិតជាយល់ដឹងពីបញ្ហារបស់ប្រទេស និងមានការត្រៀមខ្លួនរួចជាស្រេចក្នុងការស្តាប់ការរិះគន់។
យ៉ាងណាក៏ដោយជុំវិញការប្រមូលផ្តុំរបស់បក្សនយោបាយ អ្នកនាំពាក្យរូបនោះ បានអះអាងថា វា នឹងនៅតែបន្តអនុវត្តដដែល ដ្បិត ក្រុមប្រឹក្សាយល់ឃើញថា វា មិនទាន់ដល់ពេល ពោលគឺ ស្ថានភាពមិនទាន់សក្តិសម។
អ្វីគួរកត់សម្គាល់នោះ សម្រាប់អតីតនាយករដ្ឋមន្ត្រីថៃលោកស្រី យីងឡាក់ ស៊ីនណាវ៉ាត់ត្រា នៅតែមិន អាចទទួលបានផលប្រយោជន៍ពីបទបញ្ជាថ្មីនេះនោះទេ ដ្បិតលោកស្រី កំពុងតែជាប់ពីបទចោទរបស់ តុលាការ ពោលគឺ លោកស្រី នៅតែមិនអាចចេញដំណើរក្រៅប្រទេសបាននោះទេ។
សូមបញ្ជាក់ផងដែរថា ក្រោយរដ្ឋប្រហារយោធាថ្ងៃទី២២ ខែឧសភា ឆ្នាំ២០១៤ លោកឧត្តមសេនីយ៍ ប្រាយុទ្ធ ច័ន្ទ អូចា ដែលឡើងកាន់តំណែងជានាយករដ្ឋមន្ត្រីបន្ទាប់ពីព្រឹត្តិការណ៍នោះ បានប្រកាស ដាក់បម្រាមមិនឲ្យមានការប្រមូលផ្តុំ និងហាមឃាត់មិនឲ្យអ្នកនយោបាយជាពិសេសលោកស្រី យីង ឡាក់ អាចក្រៅប្រទេសបាន។ ក្តីបារម្ភរបស់របបសឹកចំពោះដំណើរក្រៅប្រទេសរបស់នាយករដ្ឋមន្ត្រី ស្រីដំបូងថៃលោកស្រី យីងឡាក់ នោះគឺ លោកស្រី នឹងលើកបញ្ហាសិទ្ធិមនុស្ស និងស្ថានភាពរបស់ថៃទៅកាន់សហគមន៍អន្តរជាតិ។
ជុំវិញករណីអតីតនាយករដ្ឋមន្ត្រីលោកស្រី យីងឡាក់ ដែរ ក្រៅពីត្រូវបានសភាហាមពីកិច្ចការនយោបាយរយៈពេល៥ឆ្នាំ ក្រោយធ្លាប់តំណែងដោយសារប្រហារយោធាថ្ងៃទី២២ខែឧសភាឆ្នាំ២០១៤ លោកស្រី ក៏ត្រូវបានតុលាការថៃចោទប្រកាន់ពីការធ្វើឲ្យបាត់បង់ប្រាក់ចំណូលជាតិក្នុងស្ថាប័នអង្ករជាតិថៃពីបទប្រព្រឹត្តអំពើពុករលួយផងដែរ។ បទចោទនេះដែរ ធ្វើឲ្យលោកស្រី ត្រូវប្រឈមនឹងទោសពន្ធនាគារយ៉ាងតិច១០ឆ្នាំ និង សំណងរដ្ឋប្បវេណីជាច្រើនលានបាតផងដែរ៕
Tag:
របបសឹកថៃ
ថៃ
អាស៊ាន
© រក្សាសិទ្ធិដោយ thmeythmey.com
