​កុមារា Medansh Mehta បានបង្ហាញ​ហ្គេម​ឈ្មោះថា « Let There Be Light» ទៅកាន់​សិស្ស​រចនា​កម្មវិធី និង​បង្កើត​ហ្គេម ដែលមាន​ការចូលរួម​ដោយផ្ទាល់​ពី​នាយក​ប្រតិបត្តិ Microsoft លោក Satya Nadella ក្នុងពេលដែល​លោក​បំពេញ​ទស្សនកិច្ច​ទៅកាន់​ប្រទេស​ឥណ្ឌា​នាពេល​ថ្មីៗ​នេះ​។ 
 

​ក្នុង​កិច្ចសម្ភាសន៍​ជាមួយនឹង​ភ្នាក់ងារ​ព័ត៌មាន CNBC កុមារា  បាន​បញ្ជាក់ថា ហ្គេម​របស់គេ ផ្តោត​សំខាន់​លើ​តុល្យភាព​នៃ​ការអភិវឌ្ឍ និង​បរិស្ថាន ដើម្បី​ចៀសវាង​ពី​ការបំពុល​បរិ​យាស និង​ធានា​ឲ្យ​បាន​នូវ​ការអភិវឌ្ឍន៍​ប្រកបដោយ​និរន្តរភាព​។  កុមា​រវ័យ​៨​ឆ្នាំ​នោះ ពន្យល់ថា អ្នកលេង​ហ្គេម « Let There Be Light»  ត្រូវ​សាងសង់​ទីក្រុង​ដែលមាន​រោងចក្រ រួម​ជាមួយនឹង​កសិដ្ឋាន​ផងដែរ​។ 
 

​អ្វីដែល​គួរ​ឲ្យ​កោតសរសើរ​នោះ កុមារា Medansh Mehta បាន​ឆ្លើយ​នឹង​សំណួរ​របស់​ភ្នាក់ងារ​ព័ត៌មាន​ជាមួយនឹង​ការប្តេជ្ញាចិត្ត​ប្រកបដោយ​ភាពជឿជាក់ ដែល​ទាក់ទង​នឹង​ក្តី​សុ​បិ​ន្ត​របស់គេ​ដែល​បាន​ប្រា​ប់លោក Satya Nadella ថា គេ​ចង់​ក្លាយជា​នាយក​ប្រតិបត្តិ​របស់ Microsoft​។ 
 

​ភ្នាក់ងារ​ព័ត៌មាន បាន​សួរថា «​តើ​ប្អូន​គិតថា ប្អូន​ពិតជា​អាច​ក្លាយជា​នាយក​ប្រតិបត្តិ​របស់ Microsoft​បាន​ឬទេ​?» កុមារា​នោះ បាន​ឆ្លើយថា​៖ «​ប្រាកដ​ណាស់ ខ្ញុំ​អាច​ព្យាយាម​ធ្វើ​វា​បាន​។ បើ​ព្យាយាម​ធ្វើ​អ្វីមួយ​ដោយ​ម៉ឺងម៉ាត់ និង​មាន​សេចក្តីទុកចិត្ត យើង​នឹង​សម្រេច​វា​បាន​ជាក់​ជាពុំខាន​»៕