អន្តរជាតិ
អូបាម៉ា៖ ចង់មានភាពគួរសមក្នុងនយោបាយ កុំបោះឆ្នោតឲ្យមនុស្សដូចដូណាល់ ត្រាំ 02, Jun 2016 , 8:19 pm
![](https://image.thmeythmey.com/pictures/2016/06/02/thumb2/barack-obama-donald-trump-.jpg)
×![]()
លោក បារ៉ាក់ អូបាម៉ា ពន្យល់ថាមូលហេតុដែលបណ្តាលឲ្យបេក្ខជនប្រធានាធិបតីបក្សសាធាណរដ្ឋ ដូណាល់ ត្រាំ កើនឡើងប្រជាប្រិយភាពខ្លាំងពេលឃោសនាបោះឆ្នោតនេះគឺមកពីបញ្ហាសេដ្ឋកិច្ច។ ថ្វីបើលោក អូបាម៉ា ប្រឹងប្រែងច្រើនកន្លងមកដើម្បីស្តារសេដ្ឋកិច្ច មិនមែនមនុស្សគ្រប់គ្នាសុទ្ធតែបានប្រយោជន៍ឡើយ។
ហើយអ្នកគាំទ្រសេដ្ឋី ដូណាល់ត្រាំ ភាគច្រើនជាប្រជាជនវណ្ណៈកណ្តាលនិងវណ្ណៈទាបដែលពួកគេជាជនរងគ្រោះនៃវិបត្តិសេដ្ឋកិច្ចឆ្នាំ ២០០៨ មកនោះ។ លោកក៏ឆ្លៀតទិតៀន ដូណាល់ ត្រាំ ដែរដោយលោកថ្លែងថា ប្រជាជនអាមេរិកគួរបោះឆ្នោតឲ្យអ្នកនយោបាយដែលមានភាពគួរសម និយាមសមហេតុផលមានអំណះអំណាងត្រឹមត្រូវ មិនមែនមនុស្សនិយាយឲ្យតែរួចពីមាត់និង មានសម្តីឈ្លើយទ្រគោះបក់បោកឡើយ។
សូមស្តាប់ការបកស្រាយរបស់លោក សៅ ផលនិស្ស័យ៖
«ឈប់ធ្វើជំនួញជាមួយចិន, បណ្តេញជនអន្តោប្រវេសន៍ចេញ និងកសាងជញ្ជាំងព័ទ្ធជុំវិញអាមេរិកហើយឲ្យមិចស៊ីកូចេញលុយ» សុទ្ធតែជាគោលនយោបាយលោក ដូណាល់ ត្រាំ ដែលទាក់ទាញការគាំទ្រពីសំណាក់ប្រជាជនវណ្ណៈកណ្តាលនិងវណ្ណៈទាបខ្លាំងកន្លងមកក្នុងការឃោសនាបោះឆ្នោត។ នេះក៏ដោយសារប្រជាជនទាំងនោះសុទ្ធតែជាអ្នករងគ្រោះដោយសារបញ្ហាសេដ្ឋកិច្ច ដែលបង្កើតឲ្យមានអត្រាគ្មានការងារធ្វើខ្ពស់និងបញ្ហាសង្គមផ្សេងទៀតច្រើនចាប់តាំងពីវិបត្តិសេដ្ឋកិច្ចសកលកើតឡើងឆ្នាំ ២០០៨ ។
១. បារ៉ាក់ អូបាម៉ា ៖ ដូណាល់ ត្រាំ វាយចំចំណុចរសើប តែគ្មាននយោបាយជាក់លាក់
លោក បារ៉ាក់ អូបាម៉ា ក៏យល់ស្រដៀងគ្នាថា បញ្ហាសេដ្ឋកិច្ចដែលជារឿងទូទៅនោះបានជំរុញឲ្យប្រជាជនជាច្រើននាក់ងាកទៅគាំទ្រលោក ដូណាល់ ត្រាំ ព្រោះពួកគេរំពឹងថា ជីវភាពរស់នៅរបស់ពួកគេនឹងផ្លាស់ប្តូរ ហើយនយោបាយសេដ្ឋកិច្ចថ្មីនឹងជួយផ្តល់ប្រយោជន៍ដល់មនុស្សគ្រប់គ្នា។
លោក បារ៉ាក់ អូបាម៉ា ខណៈដែលកំពុងស្ថិតនៅទីក្រុង Elkhart នៃរដ្ឋ Indiana បានពន្យល់ប្រាប់អ្នកសារព័ត៌មានថា រាល់ការលើកឡើងរបស់បេក្ខជនប្រធានាធិបតីបក្សសាធារណរដ្ឋ ដូណាល់ ត្រាំ ពាក់ព័ន្ធបញ្ហាសេដ្ឋកិច្ច សុទ្ធតែដូចគ្នាទៅនឹងអ្វីដែលប្រជាជនអាមេរិកធ្លាប់លើកឡើងពីការលំបាកផ្នែកសេដ្ឋកិច្ចរបស់ពួកគេដែរ។
តាមពិតទៅទីក្រុង Elkhart នេះជាទីកន្លែងដែលឆ្លុះបញ្ជាក់ពីមរតកនៃនយោបាយសេដ្ឋកិច្ចសំខាន់មួយក្នុងនាមជាប្រធានាធិបតីរបស់លោក បារ៉ាក់ អូបាម៉ា។ នេះក៏ដោយសារវាជាទីកន្លងដែលលោកមកទស្សនកិច្ចមុនគេ នៅពេលលោកក្លាយជាប្រធានាធិបតីក្នុងឆ្នាំ ២០០៨ ពេលដែលអាមេរិកធ្លាក់យ៉ាងជ្រៅក្នុងវិបត្តិសេដ្ឋកិច្ច ហើយអាត្រាគ្មានការងារធ្វើកើនដល់១៧ភាគរយ។ បច្ចុប្បន្ននេះអត្រាអ្នកគ្មានការងារធ្វើនៅត្រឹម ៣.៨ភាគរយប៉ុណ្ណោះ។ ប៉ុន្តែ លោក អូបាម៉ា ផ្ទាល់ទទួលស្គាល់ថា បើទោះជារដ្ឋបាលលោកប្រឹងប្រែងខ្លាំងរហូតដល់សម្រេចបានផ្លែផ្កាច្រើនកន្លងមកក៏ដោយ មិនមែនពលរដ្ឋអាមេរិកគ្រប់គ្នាបានប្រយោជន៍ពីកំណើនសេដ្ឋកិច្ច និងការថយចុះនៃអត្រាអ្នកគ្មានការងារធ្វើនេះទេ។
យោងតាមសារព័ត៌មាន Huffington Post លោក អូបាម៉ា លើកឡើងថា៖« ដូណាល់ ត្រាំ ជាតួអង្គដែលទាក់ទាញជាងអ្នកនយោបាយបក្សសាធារណរដ្ឋផ្សេងទៀត។ ប៉ុន្តែរឿងរ៉ាវច្រើនយ៉ាងដែលសេដ្ឋីអចលនទ្រព្យលើកមកនិយាយនោះវាស្របទៅនឹងអ្វីដែលប្រជាជនអាមេរិកជាច្រើននិយាយពីខ្ញុំឡើយ។ ឬក៏និយាយពីរឿងទូទៅស្តីពីបញ្ហាសេដ្ឋកិច្ចដែលកើតមានឡើងកាលពីជាង ៧ឆ្នាំមុន, ១០ឆ្នាំមុន ,២០ឆ្នាំមុន ឬ៣០ឆ្នាំមុនប៉ុណ្ណោះ»។
វាប្រាកដណាស់ថា នៅពេលប្រជាជនជាច្រើនប្រឈមការលំបាកផ្នែកសេដ្ឋកិច្ច ពួកគេតែងតែចង់បានដំណោះស្រាយមួយ។ហើយវាជារឿងចៀសមិនផុតដែលពួកគេត្រូវគាំទ្រដូណាល់ ត្រាំ ពេលដែលអ្នកនយោបាយម្នាក់ផ្តល់ដំណោះស្រាយថាធ្វើដូច្នេះ ធ្វើដូច្នោះ ដូចជាសង់ជញ្ជាំងហ៊ុមព័ទ្ធអាមេរិកទប់ស្កាត់ជនអន្តោប្រវេសន៍ដើម្បីកុំឲ្យគេដណ្តើមការងារប្រជាជនអាមេរិក ឬឈប់ធ្វើពាណិជ្ជកម្មជាមួយចិនដើម្បីការពារប្រយោជន៍សេដ្ឋកិច្ចអាមេរិក។
ប៉ុន្តែ ទោះជា ដូណាល់ ត្រាំ និយាយចំៗពីបញ្ហាសេដ្ឋកិច្ច ដែលជារឿងរសើបក្នុងសង្គមអាមេរិកក៏ដោយ លោក អូបាម៉ា នៅតែមើលឃើញថា អ្នកសាធារណរដ្ឋម្នាក់នេះផ្តល់ដំណោះស្រាយនិងគោលនយោបាយដែលខ្វះភាពជាក់លាក់ និងផ្អែកលើការស្រមៃច្រើនជាងការពិត។
២.លោក អូបាម៉ា៖ ចង់ឲ្យមានភាពគួរសមក្នុងនយោបាយកុំបោះឆ្នោតឲ្យដូណាល់ ត្រាំ
ក្រៅពីពន្យល់មូលហេតុដែលបណ្តាលឲ្យអ្នកនយោបាយដូច ដូណាល់ ត្រាំ កើនឡើងប្រជាប្រិយភាពរហ័ស លោកអូបាម៉ា ក៏បានបញ្ជាក់ផងដែរថា បើសិនគ្រប់គ្នាចង់ឲ្យមានភាពគួរសមក្នុងនយោបាយ គេមិនគួរបោះឆ្នោតឲ្យអ្នកនយោបាយនិយាយឲ្យតែបាននិយាយឡើយ។ គេដឹងច្បាស់ថា លោក អូបាម៉ា លើកឡើងនេះសំដៅដល់ លោក ដូណាល់ ត្រាំ ថ្វីបើលោក អូបាម៉ារក្សាជំហរមួយដោយមិននិយាយចំៗក៏ដោយ។
លោកថា៖« អ្នកបោះឆ្នោតមានទំនួលខុសត្រូវមួយក្នុងការលើកកម្ពស់ភាពគួរសមក្នុងនយោបាយ ដោយមិនបោះឆ្នោតឲ្យអ្នកណាដែលនិយាយស្តីគ្មានអំណះអំណាង និយាយឲ្យរួចពីមាត់។ តែគេគួរបោះឆ្នោតឲ្យអ្នកណាដែលនិយាយមានហេតុផល មានអំណាងអំណាងត្រឹមត្រូវនិងសមរម្យ»។
កន្លងមកលោកក៏បានបន្ទោសប្រព័ន្ធផ្សព្វផ្សាយផងដែរ ដែលផ្តល់ការចាប់អារម្មណ៍ចំពោះលោក ដូណាល់ ត្រាំ ខ្លាំងពេក។ លោកពន្យល់បន្ថែមថា គ្រប់យ៉ាងដែលបានកើតឡើងគឺអ្នកនយោបាយទទួលបានការចាប់អារម្មណ៍កាន់តែច្រើននៅពេលដែលអ្នកនោះព្យាយាមនិយាយស្តីដោយមានកំហឹងនិងភាពគ្រោតគ្រាត។ ហើយប្រសិនជាអ្នកនិយោបាយនោះសុភាពរាបសារ និងមិនសូវនិយាយស្តីគ្មានអ្នកណាចាប់អារម្មណ៍ឬគ្មានប្រព័ន្ធផ្សព្វផ្សាយណាមួយយកទៅសរសេរឡើយ៕
© រក្សាសិទ្ធិដោយ thmeythmey.com