អន្តរជាតិ
លោក ប្រាយុទ្ធ តបនឹងការទទូចឲ្យផ្ទេរពីលោកខាងលិចថា «អាវមួយ មិនអាចពាក់បានគ្រប់គ្នាទេ» 02, Jun 2016 , 8:59 pm
× នាវេទិការបស់ក្រុមប្រទេសកំពុងអភិវឌ្ឍន៍ G77 នាយករដ្ឋមន្ត្រីថៃ លោក ប្រាយុទ្ធ ច័ន្ទ អូចា អះអាងថា លោក នឹងបន្តកាន់តំណែងរហូតដល់ប្រទេសមានសន្តិភាពពេញលេញ។ លោក ក៏បានថ្លែងរិះគន់ខ្លាំងៗ ពីការទាមទារប្រទេសលោកខាងលិចដែលទទូចឲ្យលោកផ្តល់អំណាចទៅឲ្យប្រជាជនស៊ីវិលផងដែរ។
«និយាយដោយត្រង់, ខ្ញុំ នឹងមិនទៅណានោះទេ ប្រសិនបើ ប្រទេស មិនទាន់មានសន្តិភាព និងសណ្តាប់ធ្នាប់ពេញលេញ ។ ហើយ ខ្ញុំ នឹងមិនចាកចេញនោះទេ បើទោះបីជា អ្នកស្អប់ខ្ញុំប៉ុណ្ណាក៏ដោយ»។ នេះបើយោងតាមសារព័ត៌មាន Bangkok Post ដែលបានដកស្រង់សម្តីលោកនាយករដ្ឋមន្ត្រីប្រាយុទ្ធ ច័ន្ទ អូចា នាវេទិការបស់ក្រុមប្រទេសកំពុងអភិវឌ្ឍន៍ G77។
នៅចំពោះមុខអ្នកការទូតពី១៣៤ប្រទេសកំពុងអភិវឌ្ឍន៍ នៃក្រុមG77 លោកឧត្តមសេនីយ៍ ប្រាយុទ្ធ បានឆ្លើយតបនឹងការទទូចកន្លងមករបស់ប្រទេសរីកចម្រើនលទ្ធិប្រជាធិបតេយ្យលោកខាងលិចដែលឲ្យលោកផ្ទេរអំណាចទៅប្រជាជនវិញ ថា « អាវមួយ មិនអាចពាក់បានគ្រប់គ្នានោះទេ»។
លោកនាយករដ្ឋមន្ត្រីរូបនោះ បានសង្កត់ធ្ងន់ថា យើងជាប្រទេសក្រុម G77 គួរតែមានសេរីភាពក្នុងការ ជ្រើសរើស«អាវដែលសមសក្តិនឹងប្រជាជនរបស់យើង»។
សូមជម្រាបផងដែរថា ក្រោយឡើងកាន់អំណាចបន្ទាប់ពីរដ្ឋប្រហារយោធាថ្ងៃទី២២ខែឧសភា ប្រទេស លោកខាងលិច ជាពិសេស អាមេរិក បានរិះគន់រដ្ឋាភិបាលរបបសឹកដែលដឹកនាំដោយលោកនាយករដ្ឋ មន្ត្រីប្រាយុទ្ធ ច័ន្ទ អូចាយ៉ាងខ្លាំង។ ហើយនោះក៏ព្រោះ ក្រោមការដឹកនាំរបស់របបសឹកដែលបានប្រើប្រាស់ច្បាប់អាជ្ញាសឹក និងប្រការ៤៤ដែលផ្តល់អំណាចឲ្យយោធាដឹកនាំប្រទេសបណ្តោះអាសន្ន បានរឹតត្បិតខ្លាំងលើសិទ្ធិសេរីភាពនៃការបញ្ចេញមតិ និងការជួបជុំជាដើម។
យ៉ាងណាក៏ដោយ លោក ប្រាយុទ្ធ បានបញ្ជាក់ថា អ្វីដែលលោក ធ្វើគឺដើម្បីប្រយោជន៍ប្រទេសជាតិ នោះទេ។ លោក សង្កត់ធ្ងន់ថា ការងារលើសកំណត់របស់លោក តែងតែរំខានដំណេកនៅពេលយប់ ដ្បិតលោក ត្រូវនៅបន្តការងារនៅក្នុងការិយាល័យដើម្បីពន្លឿនដំណោះស្រាយ និងការអភិវឌ្ឍសម្រាប់ប្រទេស «តែមិនមែនស្រេកឃ្លាននឹងអំណាចឡើយ»៕
Tag:
ថៃ
ប្រាយុទ្ធ ច័ន្ទ អូចា
អាស៊ាន
© រក្សាសិទ្ធិដោយ thmeythmey.com