អន្តរជាតិ
នយោបាយអន្តរជាតិ
បូស្នី ព្រមានអ្នកវក់លេងហ្គេម Pokémon Go ប្រយ័ត្នជាន់មីន 21, Jul 2016 , 7:39 am
× ហ្គេម Pokémon Go កំពុងតែរីកសាយភាយយ៉ាងខ្លាំងនៅជុំវិញពិភពលោក ដោយមានអ្នកលេងហ្គេមប្រភេទនេះ រាប់លាននាក់ទៅហើយ។ យ៉ាងណាក្ដី ហ្គេមប្រភេទថ្មីនេះ ក៏បង្កជាគ្រោះថ្នាក់ផងដែរ ប្រសិនបើមិនប្រុងប្រយ័ត្នដូចជា គ្រោះថ្នាក់ចរចរណ៍ ឬដើរធ្លាក់ទឹកជាដើម។ ចំណែកឯប្រទេសបូស្នីវិញ បានចេញសារព្រមានទៅអ្នកលេងហ្គេមនេះប្រយ័ត្នដើរចូលចំការមីន។
ជនជាតិបូស្នីដែលនិយមលេងហ្គេមកំពុងល្បីឈ្មោះ Pokémon Go ត្រូវបានព្រមានឲ្យមានការប្រុងប្រយ័ត្នខ្ពស់ និងត្រូវនៅឲ្យឆ្ងាយពីតំបន់ដែលមានមីន ដែលបន្សល់ទុកតាំងពីសង្គ្រាមឆ្នាំ១៩៨០មក។ អង្គការដោះមីនបូស្នី Posavina bez mina បានចេញសារព្រមានដូចនេះ ខណៈដែលហ្គេមប្រភេទថ្មីកំពុងតែមានប្រជាប្រិយភាពខ្លាំងនៅបូស្នី។
ដោយសារតែហ្គេម Pokémon Go តម្រូវឲ្យអ្នកលេងប្រើប្រាស់ទូរសព្ទទាំងអស់ដើរកតួអង្គនៅពិភពខាងក្រៅ គេបារម្ភថា ពួកគេអាចដើរចូលទៅតំបន់មានមីន ដែលមិនទាន់បានបំផ្ទុះចោល ខណៈដែលមនុស្សយ៉ាងតិច៦០០នាក់ បានបាត់បង់ជីវិត ដោយសារតែគ្រាប់មីន។ បើតាមសារព័ត៌មាន BBC ក្រុមដោះមីនរបស់បូស្នី ប៉ានស្មានថា មានគ្រាប់មីនយ៉ាងតិច១២ម៉ឺនគ្រាប់ ដែលនៅតែកប់ក្រោមផ្ទៃដីប្រទេសនេះ។
តាមរយៈFacebook របស់ខ្លួន អង្គការមនុស្សធម៌ Posavina bez mina បញ្ជាក់ថា៖«យើងទទួលបានព័ត៌មានថា អ្នកលេងហ្គេម Pokémon Go មួយចំនួនបានទៅកន្លែងដែលសង្ស័យថាមានគ្រាប់មីន ដើម្បីស្វែងរកPokémon»។ ជាមួយគ្នានេះ អង្គការមួយនេះ ក៏បានទទូចឲ្យប្រជាជនទាំងអស់ ឈប់ធ្វើសកម្មភាពដូចនេះ និងត្រូវគោរពសញ្ញាគ្រោះថ្នាក់ ក៏ដូចជាមិនត្រូវចូលតំបន់ដែលមិនស្គាល់ឡើយ។
សូមបញ្ជាក់ថា ខណៈដែលហ្គេម Pokémon Go កំពុងតែល្បីល្បាញពេញពិភពលោកនោះ គ្រោះថ្នាក់ជាច្រើន ក៏បានកើតឡើងព្រមជាមួយគ្នាផងដែរ។ នៅសប្ដាហ៍មុន ជនជាតិអាមេរិកពីរនាក់ រស់នៅរដ្ឋ Florida ត្រូវបានម្ចាស់ផ្ទះបាញ់សម្លាប់ ដោយច្រលំថាជាចោរគាស់ផ្ទះ បន្ទាប់ពីពួកគេចូលផ្ទះខាងលើ៕
© រក្សាសិទ្ធិដោយ thmeythmey.com