កីឡាជាតិ
ជាតិ
ចាន់ វឌ្ឍនាកា ជួយឲ្យបឹងកេតឈានកាន់តែកៀកសម្រាប់ការលើកពានរដូវកាលនេះ 15, Aug 2016 , 2:02 pm
× ខ្សែប្រយុទ្ធវ័យក្មេងរបស់បឹងកេតអង្គរ ចាន់ វឌ្ឍនាកា បានជួយឲ្យក្រុមបឹងកេតអង្គរឈានកាន់តែកៀកសម្រាប់សម្រេចគោលបំណងលើកពានលីកកំពូលកម្ពុជាប្រចាំឆ្នាំ២០១៦ បន្ទាប់ពីរូបគេរកបាន៣គ្រាប់ម្នាក់ឯង ដើម្បីជួយជួយឲ្យក្រុមបឹងកេតយកឈ្នះភ្នំពេញក្រោន ៣-២ កាលពីកាលពីម្សិលមិញនៅពហុកីឡដ្ឋានជាតិ។ ចំណែកវេស្ទើនភ្នំពេញស្គាល់ជ័យជម្នះជាលើកដំបូង បន្ទាប់ពីយកឈ្នះអាស៊ីអឺរ៉ុប ២-១ កាលពីម្សិលមិញផងដែរ។
សម្រាប់ការប្រកួតយ៉ាងស្វិតស្វាញកាលពីម្សិលមិញនៅពហុកីឡដ្ឋានជាតិ ខ្សែប្រយុទ្ធជនជាតិកូរ៉េខាងជើង បានសម្រេចគ្រាប់បាល់នាំមុខ ១-០ សម្រាប់ភ្នំពេញក្រោននៅនាទីទី៥។ ប៉ុន្តែតាមរយៈការវាយបកលឿនៗរបស់បឹងកេតអង្គរខ្សែប្រយុទ្ធដ៏ឆ្នើម ចាន់ វឌ្ឍនាកា សម្រេចបាន៣គ្រាប់ម្នាក់ឯងជាប់ៗគ្នា នៅនាទី២៩, ៤៥+១ និង៥៤ ដើម្បីជួយឲ្យបឹងកេតនាំមុខភ្នំពេញក្រោន ៣-១។
ការនាំមុខរបស់បឹងកេតអង្គរនេះ ធ្វើឲ្យភ្នំពេញក្រោនវាយបកសន្ធប់យ៉ាងខ្លាំង ដើម្បីដាក់សម្ពាធមកលើបឹងកេតអង្គរ និងបានបង្កើតឱកាសដើម្បីទម្លុះសំណាញ់ទីជាច្រើនលើកផងដែរ តែត្រូវបានសង្គ្រោះដោយអ្នកចាំទីបឹងកេតអង្គរ ស៊ូ យ៉ាទី។ ភ្នំពេញក្រោននៅតែបន្តដាក់សម្ពាធមកលើបឹងកេត បានតាយរយៈការបង្កើតឱកាសនៅតំបន់គ្រោះថ្នាក់របស់បឹងកេត និងបានស៊ុតចំបង្គោលទី និងរបាទីរបស់បឹងកេតចំនួនពីរគ្រាប់ជាបន្តបន្ទាប់ របស់ខ្សែប្រយុទ្ធភ្នំពេញក្រោន។
ចំណែកបឹងកេតអង្គរ ក៏ធ្វើការវាយបកយ៉ាងលឿនផងដែរ ការវាយបកនេះហាក់ផ្តល់ឱកាសឲ្យខ្សែប្រយុទ្ធភ្នំពេញក្រោន កែវ សុខផេង សម្រេចបានមួយគ្រាប់បន្ថែមសម្រាប់ក្រុមដើម្បីតាមបឹងកេតអង្គរ ៣-២ នៅនាទី៨២។ ក្រុមទាំងពីរនៅតែបន្តការវាយបកដាក់គ្នាទៅវិញទៅមក ក៏ប៉ុន្តែពុំមានការស៊ុតបាល់បញ្ចូលទីគ្នានោះទេរហូតចប់តង់ទី២ ជាលទ្ធផលក្រុមបឹងកេតអង្គរបានយកឈ្នះភ្នំពេញក្រោន ៣-២។
ជ័យជម្នះរបស់បឹងកេតអង្គរលើភ្នំពេញក្រោននេះ ធ្វើឲ្យបឹងកេតអង្គរទទួលបាន៣ពិន្ទុបន្ថែម សម្រាប់បន្តឈរលេខ១ ក្នុងតារាងពានរង្វាន់លីកកំពូលកម្ពុជាក្នុងសប្តាហ៍ទី១៦។ លើសពីនេះ នាំឲ្យបឹងកេតអង្គរបន្តមានប្រៀប លើក្រសួងការពារជាតិ ក្នុងការប្រជែងលើកពានរដូវកាល២០១៦នេះ ដោយមាន៤១ពិន្ទុ ខណៈក្រសួងការពារជាតិមាន៤០ពិន្ទុ។
ការសម្រេចបាន៣គ្រាប់ជាបន្តបន្ទាប់របស់ខ្សែប្រយុទ្ធវ័យក្មេង ចាន់ វឌ្ឍនាកា មានន័យថាខ្សែប្រយុទ្ធរូបនេះ បានជួយឲ្យក្រុមបឹងកេតអង្គរឈានកាន់តែកៀក សម្រាប់ការសម្រេចគោលបំណងលើកពានក្នុងរដូវកាល ២០១៦ នេះ ពោលគឺក្រុមនេះ សល់តែពីរប្រកួតទៀតតែប៉ុណ្ណោះ ដោយលើកទី១ក្រុមនេះត្រូវជួបប្រកួតជាមួយព្រះខ័នរាជស្វាយរៀង និងលើកទី២ជាមួយអគ្គស្នងការនគរបាលជាតិ។ វឌ្ឍនាកា មិនត្រឹមតែជួយក្រុមឈានកាន់តែកៀកសម្រាប់ការលើកពានប៉ុណ្ណោះទេ ថែមទាំងជួយខ្លួនឯងឈានកាន់តែកៀកសម្រាប់ពានរង្វាន់ស្បែកជើងមាសទៀតផង ដោយបច្ចុប្បន្នរូបគេមាន២១គ្រាប់ខ្ពស់ជាងគេ។
ដោយឡែក នាជំនួបនៅកីឡដ្ឋានវេស្ទើនកាលពីម្សិលមិញ ក្រុមម្ចាស់ផ្ទះវេស្ទើនភ្នំពេញ បានយកឈ្នះក្រុមអាស៊ីអឺរ៉ុប ២-១ ផងដែរ ហើយការឈ្នះនេះធ្វើឲ្យវេស្ទើនស្គាល់ជ័យជម្នះជាលើកដំបូង និងបានជួយឲ្យក្រុមវេស្ទើន ឡើងទៅឈរនៅលេខរៀងទី៩ ដោយមាន៧ពិន្ទុ ចំណែកអាស៊ីអឺរ៉ុប ធ្លាក់ទៅឈរបាតតារាងដោយមានមាន៦ពិន្ទុ។
គួរបញ្ជាក់ថា សម្រាប់ការប្រកួតកាលពីថ្ងៃទី១៣ ខែសីហា កន្លងទៅនេះ ក្រុមក្រសួងការពារជាតិ បានយកឈ្នះលើក្រុមព្រះខ័នរាជស្វាយរៀង ២-១ នៅកីឡដ្ឋានកងយោធពលខេមរភូមិន្ទ រីឯណាហ្គាវើល បានលត់ក្រុមស៊ីម៉ាក់ ៤-១ នៅពហុកីឡដ្ឋានជាតិ មុនក្រុមខេមបូឌានថាយហ្គឺរ យកឈ្នះក្រុមអគ្គស្នងការនគរបាលជាតិ ២-១ នៅពហុកីឡដ្ឋានជាតិដូចគ្នា៕
Tag:
ចាន់ វឌ្ឍនាកា
បឹងកេតអង្គរ
Cambodian League 2016
© រក្សាសិទ្ធិដោយ thmeythmey.com