ជាតិ
ក្រសួងធនធានទឹក៖ ភ្លៀងនៅតែបន្តធ្លាក់ពីតិចទៅច្រើន ស្ទើរគ្រប់តំបន់ 01, Sep 2016 , 8:39 pm
× ក្រសួងធនធានទឹក និងឧតុនិយម បានជូនដំណឹងបន្ថែមពីការព្យាករណ៍អាកាសធាតុថា ខ្យល់មូសុងនិរតីមានឥទ្ធិពលមធ្យម និងប្រព័ន្ធសម្ពាធទាប ដែលអូសកាត់លើអាងទន្លេមេគង្គ បានថមថយឥទ្ធិពល។ ចំណែកព្យុះទី១០ ឈ្មោះ LIONROCK បានធ្វើដំណើរទៅដល់ភាគខាងជើងឧបទ្វីបកូរ៉េ និងបានចុះខ្សោយឥទ្ធិពលមកជាសម្ពាធទាប។ នេះបើតាមការព្យាករណ៍អាកាសធាតុរបស់ក្រសួងធនធានទឹក។
ផ្អែកតាមការព្យាករណ៍អាកាសធាតុ របស់ក្រសួងធនធានទឹក ចាប់ពីថ្ងៃទី ០១ ដល់ថ្ងៃទី ០៦ ខែកញ្ញា ឆ្នាំ២០១៦នេះ កម្ពុជាមានការប្រែប្រួលអាកាសធាតុ ដែលបង្កឲ្យមានភ្លៀងធ្លាក់ស្ទើរគ្រប់តំបន់។ ចំពោះតំបន់មាត់សមុទ្រ អាចនឹងមានភ្លៀងធ្លាក់ពីតិចទៅបង្គួរ និងតំបន់ខ្ពង់រាប មានភ្លៀងធ្លាក់ពីបង្គួរទៅច្រើន ពិសេសខេត្តកំពង់ចាម ក្រចេះ ត្បូងឃ្មុំ និងខេត្តមណ្ឌលគិរី។
ចំណែកឯតំបន់វាលទំនាប អាចនឹងមានភ្លៀងធ្លាក់ពីតិចទៅបង្គួរ ប៉ុន្តែផ្នែកមួយចំនួននៃបណ្ដាខេត្តជុំវិញបឹងទន្លេសាប អាចបង្កឲ្យមានភ្លៀងធ្លាក់ច្រើន។
ក្រសួងធនធានទឹក បានអំពាវនាវដល់ប្រជាពលរដ្ឋ ឲ្យបង្កើនការយកចិត្តប្រុងប្រយ័ត្នខ្ពស់ ដោយសារតែស្ថានភាពអាកាសធាតុមានការប្រែប្រួល ដើម្បីជៀសវាងនូវគ្រោះថ្នាក់ផ្សេងៗកើតឡើងដោយយថាហេតុ៕
© រក្សាសិទ្ធិដោយ thmeythmey.com