ជាតិ
ឧទ្ធរណ៍បើកសវនាកាលើករណីឯកឧត្តម កឹម សុខា នៅថ្ងៃទី៤ ខែវិច្ឆិកា 29, Oct 2016 , 11:18 am
× ភ្នំពេញ៖ នៅថ្ងៃទី៤ ខែវិច្ឆិកា ឆ្នាំ២០១៦ សាលាឧទ្ធរណ៍ នឹងបើកសវនាការ លើបណ្តឹងរបស់ក្រមមេធាវី ដែលប្តឹងប្រឆាំងនឹងសេចក្តីសម្រេចរបស់សាលាដំបូងរាជធានីភ្នំពេញ។ សាលាដំបូងរាជធានីភ្នំពេញ បានកាត់ទោសឯកឧត្តម កឹម សុខា ឲ្យពន្ធនាគាររយៈពេល៥ខែ។
លោក សំ សុគង់ មេធាវីមួយរបស់ឯកឧត្តម កឹម សុខា បានប្រាប់សារព័ត៌មានថ្មីៗកន្លងមកថា លោក បានទទួលលិខិតពីសាលាឧទ្ធរណ៍រួចហើយ ទាក់ទងនឹងការបើកសវនាការ នៅពេលខាងមុន។ លោក សំ សុគង់ បញ្ជាក់ថា ក្រុមមេធាវី នឹងចូលការពារក្តីឲ្យឯកឧត្តម កឹម សុខា ទៅតាមផ្លូវច្បាប់។ យ៉ាងណា លោកមេធាវីរូបនេះ មិនអាចជម្រាបបានទេថា ឯកឧត្តម កឹម សុខា នឹងចូលរួមក្នុងសវនាការ ឬក៏អវត្តមាន។
ការបើកសវនាការនាពេលខាងមុខនេះ គឺធ្វើឡើងតាមសំណើរបស់ក្រុមមេធាវី ដែលការពារក្តីឲ្យឯកឧត្តម កឹម សុខា។ ក្រុមមេធាវី បានប្តឹងទៅសាលាឧទ្ធណ៍ ដើម្បីប្រឆាំងនឹងសាលក្រមរបស់សាលាដំបូងរាជធានីភ្នំពេញ ដែលសម្រេចឲ្យឯកឧត្តម កឹម សុខា ជាប់ពន្ធនាគាររយៈពេល៥ខែ និងពិន័យជាប្រាក់ចំនួន៨សែនរៀល ពីបទ «បដិសេធក្នុងការចូលខ្លួន» ដែលតុលាការ ចាត់ទុកថា ជាបទល្មើសជាក់ស្តែង។
ក្រុមមេធាវី យល់ថា ការសម្រេចរបស់សាលាដំបូងរាជធានីភ្នំពេញ មិនត្រឹមត្រូវទៅតាមគោលការណ៍នៃច្បាប់នោះទេ។ ក្រុមមេធាវី អះអាងទៀតថា ឯកឧត្តម កឹម សុខា ក៏មិនមានទោសកំហុស ដូចអ្វីដែលសាលាដំបូងរាជធានីភ្នំពេញ បានចោទប្រកាន់ដែរ៕
Tag:
តុលាការ
មេធាវី
កឹម សុខា
© រក្សាសិទ្ធិដោយ thmeythmey.com