អន្តរជាតិ
កូរ៉េខាងត្បូងបំពាក់មីស៊ីលលើយន្តហោះ F-16 ដែលអាចកម្ទេចទីតាំងសំខាន់ៗកូរ៉េខាងជើង 19, Dec 2016 , 11:19 pm
× ក្រសួងការពារជាតិកូរ៉េខាងត្បូងបានសម្រេចបំពាក់គ្រាប់បែកនិងមីស៊ីលរយៈចម្ងាយមធ្យមលើយន្តហោះប្រដេញ F-16 ។ អាវុធថ្មីដែលត្រូវបំពាក់លើយន្តហោះចម្បាំងនេះនឹងជួយឲ្យកងទ័ពអាកាសកូរ៉េខាងត្បូងមានសមត្ថភាពប្រយុទ្ធខ្ពស់និងអាចកម្ទេចទីតាំងសំខាន់ៗរបស់ក្រុងព្យុងយ៉ាងផងដែរ។
ថ្ងៃ ១៩ ធ្នូនេះ ទីភ្នាក់ងារព័ត៌មានកូរ៉េខាងត្បូង Yonhap បានចុះផ្សាយថា យន្តហោះចម្បាំង F-16 របស់កូរ៉េខាងត្បូងទទួលបានការបំពាក់សព្វាវុធថ្មីដើម្បីបង្កើនសមត្ថភាពប្រយុទ្ធ។ យន្តហោះនេះត្រូវបានបំពាក់ដោយគ្រាប់បែក និងមីស៊ីលរយៈចម្ងាយមធ្យម ដែលវាអាចបាញ់កម្ទេចទីតាំងសំខាន់ៗនៅកូរ៉េខាងជើងផងដែរ។
បើតាមការដឹងពីសំណាក់កងទ័ពអាកាសក្រុងសេអ៊ូល មីស៊ីកបាញ់ពីលើអាកាស AIM-120 ត្រូវបានគេបំពាក់លើយន្តហោះចម្បាំង F-16 ដែលវាអាចបាញ់បានចម្ងាយពី ៥០ ទៅ ១៨០ គីឡូម៉ែត្រឯណោះ។
ក្រៅពីនេះ យន្តហោះប្រដេញនេះក៏ត្រូវបានបំពាក់ដោយគ្រាប់បែក GBU-31JDAM ដែលទម្លាក់ពីលើអាកាសដោយមានប្រព័ន្ធបញ្ជាផងដែរ។ កងទ័ពអាកាសកូរ៉េខាងត្បូងបានសង្កត់ធ្ងន់ថា គ្រាប់បែកនេះអាចមានសមត្ថភាពបំផ្លាញទីតាំងយោធាកូរ៉េខាងជើង ក្នុងពេលអាសន្នបាន។
ការបំពាក់អាវុធបន្ថែមឲ្យយន្តហោះចម្បាំង F-16 នេះជាផ្នែកមួយនៃយុទ្ធសាស្ត្របង្កើនសមត្ថភាពប្រយុទ្ធរបស់កងទ័ពអាកាសកូរ៉េខាងត្បូងដើម្បីប្រឆាំងរាល់ការគំរាមកំហែងពីខាងក្រៅជាពិសេសពីសំណាក់ក្រុងព្យុងយ៉ាង។
យន្តហោះ F-16 មានតួនាទីសំខាន់ក្នុងការបំពេញប្រតិបត្តិការថែរក្សាសន្តិសុខដែនអាកាស របស់កូរ៉េខាងត្បូងចាប់តាំងពីពេលដែលយន្តហោះនេះត្រូវបានដាក់ឲ្យប្រើប្រាស់នៅឆ្នាំ ១៩៨៦ នោះ។ ដូច្នេះហើយ យន្តហោះដែលបម្រើការងារនៅក្នុងវិស័យការពារជាតិកូរ៉េខាងត្បូងចាំបាច់ត្រូវមានការកែលម្អ និងបំពាក់សព្វាវុធថ្មីៗបន្ថែមដើម្បីបង្កើនសមត្ថភាពប្រយុទ្ធ។
ដល់ឆ្នាំ ២០០៩ កូរ៉េខាងត្បូងបានចុះកិច្ចព្រមព្រៀងជាមួយក្រុមហ៊ុន Lockheed Martin Corp ដើម្បីបន្ទាន់សម័យយន្តហោះនេះ។ ដល់ឆ្នាំ ២០១៣ យន្តហោះចម្បាំង F-16 ប្រហែល ៣០ គ្រឿងត្រូវបានគេកែលម្អ និងបន្ទាន់សម័យដោយមានបំពាកសព្វាវុធនិងបច្ចេកវិទ្យាថ្មីបន្ថែមដែរ។
Tag:
F-16
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com