អន្តរជាតិ
អាជ្ញាធរមីយ៉ាន់ម៉ា បញ្ចប់ប្រតិបត្តិការបង្ក្រាបនៅរដ្ឋជម្លោះ«រ៉ូហ៊ីងយ៉ា» ជាមួយការចោទប្រកាន់ច្រើនពីសហគមន៍អន្តរជាតិ 17, Feb 2017 , 3:03 pm
× រដ្ឋាភិបាលមីយ៉ាន់ម៉ា បានបញ្ចប់ប្រតិបត្តិការបោសសម្អាតក្រុមឧទ្ទាមនៅក្នុងរដ្ឋជម្លោះជាតិសាសន៍រ៉ូហ៊ីងយ៉ា Rakhine ហើយ។ ការបិទបញ្ចប់ប្រតិបត្តិការនេះ ធ្វើឡើងក្រោយពី អាជ្ញាធរ បានបើកការប្រយុទ្ធវាយបកទៅលើក្រុមឧទ្ទាមអស់រយៈពេលបួនខែ ដែលសហគមន៍អន្តរជាតិ បានចោទប្រតិបត្តិការនោះ ថា បានបង្កើតបទល្មើសធ្ងន់ធ្ងរប្រឆាំងនឹងជនជាតិភាគតិចម៉ូស្លីមរ៉ូហ៊ីងយ៉ាតែម្តង។
«ស្ថានភាពនៅក្នុងរដ្ឋ Rakhine មានស្ថិរភាពឡើងវិញហើយ។ ហើយប្រតិបត្តិការបោសសម្អាតដោយកងកម្លាំងយោធា ក៏បានបញ្ឈប់, បម្រាមគោចរ ក៏បានដក ហើយមានតែកងកម្លាំងសមត្ថកិច្ចប៉ុណ្ណោះនោះទេ ដែលបន្តនៅឈរជើងនៅទីនោះដើម្បីរក្សាសន្តិសុខ»។ នេះគឺសេចក្តីថ្លែងការណ៍របស់ការិយាល័យទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី ពាក់ព័ន្ធនឹងស្ថានភាពរដ្ឋជម្លោះជាតិសាសន៍រ៉ូហ៊ីងយ៉ា Rakhine ដែលដកស្រង់ និងចុះផ្សាយដោយសារព័ត៌មាន APនៅថ្ងៃទី១៦ កុម្ភៈម្សិលមិញ។
តាមប្រភពព័ត៌មានដដែលនោះ ជុំវិញបញ្ហានេះដែរ ការិយាល័យប្រធានាធិបតីមីយ៉ាន់ម៉ា ក៏បានចេញថ្លែងការណ៍ដាច់ដោយឡែកផងដែរ។ អ្នកនាំពាក្យការិយាល័យប្រធានាធិបតីលោក Zaw Htay បានពន្យល់ថា ការបញ្ឈប់ប្រតិបត្តិការយោធា មិនមែនមានន័យថា រដ្ឋាភិបាល មិនដាក់បញ្ឈរជើងកម្លាំងនៅទីនោះទេ។ លោក បន្ថែមថា រដ្ឋាភិបាល នៅតែដាក់កងកម្លាំងនៅទីនោះដើម្បីរក្សាសន្តិសុខដដែល។
សូមជម្រាបផងដែរថា នៅថ្ងៃទី០៤ ខែតុលា ឆ្នាំមុន កងកម្លាំងអាជ្ញាធរ បានបើកប្រតិបត្តិការប្រយុទ្ធមួយនៅក្នុងរដ្ឋ Rakhine ដែលមានសហគមន៍ធំពីរនៅទីនោះ គឺសហគមន៍ពុទ្ធសាសនិក និងសហគមន៍ម៉ូស្លីមរ៉ូហ៊ីងយ៉ា ដោយរដ្ឋាភិបាលមីយ៉ាន់ម៉ាថា ការវាយបកទៅនឹងក្រុមឧ្ទាមដែលបានវាយប្រហារ និងសម្លាប់ប៉ូលិសតម្រួតនៅទីនោះ។
អ្វីគួរកត់សម្គាល់នោះ ប្រតិបត្តការ ដែលរដ្ឋាភិបាលមីយ៉ាន់ម៉ា អះអាងថាជាការវាយបកទៅលើក្រុមឧទ្ទាមនោះ បានបង្កើតជារឿងចម្រូងចម្រាសកាន់តែខ្លាំងនៅក្នុងតំបន់រដ្ឋ Rakhine នោះតែម្តង។ រឿងចម្រូងចម្រាសនោះ មានរបាយការណ៍អង្គការសិទ្ធិមនុស្សជាច្រើន បានបង្ហាញថា យោធា បានដាក់គោលដៅទៅលើជនជាតិភាគតិចរ៉ូហ៊ីងយ៉ា ដែលរស់នៅក្រោមការស្អប់ខ្ពើម និងមិនទទួលបានសិទ្ធិស្របច្បាប់រស់នៅពីរដ្ឋាភិបាលនោះ។
តាមរបាយការណ៍ដែលចេញផ្សាយកាលពីពេលថ្មីៗនេះ ដោយការិយាល័យនៃឧត្តមស្នងការទទួលសិទ្ធិមនុស្ស (OHCHR) ដែលយោងតាមកិច្ចសម្ភាសន៍ជាមួយនឹងប្រជាជនដែលភៀសខ្លួនពីមីយ៉ាន់ម៉ា ក្រោយការវាយប្រហារនៅដើមខែតុលាឆ្នាំមុន បានបង្ហាញថា មានការករណីរំលោភ សម្លាប់ ដែលរាប់បញ្ចូលទាំងទារក និងកុមារ ការធ្វើទារុណកម្មព្រៃផ្សៃ និងសកម្មភាពរំលោភសិទ្ធិមនុស្សផ្សេងទៀតទៅលើជនជាតិភាគតិចរ៉ូហ៊ីងយ៉ាដោយកងកម្លាំងសន្តិសុខមីយ៉ាន់ម៉ា។
តាមចម្លើយដែលផ្សាយចេញតាមរបាយការណ៍នោះ កងកម្លាំងមីយ៉ាន់ម៉ា មិនត្រឹមតែប្រព្រឹត្តបទល្មើសប៉ុន្មានខាងលើនោះទេ តែពួកគេ ក៏បានដុតផ្ទះសម្បែង សាលារៀន ផ្សារ វិហារ និងដីស្រែជនជាតិភាគតិចទាំងនោះ និងថែមទាំងមានឃាត់ក្រុមទាំងនោះនៅក្នុងផ្ទះ ហើយដុតសម្លាប់ពួកគេតែម្តង។ តាមចម្លើយក្នុងរបាយការណ៍ដដែលនោះ ស្ត្រីច្រើនជាងពាក់កណ្តាល ដែលបានផ្តល់កិច្ចសម្ភាសន៍នោះ បានអះអាងថា ពួកគេសុទ្ធសឹងតែរងការឈឺចាប់ដោយសារការរំលោភ និងហិង្សាផ្លូវភេទជាច្រើនទម្រង់ផ្សេងទៀត៕
Tag:
រ៉ូហ៊ីងយ៉ា
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com