អន្តរជាតិ
មីយ៉ាន់ម៉ា ត្រៀមដំណើរការសេវាកម្ម«តាក់ស៊ីផ្លូវទឹក» កាត់បន្ថយការកកស្ទះចរាចរណ៍ 18, Feb 2017 , 6:39 pm
លោកស្រី អ៊ុងសាន ស៊ូជី
× រដ្ឋាភិបាលមីយ៉ាន់ម៉ា នៅថ្ងៃ១៧ កុម្ភៈ ម្សិលមិញនេះ បានផ្តល់សិទ្ធិឲ្យក្រុមហ៊ុនដឹកដំណើរតាមដងទន្លេក្នុងស្រុកមួយដើម្បីផ្តល់សេវាកម្ម«តាក់ស៊ីតាមផ្លូវទឹក»នៅក្នុងអតីតរដ្ឋធានីនៃប្រទេសមីយ៉ាន់ម៉ា។ ការផ្តល់អាទិភាពលើសេវាកម្មដឹកជញ្ជូនផ្លូវទឹកនេះ គឺជាផ្នែកមួយនៃចំណាត់ការកាត់បន្ថយការកកស្ទះចរាចរណ៍របស់រដ្ឋាភិបាលមីយ៉ា់ន់ម៉ា។
លោករដ្ឋមន្ត្រីប្រចាំតំបន់នៃរដ្ឋាភិបាលមីយ៉ាន់ម៉ា Phyo Min Thein នៅថ្ងៃសុក្រម្សិលមិញ បានថ្លែងប្រាប់អ្នកសារព័ត៌មានថា រដ្ឋាភិបាល បានជ្រើសរើសក្រុមហ៊ុន Tint Tint Myanmar ដើម្បីផ្តល់សេវាដឹកអ្នកដំណើរតាមផ្លូវទឹកនៅក្នុងតំបន់ពាណិជ្ជកម្ម រ៉ងហ្គូន។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy។
លោករដ្ឋមន្ត្រី ក៏បានបញ្ជាក់បន្ថែមយ៉ាងដូច្នេះថា៖«យើង កំពុងតែត្រៀមដំណើរការជាផ្លូវការនូវសេវាកម្មដឹកអ្នកដំណើរតាមផ្លូវទឹកនៅដើមខែឧសភាខាងមុខផងដែរ»។ នេះបើយោងតាមប្រភពព័ត៌មានដដែល ដែលបានបន្តទៀតថា គម្រោងសេវាតាក់ស៊ីតាមផ្លូវទឹកនេះ ក៏ស្ថិតក្រោមផែនការរបស់រដ្ឋាភិបាល ដែលចង់បង្កើនសេវាដឹកជញ្ជូនសាធារណៈដើម្បីជួយសម្រួលការកកស្ទះចរាចរណ៍នៅក្នុងក្រុងរ៉ងហ្គូននោះ។
បន្ថែមពីនេះទៀតនោះ លោករដ្ឋមន្ត្រី ក៍បានឲ្យដឹងដែលថា សេវាកម្មតាក់ស៊ីផ្លូវទឹកនេះ ក៏ជាប់ពាក់ព័ន្ធការសេវាកម្មឡាងក្រុងសាធារណៈរបស់រដ្ឋាភិបាលមីយ៉ាន់ម៉ាកាលពីពេលថ្មីៗនេះផងដែរ។ នៅខែមករាកន្លងទៅ រដ្ឋាភិបាលមីយ៉ាន់ម៉ា បានដាក់ដំណើរសេវាកម្មដឹកជញ្ជូនឡានក្រុងនៅក្នុងក្រុងរ៉ងហ្គូនជាលើកដំបូងដើម្បីជួយសម្រួលដល់កកស្ទះនៅក្នុងក្រុងដ៏ធំជាងរបស់មីយ៉ាន់ម៉ាមួយនេះ៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com