ខ្មែរក្រហម
ជាតិ
ប្រតិកម្មចម្រុះជុំវិញការស្លាប់របស់លោក អៀង សារី 14, Mar 2013 , 10:58 am
![](https://image.thmeythmey.com/pictures/2013/03/14/thumb2/1432013111252images22.jpg)
×![]()
ភ្នំពេញ ៖ លោក អៀង សារី មេដឹកនាំរបបអាវខ្មៅខ្មែរក្រហមម្នាក់ដែលមានអាយុ៨៧ឆ្នាំបានទទួលមរណភាពហើយនៅព្រឹកថ្ងៃព្រហស្បត៍នេះនៅមន្ទីពេទ្យរុស្ស៊ី រាជធានីភ្នំពេញ។ បន្ទាប់ពីទទួលអនិច្ចកម្មភ្លាម ប្រតិកម្មចម្រុះពីគ្រប់មជ្ឈដ្ឋានត្រូវបានធ្វើឡើងជាបន្តបន្ទាប់។
លោក អំ សំអាត ប្រធានក្រុមស៊ើបអង្កេតនៃអង្គការការពារសិទ្ធិមនុស្សលីកាដូបានសម្តែងការសោកស្តាយចំពោះការស្លាប់បាត់បង់ជីវិតរបស់លោក អៀង សារី ពីព្រោះការបាត់បង់លោក អៀង សារី គឺជាការបាត់បង់អាថ៌កំបាំងមួយចំនួនធំដែលបានកើតឡើងនៅចន្លោះឆ្នាំ១៩៧៥ និងឆ្នាំ១៩៧។ មិនត្រឹមតែប៉ុណ្ណោះ ការស្លាប់របស់លោក អៀង សារី គឺជាការបាត់បង់យុត្តិធម៌សម្រាប់ជនរងគ្រោះនៃរបស់ខ្មែរក្រហម។ ប្រជាជនខ្មែរប្រមាណជា២លាននាក់បានបាត់បង់ជីវិតក្នុងរបបអាវខ្មៅដែលបានកាន់កាប់អំណាចជាង៣ឆ្នាំ។
លោក ខៀវ កញ្ញារិទ្ធ អ្នកនាំពាក្យរាជរដ្ឋាភិបាលកម្ពុជា និងជារដ្ឋមន្ត្រីក្រសួងព័ត៌មានបដិសេដមិនធ្វើអត្ថាធិប្បាយភ្លាមៗនៅឡើយទេ បន្ទាប់ពីការស្លាប់លោក អៀង សារី។
លោក សុន ឆ័យ ប្រធានក្រុមតំណាងរាស្ត្រគណបក្ស សម រង្ស៊ី បានសម្តែងការសោកស្តាយ និងបានស្តីបន្ទោសភ្លាមៗចំពោះការពន្យាពេលកាត់ទោសមេដឹកនាំខ្មែរក្រហម។ លោកតំណាងរាស្ត្ររូបនេះបានបញ្ជាក់ថា៖«លោកឃើញស្រាប់ហើយថា មេដឹកនាំខ្មែរក្រហម លោកតា ម៉ុក បានស្លាប់។ ឥឡូវ លោក អៀង សារី បានស្លាប់ទៀត តែដំណើរការកាត់ក្តីនៅតែពន្យាពេល។ ខ្ញុំសូមអោយអង្គការសហប្រជាជាតិចាត់វិធានការកាត់ទោសអោយបានលឿន និងមិនត្រូវស្ថិតនៅក្រោមសម្ពាធរបស់រដ្ឋាភិបាលកម្ពុជាទេ»។
និស្សិតឆ្នាំទី៤នៅសាកលវិទ្យាល័យភ្នំពេញឈ្មោះ រ៉ាវី បានបញ្ចេញទស្សនៈថា លោកមានការសោកស្តាយណាស់ពីព្រោះ ជនរងគ្រោះនៃរបបខ្មែរក្រហមមិនទាន់ទទួលបានយុត្តិធម៌ផងស្រាប់តែជនជាប់ចោទបានស្លាប់ទៅហើយ៕
© រក្សាសិទ្ធិដោយ thmeythmey.com