អន្តរជាតិ
របបសឹកថៃ អួតថា ខ្លួនទិញនាវាមុជទឹកពីចិនថោកជាងគេ ហើយបានមីស៊ីល Free ទៀត 26, Apr 2017 , 5:26 pm
នាវាមុជទឹក Yuan-class S26T ដែលរដ្ឋាភិបាលថៃសម្រេចទិញពីចិន
× រដ្ឋាភិបាលយោធាថៃ បាននិយាយការពារគម្រោងទិញនាវាមុជទឹកពីចិនក្នុងតម្លៃដល់ទៅ១៣,៥ពាន់លានបាត ក្រោយអនុម័តគម្រោងទិញនាវាមុជទឹកនេះ ទើបត្រូវបានទម្លាយជាសាធារណៈនៅថ្ងៃទី២៤ ខែមេសាប៉ុណ្ណោះ។ រដ្ឋមន្ត្រីការពារជាតិថៃនិយាយថា រដ្ឋាភិបាល ធ្វើអ្វីៗដោយមានតម្លាភាពទាំងអស់ហើយម្យ៉ាងទៀត ការទិញនាវាមុជទឹកនេះទៀតសោត ក៏៏មានតម្លៃទាបជាងអ្នកដទៃ ហើយថែមទាំងបានមីស៊ីលឥតគិតថ្លៃទៀតផង។
ការលាក់បាំងគម្រោងទិញនាវាមុជទឹកពីចិនរបស់រដ្ឋាភិបាលយោធាថៃ ធ្វើសាធារណជនអន់ចិត្តយ៉ាងខ្លាំង។ គម្រោងទិញនាវាមុជទឹកចំនួន ៣គ្រឿងសម្រាប់បម្រើការក្នុងជួរទ័ពជើងទឹក ត្រូវបានគណៈរដ្ឋមន្ត្រីថៃ អនុម័តយល់ព្រមទាំងពីថ្ងៃទី១៨ ខែមេសាមកម្ល៉េះ ប៉ុន្តែព័ត៌មាននេះ ទើបត្រូវបានទម្លាយជាសាធារណៈនៅថ្ងៃចន្ទប៉ុណ្ណោះ។ កងទ័ពជើងទឹកថៃ គឺជាអ្នកចេញលុយសម្រាប់ទិញនាវាមុជទឹកថ្នាក់ Yuan ប្រភេទ S26T ដោយខ្លួនឯង។
កាសែតបាងកកប៉ុស្តិ៍ផ្សាយថា កងទ័ពជើងទឹកថៃ នឹងទិញនាវាមុជទឹកចំនួន ៣គ្រឿងដែលមានតម្លៃសរុបចំនួន ៣៦ពាន់លានបាតសម្រាប់រយៈពេល ១១ឆ្នាំ។ ការបិទបាំងព័ត៌មាននេះ បង្កជាការរិះគន់ថា រដ្ឋាភិបាលយោធា ចង់លាក់ព័ត៌មាននេះ ហើយខ្លះទៀតក៏ចោទជាសំណួរលើគុណភាពនាវាមុជទឹកដែលផលិតដោយចិនទៅទៀត។
យ៉ាងណាក្ដី ឧបនាយករដ្ឋមន្ត្រី និងជារដ្ឋមន្ត្រីការពារជាតិ Prawit Wongsuwon និយាយការពារគម្រោងនេះថា រដ្ឋាភិបាលគ្មានអ្វីត្រូវលាក់បាំងលើគម្រោងទិញនាវាមុជទឹកនេះឡើយ។ ប៉ុន្តែលោកក៏អះអាងដែរថា ឯកសារខ្លះនៃគម្រោងទិញនេះ ជាឯកសារសម្ងាត់ទាក់ទងសន្តិសុខជាតិ ដែលមិនអាចបញ្ចេញជាសាធារណៈឡើយ។ លោកបន្តដែរថា ទ័ពជើងទឹក សម្រេចចិត្តទិញនាវារបស់ចិន ព្រោះមានតម្លៃថោកជាងនាវាដែលដាក់លក់ដោយប្រទេសផ្សេងទៀត។
បើតាមសម្ដីរបស់ប្រមុខការពារជាតិថៃ នាវាមុជទឹកផលិតដោយចិន ក៏មានបំពាក់ប្រព័ន្ធតួប៊ីនសប់ខ្យល់ (Air Turbine Pump) ដែលអាចឲ្យនាវាស្ថិតក្រោមទឹកដល់ទៅ ២១ថ្ងៃឯណោះ។ លើសពីនោះ មិនត្រឹមតែទិញបាននាវាមុជទឹកក្នុងតម្លៃថោកឡើយ ថៃ ក៏នឹងទទួលបានការផ្ដល់ជូនពិសេសដូចជាសម្ភារយោធា និងមីស៊ីលបាញ់ចេញពីនាវាមុជទឹកដោយឥតគិតថ្លៃថែមទៀត។
នាវាមុជទឹកទី១ នឹងមកដល់ថៃនៅរយៈពេល ៥ទៅ៦ឆ្នាំទៀតឯណោះ។ នាវាមុជទឹកប្រភេទនេះ អាចត្រូវពង្រាយនៅឯសមុទ្រ Andaman ដែលតំបន់មានជម្រៅជ្រៅជាងឈូងសមុទ្រថៃ និងមានលក្ខណៈអំណោយផលសម្រាប់ការធ្វើដំណើរបស់នាវា។ របបយោធាថៃ ធ្លាប់លើកឡើងថា ការទិញនាវាមុជទឹកនេះ គឺជារឿងចាំបាច់ដើម្បីការពារទឹកដី និងការពារពីការគំរាមកំហែងណាមួយមកលើសន្តិសុខប្រទេសក្នុងករណីមានជម្លោះក្នុងកើតឡើង៕
© រក្សាសិទ្ធិដោយ thmeythmey.com