អន្តរជាតិ
នាវាចម្បាំងចិន និងរុស្ស៊ី បណ្ដាក់វេនគ្នាទស្សនកិច្ចនៅហ្វីលីពីន 02, May 2017 , 1:48 pm
ប្រធានាធិបតីហ្វីលីពីន Rodrigo Duterte ចាប់ដៃជាមួយមន្ត្រីយោធាកងទ័ពជើងទឹកចិន ខណៈលោកទស្សនកិច្ចនាវាចម្បាំងចិនកំពុងចតនៅកំពង់ផែក្រុង Davao (រូបភាព Rappler)
× មិនយូរប៉ុន្មានក្រោយនាវារុស្ស៊ី ២គ្រឿងទៅទស្សនកិច្ចនៅហ្វីលីពីន នាវាកងទ័ពជើងទឹកចិន ៣គ្រឿងក៏បានទៅដល់កំពង់ផែរបស់ហ្វីលីពីននៅថ្ងៃទី៣០ ខែមេសា ទៀតដើម្បីបំពេញទស្សនកិច្ច ៣ថ្ងៃ ។ នេះជាលើកទី១ ក្នុងរយៈពេល ៧ឆ្នាំមកនេះ ដែលនាវាចម្បាំងចិនបង្ហាញវត្តមាននៅហ្វីលីពីន ស្របពេលទំនាក់ទំនងទ្វេភាគីកំពុងតែល្អូកល្អឺនខ្លាំងក្រោមអាណត្តិប្រធានាធិបតី Rodrigo Duterte ។
ប្រធានាធិបតីហ្វីលីពីន Rodrigo Duterte នៅថ្ងៃទី១ ខែឧសភា បានទៅទស្សនកិច្ចលើនាវាចម្បាំងរបស់ចិន ដែលបានមកដល់ហ្វីលីពីនកាលពីចុងសប្ដាហ៍មុន។ ពីលើនាវាចម្បាំងរបស់ចិន លោកប្រធានាធិបតី Duterte បានលើកសរសើរអានុភាពដ៏ខ្លាំងក្លារបស់កងទ័ពជើងទឹកមហាយក្សចិន ដែលអាចបង្កគ្រោះថ្នាក់សម្រាប់ហ្វីលីពីន ប៉ុន្តែវត្តមាននាវាចិនពេលនេះ ជាផ្នែកមួយនៃការកសាងទំនុកចិត្តរវាងប្រទេសទាំង២។
បើតាមសារព័ត៌មាន Rappler ប្រធានាធិបតីហ្វីលីពីន បានឡើងពិនិត្យមើលនាវាចិនទាំង ៣គ្រឿងដែលកំពុងចតនៅកំពង់ផែក្រុង Davao ជាស្រុកកំណើតរបស់ Duterte ផ្ទាល់។ លោក Duterte បាននិយាយពីលើនាវាចិន ថា នាវាចម្បាំងរបស់ពិតជាអស្ចារ្យមែន ព្រោះដំណើរការដោយកុំព្យូទ័រ។ លោកក៏និយាយរបៀបកំប្លែងដែរថា៖ «កាណុងបាញ់មីស៊ីលរបស់វា កំពុងតម្រង់ឆ្ពោះមកហ្វីលីពីន ហើយបើកាណុងនេះទម្លាក់តែបន្តិច ហ្វីលីពីនពិតជាខ្ទេចមិនខាន»។
នាវាចិនទាំង ៣គ្រឿងមាននាវាពិឃាត ១គ្រឿងផងនោះ នឹងបន្តចតនៅកំពង់ផែក្រុង Davao នៅថ្ងៃទី២ ខែឧសភានេះទៀត។ ប្រធានាធិបតី Duterte បញ្ជាក់ថា វត្តមានរបស់នាវាចិន បង្ហាញពីមិត្តភាព ក៏ដូចជាការកសាងជំនឿចិត្តរវាងចិន និងហ្វីលីពីន។ លោក ក៏បានស្នើទៅចិនដើម្បីទៅទស្សនកិច្ចលើនាវាទាំង ៣គ្រឿងនេះដែរ ព្រោះលោកចង់ឃើញនាវាចិន។
នេះ ជាលើកដំបូងដែលចិនបញ្ជូននាវាទៅកាន់ហ្វីលីពីន គឺចាប់តាំងពីឆ្នាំ២០១០ មកម្ល៉េះ។ ពោល គឺក្រោមអាណត្តិរបស់អតីតប្រធានាធិបតី Benigno Aquino III ។ គឺលោក Aquino នេះហើយ ដែលប្ដឹងចិនទៅកាន់តុលាការអន្តរជាតិជុំវិញសំណុំរឿងសមុទ្រចិនខាងត្បូង។ ពេលនោះ ចិន ពិតជាខឹងនឹងហ្វីលីពីនខ្លាំងណាស់ ព្រោះតុលាការអន្តរជាតិសម្រេចកាត់ក្ដីឲ្យហ្វីលីពីនជាអ្នកឈ្នះលើសំណុំរឿងនេះ។
យ៉ាងណាក្ដី សាលក្រមនេះ មិនត្រូវបានរដ្ឋបាលប្រធានាធិបតី Duterte យកមកនិយាយឡើយ ព្រោះអាចនាំឲ្យល្អក់កករទំនាក់ទំនងជាមួយចិន។ ហ្វីលីពីន ក៏មិនបានយកសាលក្រមនេះ ទៅបញ្ចូលក្នុងសេចក្ដីថ្លែងការណ៍រួមរបស់អាស៊ានដែរ បើទោះជាខ្លួនជាប្រធានកិច្ចប្រជុំក្ដី។ លោក Duterte អះអាងថា រឿងរ៉ាវសាលក្រម អាចយកមកអនុវត្តពេលក្រោយ ដ្បិតពេលនេះហ្វីលីពីនមិនចង់បង្ខំចិនឡើយ ហើយម្យ៉ាងទៀត សាកក្រមនេះក៏ទំនងមិនអាចដាក់សម្ពាធលើចិនបានដែរ៕
Tag:
ហ្វីលីពីន
Rodrigo Duterte
ចិន
រុស្ស៊ី
© រក្សាសិទ្ធិដោយ thmeythmey.com