អន្តរជាតិ
លោកស្រី មឺហ្កែល ស្កាត់ទៅជួបលោក ពូទីន នៅSochi រំពឹងស្តារទំនាក់ទំនងទ្វេភាគី 02, May 2017 , 4:50 pm
![](https://image.thmeythmey.com/pictures/2017/05/02/thumb2/merkel-putin.jpg)
×![]()
អធិការបតីអាល្លឺម៉ង់លោកស្រី អែនជេឡា មឺហ្កែល (Angela Merkel) ទៅជួបប្រធានាធិបតីរុស្ស៊ីលោក វ្ល៉ាឌីមៀ ពូទីន (Vladimir Putin) នៅថ្ងៃអង្គារទី ២ឧសភានាតំបន់លំហែកាយ Sochi។នេះជាជំនួបទ្វេភាគីលើកដំបូងបំផុតរវាងមេដឹកនាំទាំងពីរចាប់ពីឆ្នាំ ២០១៥ ហើយវាក៏បង្ហាញឲ្យឃើញពីឆន្ទៈរវាងមេដឹកនាំទាំងពីរ ក្នុងការពង្រឹងចំណងមិត្តភាពទ្វេភាគីឡើងវិញដែរ។
អធិការបតីអាល្លឺម៉ង់លោកស្រី អែនជេឡា មឺហ្កែល ស្កាត់ទៅជួបប្រធានាធិបតីរុស្ស៊ីលោក វ៉ា្លឌីមៀ ពូទីន នៅតំបន់ Sochi នៅថ្ងៃអង្គារទី ២ឧសភានេះ។ ទំនាក់ទំនងអាល្លឺមង់និងរុស្ស៊ីអាចនឹងប្រសើរឡើងនៅពេលខាងមុខ បន្ទាប់ពីដំណើរទស្សនកិច្ចនៅរុស្ស៊ីរបស់ប្រមុខរដ្ឋាភិបាលអឺល្លឺម៉ង់នេះ។
ទំនាក់ទំនងរវាងអាល្លឺម៉ង់ និងរុស្ស៊ីធ្លាក់ចុះខ្លាំងក្រោយពេលដែលវិបត្តិអ៊ុយក្រែនផ្ទុះឡើងនៅឆ្នាំ ២០១៤ ហើយលោកស្រីអធិការបតីរូបនេះជាអ្នកដែលគាំទ្រខ្លាំងជាងគេចំពោះការដាក់ទណ្ឌកម្មប្រឆាំងរុស្ស៊ីកន្លងមក។ ជាការឆ្លើយតបចំពោះការដាក់ទណ្ឌកម្ម រុស្ស៊ីបានសម្រេចហាមឃាត់ទំនិញឬផលិតផលកសិកម្មរបស់លោកខាងលិចវិញផងដែរ
យោងតាមភ្នាក់ងារព័ត៌មាន AFP លោកស្រី អធិការបតីអាល្លឺម៉ង់បំពេញទស្សនកិច្ចនៅរុស្ស៊ី និងជួបជាមួយមេដឹកនាំរុស្ស៊ី ក្រោយពេលដែលលោក វ្ល៉ាឌីមៀ ពូទីន អំពាវនាវឲ្យមានការរឹតបន្តឹងចំណងមិត្តភាពរវាងរុស្ស៊ីជាមួយលោកខាងលិចឡើងវិញក្នុងពេលដែលលោកជួបជាមួយរដ្ឋមន្ត្រីការបរទេសអាល្លឺម៉ង់Sigmar Gabriel នៅខែមីនាកន្លងមក។
ក្នុងជំនួបទ្វេភាគីលើកនេះ មេដឹកនាំទាំងពីរអាចជជែកពិភាក្សាពីបញ្ហាជាច្រើនជាពិសេសទំនាក់ទំនងទ្វេភាគីក្នុងវិស័យការទូត និងសេដ្ឋកិច្ច រួមទាំងការលេបយកទឹកដី Crimea និងជម្លោះអ៊ុយក្រែនក៏ស្ថិតក្នុងរបៀបវារៈនៃកិច្ចពិភាក្សាដែរ។
មុនដំណើរទស្សនកិច្ចនេះមកដល់ អ្នកនាំពាក្យអធិការបតី Steffen Seibert បានថ្លែងប្រាប់អ្នកសារព័ត៌មានថា៖«វាមានប្រធានបទពីសំខាន់ៗពាក់ព័ន្ធទំនាក់ទំនងទ្វេភាគី។ ក្នុងនោះមានការក្រសោបយកទឹកដីCrimea ដែលផ្ទុយនឹងច្បាប់អន្តរជាតិ និងការបង្កអស្ថិរភាពនៅភាគខាងកើតអ៊ុយក្រែនដោយការជួយគាំទ្រក្រុមឧទ្ទាមដែលចង់ផ្តាច់ខ្លួន»។
លោកស្រី អធិការបតីអាល្លឺម៉ង់ បានបំពេញទស្សកិច្ចនៅរុស្ស៊ីចុងក្រោយនៅខែឧសភាឆ្នាំ ២០១៥ ហើយលោស្រីក៏បានជួបជាមួយលោកពូទីន ដែរ។ ប៉ុន្តែក្នុងឱកាសខួប ៧០ឆ្នាំនៃជ័យជម្នះសង្គ្រាមលោកលើកទី ២ លោកស្រី និងបណ្តាមេដឹកនាំលោកខាងលិចភាគច្រើនមិនចូលរួមការប្រារព្ធពិធីនេះនៅក្រុងម៉ូស្គូឡើយ។ អាល្លឺម៉ង់និងប្រទេសលោកខាងលិចឯទៀតបន្តថ្កោលទោសរុស្ស៊ីនិងចោទប្រកាន់ថា ក្រេមឡាំងបន្តគាំទ្រក្រុមឧទ្ទាមភាគខាងកើតអ៊ុយក្រែនមកដល់បច្ចុប្បន្នដើម្បីទប់ស្កាត់កុំឲ្យជម្លោះប្រដាប់អាវុធឈានដល់ទីបញ្ចប់និងកេងចំណេញស្ថានការណ៍ផង។ ប៉ុន្តែ វត្តមានលោកស្រីអធិការបតីអាល្លឺម៉ង់នៅរុស្ស៊ីលើកនេះ អាចនឹងបញ្ចប់ភាពល្អក់ករកដែលកើតមានកន្លងមកក្នុងទំនាក់ទំនងទ្វេភាគីអាល្លឺម៉ង់និងរុស្ស៊ី។
បន្ថែមពីនេះមេដឹកនាំទាំងពីររុស្ស៊ីនិងអាល្លឺម៉ង់ អាចនឹងជជែកពីការរៀបចំកិច្ចប្រជុំប្រទេស២០នៅ Hamburg ប្រទេសអាល្លឺម៉ង់នាខែកក្កដាខាងមុខផង។ វិមានក្រេមឡាំងបានទទួលស្គាល់ថា លោក វ្ល៉ាឌីមៀ ពូទីន និងលោកស្រី អែនជេឡា មឺហ្កែល នឹងជជែកគ្នាពីកិច្ចប្រជុំប្រទេស២០នេះក្នុងជំនួបពិភាក្សានៅ Sochi ។ ជារួមលោក ពូទីន នឹងអញ្ជើញទៅចូលរួមកិច្ចប្រជុំប្រទេស ២០ខាងមុខនេះ ហើយលោកនឹងអាចជួបជាមួយប្រធានាធិបតីអាមេរិក ដូណាល់ ត្រាំ ជាលើកដំបូងផងដែរ។
ដោយឡែក មុនដំណើរទស្សនកិច្ចរបស់លោកស្រី អែនជេឡា មឺហ្កែល កាលពីសប្តាហ៍មុន គេឃើញរដ្ឋមន្ត្រីការបរទេសសហភាពអឺរ៉ុបលោកស្រី Federica Mogherini បានបំពេញទស្សនកិច្ចទៅកាន់ក្រុងម៉ូស្គូដែរ ហើយលោកស្រីបានសង្កត់ធ្ងន់ថា ទំនាក់ទំនងរវាងអឺរ៉ុបនិងរុស្ស៊ីមិនជាប់គាំងឡើយ។ ប៉ុន្តែលោកស្រីមើលឃើញថា ទំនាក់ទំនងនេះនៅប្រឈមឧបសគ្គដោយសារការលូកលាន់របស់រុស្ស៊ីក្នុងជម្លោះស៊ីរី និងបញ្ហាភាគខាងកើតអ៊ុយក្រែន៕
Tag:
អែនជេឡា មឺហ្កែល
វ្ល៉ាឌីមៀ ពូទីន
Sochi
© រក្សាសិទ្ធិដោយ thmeythmey.com