ខ្មែរក្រហម
ជាតិ
ជនជាប់ចោទ នួន ជា មានកាយសម្បទាគ្រប់គ្រាន់ដើម្បីចូលរួមសវនាការ 29, Mar 2013 , 1:56 pm
![](https://image.thmeythmey.com/pictures/2013/03/29/thumb2/NounChea.jpg)
×![]()
លោកចៅក្រម និល ណុន ប្រធានអង្គជំនុំជម្រះសាលាដំបូងនៃសាលាក្តីខ្មែរក្រហម បានប្រកាសផ្ទាល់មាត់នៅព្រឹកថ្ងៃសុក្រនេះ ថា លោក នួន ជា អាយុ៨៦ឆ្នាំ មានកាយសម្បទាគ្រប់គ្រាន់ដើម្បីចូលរួមសវនាការកាត់ទោសរូបលោក។ សេចក្តីសម្រេចជាលាយលក្ខណ៍អក្សរនឹងចេញនាពេលខាងមុខ។
កាលពីថ្ងៃទី២៥ ខែមីនា ឆ្នាំ២០១៣ អង្គជំនុំជម្រះសាលាដំបូង របស់តុលាការខ្មែរក្រហម បានបើកសវនាការលើសម្បទារបស់ជនជាប់ចោទ លោក នួន ជា។ នៅក្នុងសវនាការដែលមិនមានវត្តមានជនជាប់ចោទនោះ អ្នកជំនាញបានវាយតម្លៃថា លោក នួន ជា មានកាយសម្បទាល្អធម្មតា។
លោក និល ណុន បានបញ្ជាក់ថា៖ «ថ្វីត្បិត ជនជាប់ចោទ នួនជា មានអាយុច្រើន និងមានសុខភាពផ្លូវកាយ ទន់ខ្សោយក៏ដោយ ក៏របាយការណ៍ និងសក្ខីកម្ម នាពេលថ្មីៗរបស់អ្នកជំនាញវេជ្ជសាស្ត្រ ដែលតុលាការបានចាត់តាំង បានបញ្ជាក់ច្បាស់ថា ជនជាប់ចោទ នួនជា នៅតែមានសម្បទាចូលរួមសវនាការ»។
ជាមួយគ្នានោះផងដែរ លោកចៅក្រម និល ណុន ក៏បានប្រកាសពីសេចក្តីសម្រេចរបស់អង្គជំនុំជម្រះលើការបំបែកសំណុំរឿង០០២ ផងដែរ ដើម្បីពន្លឿនឲ្យឆាប់រហ័ស និងមានប្រសិទ្ធភាព៕
© រក្សាសិទ្ធិដោយ thmeythmey.com