អន្តរជាតិ
ឌូទើតេ សារភាពថា ប្អូនជីដូនមួយខ្លួនចូលរួមក្រុមភេរវជនដែលច្បាំងនៅក្រុង Marawi 28, Jun 2017 , 8:19 pm
× លោក រ៉ូឌ្រីហ្គោ ឌូទើតេ (Rodrigo Duterte) បានសារភាពថា បងប្អូនជីដូនមួយខ្លួនក៏ស្ថិតក្នុងចំណោមក្រុមសកម្មប្រយុទ្ធ Maute ដែលកំពុងច្បាំងប្រឆាំងរដ្ឋាភិបាលនៅក្រុង Marawi ដែរ ហើយក្នុងចំណោមពួកគេមានម្នាក់បានស្លាប់បាត់ទៅហើយ។ ប្រធានាធិបតីរូបនេះថាលោកឈឺចាប់ខ្លាំងពេលឃើញស្ថានភាពបែបនេះតែលោកសន្យាកសាងទីក្រុងដែលខ្ទេចខ្ទាំឡើងវិញ។
បន្ទាប់ពីបាត់មុខអស់រយៈពេលជិតមួយសប្តាហ៍ លោក រ៉ូឌ្រីហ្គោ ឌូទើតេ បានចេញមុខជាថ្មីចូលរួមក្នុងកម្មវិធីបរិភោគអាហារល្ងាចនៅវិមានប្រធានាធិបតីដើម្បីអបអរនៃការបញ្ចប់បុណ្យបួស Ramadan។ ក្នុងពិធីនោះលោកបានបង្ហើបថា បងប្អូនជាដូនមួយរបស់លោកក៏ជាសមាជិកក្រុមភេរវជន Maute នៅក្រុង Marawi ដែរ។
ក្នុងពិធីដែលមានវត្តមានសមាជិកគណៈរដ្ឋមន្ត្រី និងមេដឹកនាំក្រុមរណសិរ្សរំដោះឥស្លាមម៉ូរ៉ូ ( Moro Islamic Liberation Front) ថា៖«ខ្ញុំក៏សោកសៅដូចជាអ្នកទាំងអស់គ្នាដែរ។ នេះជាមូលហេតុដែលខ្ញុំមិនចង់និយាយពីការប្ររយុទ្ធគ្នានៅក្រុង Marawi ឡើយទោះបីជាក្នុងគណៈរដ្ឋមន្ត្រីក៏ដោយព្រោះខ្ញុំមានអារម្មណ៍ថាឈឺចាប់។ ខ្ញុំក៏មានបងប្អូនជាដូនមួយដែលស្ថិតក្នុងក្រុមភេរវជន Maute ដែរ»។
បើតាមសម្តីប្រធានាធិបតី ក្នុងចំណោមបងប្អូនជីដូនមួយរបស់លោក ដែលទៅចូលរួមជាមួយក្រុម Maute នោះមានម្នាក់បានស្លាប់បាត់ទៅហើយ។ លោកបន្តថា៖ «ព្រោះតែពួកគេនៅក្រុង Marawi ដែរ បងប្អូនជីដូនមួយខ្ញុំម្នាក់ស្លាប់បាត់ទៅហើយ»។
ក្រៅពីបង្ហាញអារម្មណ៍ឈឺចាប់ដែលមានបងប្អូនជីដូនមួយចូលរួមប្រយុទ្ធជាមួយក្រុមភេរវជន លោក ឌូទើតេ ក៏លើកឡើងផងដែរពីកង្វល់របស់លោលចំពោះការអូសបន្លាយនៃការប្រយុទ្ធគ្នានេះ។ ប៉ុន្តែលោកសន្យាថា លោកនឹងប្រឹងប្រែងឲ្យអស់ពីសមត្ថភាពដើម្បីកសាងក្រុង Marawi ដ៏ស្រស់ស្អាតដែលខ្ទេចខ្ទាំព្រោះការប្រយុទ្ធគ្នាឡើងវិញនៅពេលខាងមុខ។
លោក ឌូទើតេ បានអះអាងថា ពេលដែលលោកស្ថិតនៅក្នុងក្រុងម៉ូស្គូ ហើយលោកប្រកាសដាក់តំបន់មិនដាណាវទាំងមូលក្រោមច្បាប់អាជ្ញាសឹក លោកដឹងច្បាស់ថា ការប្រយុទ្ធមិនចប់ៗឆាប់ឡើយ។ ប៉ុន្តែលោកមិនមានជម្រើសអ្វីផ្សេងក្រៅពីនេះដែលអាចកម្ចាត់ក្រុមជ្រុលនិយមនេះបានឡើយ។
«ខ្ញុំមិនសប្បាយចិត្តឡើយដែលក្រុង Marawi ស្ថិតក្នុងសភាពលំបាកលំបិនបែបនេះ។ ខ្ញុំមិនសប្បាយចិត្តដែលអ្នករងទុក្ខវេទនានិងឈឺចាប់ឡើយ។ ខ្ញុំមិនឃើញមានអ្វីដែលធ្វើឲ្យយើងសប្បាយចិត្តទោះបីជាយើងឈ្នះសង្គ្រាមក៏ដោយ»។ នេះជាការបញ្ជាក់របស់លោក ឌូទើតេ។
បន្ថែមពីនេះ ប្រមុខរដ្ឋហ្វីលីពីនខាងលើក៏បានសន្យាជាមួយប្រជាជនក្រុង Marawi ដោយជួយកសាងនិងស្តារទីក្រុងដែលរងគ្រោះព្រោះការប្រយុទ្ធគ្នានេះឡើងវិញដែរ។ លោក ឌូទើតេ អធិប្បាយថា លោកនឹងធ្វើឲ្យទីក្រុងនេះរីកលូតលាស់និងមានវិបុលភាពឡើងវិញ ព្រោះលោកមិនអាចក្លាយជាមេដឹកនាំអាក្រក់ក្នុងប្រវត្តិសាស្ត្រហ្វីលីពីនឡើយ។
ការប្រយុទ្ធគ្នាចាប់ពីថ្ងៃ ២៣ ឧសភារវាងទាហានរដ្ឋាភិបាលនិងក្រុមភេរវជន Maute ដែលមានភក្តីភាពចំពោះក្រុមភេរវជនដែស្ហ (Daesh) មានការប្រើប្រាស់យន្តហោះទម្លាក់គ្រាប់បែក និងកាំភ្លើងធំបាញ់ផ្លោងចូលទីក្រុងផង។ ទីក្រុងដែលធ្លាប់ស្រស់ស្អាតបែរជាស្ថិតក្នុងសភាពបែកបាក់ ខ្ទេចខ្ទាំដោយសារការប្រយុទ្ធគ្នានេះ ហើយមនុស្សជាង បីរយនាក់បានស្លាប់បាត់បង់ជីវិតរួចទៅហើយក្នុងនោះមានទាហានប្រហែល ៧០នាក់ឯណោះ៕
Tag:
រ៉ូឌ្រីហ្គោ ឌូទើតេ
Maute
Marawi
© រក្សាសិទ្ធិដោយ thmeythmey.com