ពីនេះ ពីនោះ
ព័ត៍មានសុខភាព
សុខភាព៖ ធ្លាប់លឺទេជំងឺរលាកភ្នាស់បេះដូង? វាមានអាការៈអ្វីខ្លះទៅ? 27, Aug 2017 , 6:19 am
![](https://image.thmeythmey.com/pictures/2017/08/26/thumb2/img_1503711502.jpg)
×![]()
ធម្មតាបេះដូងរបស់យើងគឺមានភ្នាស់ខាងក្នុងរបស់វាដូចសរីរាង្គផ្សេងៗទៀតដែរ ហើយការដែលរលាកនៅភ្នាស់នេះភាគច្រើនគឺជាការបង្ករោគដោយពពួកបាក់តេរីតែម្តង។ ប៉ុន្តែជំងឺនេះមិនកើតឡើងជាញឹកញាប់លើអ្នកដែលមានបេះដូងសុខភាពល្អឡើយ។
រោគសញ្ញានៃជំងឺរលាកភ្នាស់បេះដូងមិនមែនតែងតែធ្ងន់ធ្ងរនោះទេ ហើយវាក៏អាចកើតឡើងបន្តិចម្តងៗរយៈពេលយូរដែរ។ ករណីដំណាក់កាលភ្លាមៗ រោគសញ្ញារបស់វាក៏មិនខុសគ្នានឹងជំងឺផ្សេងៗទៀតដែរ ដែលជាហេតុនាំឲ្យវាត្រូវបានគេដាក់រោគវិនិច្ឆ័យខុស។ ភាគច្រើនជំងឺនេះមានអាការៈស្រដៀងគ្នានឹងជំងឺផ្តាសាយ ឬការបង្ករោគទូទៅដែរដូចជាជំងឺរលាកសួតជាដើម។ យ៉ាងណាមិញ អ្នកខ្លះមានអាការៈធ្ងន់ធ្ងរដែលកើតឡើងភ្លាមៗតែម្តង។ អាការៈទាំងនេះអាចដោយសារតែការរលាក ឬការខូចខាតណាមួយក្នុងស្រទាប់បេះដូង។
រោគសញ្ញាញឹកញាប់នៃការរលាកភ្នាស់នៅក្នុងបេះដូងមានដូចជា៖
• ស្បែកទៅជាស្លេកស្លាំង
• ក្តៅខ្លួន
• គ្រុនញ៉ាក់
• ឈឺសាច់ដុំ
• ឈឺសន្លាក់
• ចង្អោ
• ថយចុះចំណង់អាហារ
• មានអារម្មណ៍ថាណែនៗក្នុងពោះផ្នែកខាងឆ្វេងនិងខាងលើ
• ស្រកទម្ងន់
អាការៈធ្ងន់ធ្ងរនៃការរលាកភ្នាស់បេះដូងដូចជា៖
• ឈាមក្នុងទឹកនោម
• ហើមប្រអប់ជើង
• ហើមជើង
• ហើមពោះ
• ពិបាកដកដង្ហើម
• ក្អក
• ស្រកទម្ងន់
• អណ្តើករីកធំ ដែលឈឺនៅពេលប៉ះ
• បេះដូងលោតលឺសម្លេងខុសធម្មតា
ការប្រែប្រួលទៅលើស្បែកក៏អាចកើតមានដែរដូចជា៖
• មានឡើងកន្ទយលក្រហមៗ ឬពណ៌ស្វាយនៅក្រោមស្បែកម្រាមដៃ ឬជើង
• បែកសរសៃឈាម ដែលជាហេតុនាំឲ្យកើតជាកន្ទួលក្រហមៗនៅភ្នែក ក្នុងថ្ពាល ឬមាត់ ឬទ្រូង
រោគសញ្ញានៃជំងឺរលាកភ្នាស់បេះដូងមានការប្រែប្រួលខ្លាំងណាស់ពីមនុស្សម្នាក់ទៅម្នាក់ទៀត។ វាអាចប្រែប្រួលគ្រប់ពេល ហើយក៏អាស្រ័យទៅលើមូលហេតុនៃការបង្ករោគដែរ។ បើសិណជាអ្នកធ្លាប់មានប្រវត្តិបញ្ហាបេះដូង ការវះកាត់បេះដូង ឬរលាកភ្នាស់បេះដូងពីមុនមក អ្នកគួរតែទៅជួបគ្រូពេទ្យឲ្យបានលឿនបើសិនជាមានរោគសញ្ញាទាំងអស់ខាងលើ ជាពិសេសក្តៅខ្លួនរយៈពេលយូរជាង ៣ថ្ងៃ ឬអស់កម្លាំងខុសធម្មតា និងមិនដឹងមូលហេតុ៕
ផ្តល់សិទ្ធិដោយ៖ www.health.com.kh
© រក្សាសិទ្ធិដោយ thmeythmey.com