កីឡាអន្តរជាតិ
អន្តរជាតិ
ឥណ្ឌា គួរបន្តផែនការបណ្តេញ«ជនជាតិរ៉ូហ៊ីងយ៉ា៤ម៉ឺននាក់»ទៅមីយ៉ាន់ម៉ាក្នុងពេលនេះឬយ៉ាងណា?
03, Sep 2017 , 7:59 am
×![]()
ហិង្សាប្រដាប់អាវុធនៅរដ្ឋ Rakhine នៃប្រទេសមីយ៉ាន់ម៉ា ដែលបានបណ្តាលឲ្យប្រជាជនច្រើននាក់ស្លាប់ និងភៀសខ្លួន បាននិងកំពុងតែក្លាយជាក្តីបារម្ភមួយនៅក្នុងតំបន់ និងអន្តរជាតិ ។ តែអ្វីដែលសហគមន៍អន្តរជាតិ កាន់តែចាប់អារម្មណ៍នោះគឺ ផែនការនៃការបណ្តេញចេញជនជាតិភាគតិចរ៉ូហ៊ីងយ៉ាប្រហែលជាង៤ម៉ឺននាក់ ទៅកាន់មីយ៉ាន់ម៉ាវិញ ស្របពេលដែលស្ថានភាពទីនោះ មិនទាន់ល្អប្រសើរផង ។ 
អ្នកនាំពាក្យរដ្ឋាភិបាលឥណ្ឌា នៅខែសីហាកន្លងទៅ បានឲ្យដឹងថា ឥណ្ឌាបានពិភាក្សាជាមួយនឹងរដ្ឋាភិបាលមីយ៉ាន់ម៉ា និងបង់ក្លាដែសស្តីពីការបញ្ជូនជនជាតិភាគតិចរ៉ូហ៊ីងយ៉ាប្រមាណបួនម៉ឺននាក់ ដែលកំពុងតែរស់នៅខុសច្បាប់នៅឥណ្ឌាត្រលប់ទៅមីយ៉ាន់ម៉ាវិញ។ នេះបើយោងតាមការចុះផ្សាយរបស់ សារព័ត៌មាន Bangkok Post ។
តាមការបញ្ជាក់របស់រដ្ឋាភិបាលក្រុងញូវដេលីនៅពេលនោះដែរ មានតែជនជាតិម៉ូស្លីមរ៉ូហ៊ីងយ៉ាប្រមាណ១៤០០០នាក់ប៉ុណ្ណោះ ដែលរស់នៅប្រទេសឥណ្ឌា ដោយបានចុះឈ្មោះស្របច្បាប់តាមរយៈភា្នក់ងារជនភៀសខ្លួនអង្គការសហប្រជាជាតិ ដែលបញ្ហានេះហើយដែលជំរុញឲ្យរដ្ឋាភិបាលឥណ្ឌាត្រូវបញ្ជូនជនជាតិរ៉ូហ៊ីងយ៉ាដទៃទៀតដែលមិនបានចុះឈ្មោះ ត្រូវត្រលប់ទៅប្រទេសដើមវិញ។
មកទល់នេះ មិនទាន់មានសេចក្តីជូនដំណឹងផ្លូវណាមួយរបស់រដ្ឋាភិបាលឥណ្ឌាថាតើការបណ្តេញជនជាតិរ៉ូហ៊ីងយ៉ាទៅមីយ៉ាន់ម៉ាវិញ នឹងត្រូវធ្វើពេលណាមួយជាក់លាក់ ឬក៏ត្រូវពន្យារពេលវិញយ៉ាងណាឡើយ ។ តែអ្វីដែលគួរឲ្យកត់សម្គាល់នោះ ស្ថានភាពសន្តិសុខមីយ៉ាន់ម៉ា នៅមិនទាន់អាចធានាបានឡើយ ពោលគឺ ការបាញ់ប្រហារគ្នារវាងកងកម្លាំងរដ្ឋាភិបាល និងក្រុមឧទ្ទាមនៅបន្តនៅក្នុងរដ្ឋ Rakhine ។
សូមរម្លឹកផងដែរថា ការប៉ះទង្គិចគ្នារវាងកងកម្លាំងរដ្ឋាភិបាលមីយ៉ាន់ម៉ា ជាមួយនឹងក្រុមឧទ្ទាមនៅក្នុងរដ្ឋ Rakhine ដែលកន្លែងសម្បូរទៅដោយជនជាតិរ៉ូហ៊ីងយ៉ារស់នៅ មិនមែនទើបតែផ្ទុះឡើងថ្មីៗនេះនោះទេ ហេតុការណ៍នេះ បានចាប់ផ្តើមតាំងពីខែតុលាឆ្នាំមុនមកម្ល៉េះ ។ ក៏ប៉ុន្តែ ដំណោះស្រាយនៅតែមិនទាន់មាន ដែលបានបណ្តាលឲ្យមានជនជាតិរ៉ូហ៊ីងយ៉ារាប់ពាន់ បានបន្តភៀសខ្លួនទៅកាន់ប្រទេសជិតខាង ។
យ៉ាងណាក៏ដោយ ជុំវិញនៃផែនការបណ្តេញជនជាតិរ៉ូហ៊ីងយ៉ាប្រមាណ៤ម៉ឺននាក់របស់រដ្ឋាភិបាល ឥណ្ឌា អាចនឹងមានការវិវត្តថ្មីនៅសបា្តហ៍ក្រោយ ។ នៅសប្តាហ៍ក្រោយនេះ លោកនាយករដ្ឋមន្ត្រីឥណ្ឌា Narendra Modi នឹងបំពេញទស្សនកិច្ចទៅកាន់មីយ៉ាន់ម៉ា និងជួបពិភាក្សាស្តីពីជនជាតិរ៉ូហ៊ីងយ៉ាជាមួយនឹងមេដឹកនាំកំពូល de facto មីយ៉ាន់ម៉ា លោកស្រី Aung San Suu Kyi ។ បើតាមភ្នាក់ងារព័ត៌មាន AFP ដែលបានដកស្រង់សម្តីរបស់មន្ត្រីជាន់ខ្ពស់ការបរទេសឥណ្ឌា លោកនាយករដ្ឋមន្ត្រី Modi ក៏នឹងលើកពីលទ្ធភាពអ្វីខ្លះដែលឥណ្ឌាអាចជួយធ្វើឲ្យស្ថានភាពមីយ៉ាន់ម៉ាល្អប្រសើរផងដែរ ៕
Tag:
ឥណ្ឌា
Rohingya
© រក្សាសិទ្ធិដោយ thmeythmey.com
