អន្តរជាតិ
សណ្ឋាគារមួយនៅបែលហ្ស៊ិកផ្តល់សេវាជួលត្រីកំដរសម្រាប់ភ្ញៀវដែលគេងម្នាក់ឯង 10, Sep 2017 , 7:19 pm
× សណ្ឋាគារមួយនៅក្រុង Charleroi ប្រទេសបែលហ្ស៊ិក បានដាក់សេវាកម្មជួលត្រីក្រហម ដើម្បីជួយកំដរការអផ្សុករបស់ភ្ញៀវដែលគេងក្នុងបន្ទប់តែម្នាក់ឯង។
ស្ត្រីនូវែសសេឡង់ម្នាក់ មានអារម្មណ៍តប់ប្រមល់យ៉ាងខ្លាំងនៅពេលទៅប្រទេសបែលហ្ស៊ិកតែម្នាក់ឯង។ នៅសណ្ឋាគារ Charleroi Airport គាត់បានសាកសួរឲ្យបុគ្គលិកសណ្ឋាគារដើម្បីស្វែងរកសត្វលេងកំដរ។ ពេលនោះ បុគ្គលិកសណ្ឋាគារបានបង្ហាញដបដែលដាក់ត្រីក្រហម ជាមួយតារាងតម្លៃ ៣.៥០អឺរ៉ូក្នុង១យប់។
មិនគួរឲ្យជឿ តែជារឿងពិត។ អ្នកស្រី David Dillen អ្នកគ្រប់គ្រងសណ្ឋាគារ Charleroi Airport បានអះអាងពីព័ត៌មានប្រាប់សារព័ត៌មាន Mashable ហើយវាក៏មិនមែនជារឿងថ្មីនោះដែរ។ យោងតាមការបញ្ចេញយោបល់នៅលើគេហទំព័រ Trip Advisor សេវាកម្មនេះ មានតាំងពីឆ្នាំ២០១៣ មកម្ល៉េះ ប៉ុន្តែទើបនឹងល្បីល្បាញនៅតាមបណ្តាញព័ត៌មាន។
សម្រាប់អ្នកស្រី David Dillen ការគិតពីសុខភាពត្រី ពិតជារឿងដ៏សំខាន់ ដោយសណ្ឋាគារមិនចេះតែធ្វើតាមតម្រូវចិត្តអតិថិជននោះឡើយ។ អ្នកស្រីលើកឡើងថា មុនសម្រេចចិត្តជួលត្រីក្រហមឲ្យអតិថិជន បុគ្គលិកសណ្ឋាគារមានការត្រួតពិនិត្យ និងសិក្សាយ៉ាងដិតដល់។
ឆ្លើយតបនឹងមតិមួយចំនួន ដែលបង្ហាញពីការអាណិតដល់សត្វត្រី អ្នកគ្រប់គ្រងសណ្ឋាគារ Charleroi Airport បានបញ្ជាក់ថា៖ «ត្រីទាំងនោះ រស់នៅក្នុងសណ្ឋាគារប្រមាណ៤ឆ្នាំមកហើយ ប្រសិនបើយើងមិនយកចិត្តទុកដាក់ពួកវាទេនោះ ពួកវាប្រហែលជាងាប់ជាយូរមកហើយ»៕
© រក្សាសិទ្ធិដោយ thmeythmey.com