អន្តរជាតិ
វៀតណាម សុំជប៉ុនឲ្យជួយពន្លឿនផ្តល់អាជ្ញាបណ្ណដើម្បីនាំផ្លែឈើវៀតណាមទៅលើជប៉ុន 16, Sep 2017 , 10:59 pm
× លោកនាយករដ្ឋមន្ត្រីវៀតណាម Nguyễn Xuân Phúc បានសន្យាជាមួយនឹងរដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្មជប៉ុន លោក Hiroshige ថា រដ្ឋាភិបាលវៀតណាម នឹងផ្តល់ការគាំពារ និងការគាំទ្រដល់អ្នកវិនិយោគជប៉ុននៅប្រទេសវៀតណាមគ្រប់បែបយ៉ាងតាមដែលអាចធ្វើទៅបាន ។ ការអះអាងបែបនេះ ធ្វើឡើងក្នុងពេលដែលរដ្ឋមន្ត្រីជប៉ុនបំពេញទស្សនកិច្ចនៅវៀតណាម ។
លោកនាយករដ្ឋមន្ត្រីវៀតណាម Nguyễn Xuân Phúc នៅថ្ងៃ១៤ កញ្ញា បានសាទរ និងសរសើរកិច្ចសហប្រតិបត្តិការរវាងជប៉ុននិងវៀតណាម នៅក្នុងជំនួបជាមួយនឹងជាមួយនឹងរដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ដែលកំពុងតែបំពេញទស្សនកិច្ចនៅក្នុងទីក្រុងហាណូយ។ នេះបើយោងតាមការចុះផ្សាយរបស់សារ ព័ត៌មានវៀតណាម Vietnam News ។
នៅក្នុងជំនួបដដែលនោះ រដ្ឋាភិបាលក្រុងហាណូយ បានស្នើឲ្យរដ្ឋាភិបាលក្រុងតូក្យូជួយពន្លឿនការផ្តល់អាជ្ញាបណ្ណសម្រាប់វៀតណាមដើម្បីអាចនាំចេញផ្លែឈើដូចជាផ្លែគូលែន និងផ្លែមៀនជាដើមនោះទៅកាន់ ប្រទេសជប៉ុន ។ វៀតណាម ក៏បានសុំឲ្យជប៉ុនជួយវៀតណាមក្នុងជួយសម្រួលផែនការសកម្មភាព អាទិភាពឧស្សាហកម្ម ដែលជាយុទ្ធសាស្ត្រឧស្សាហូបនីយកម្មរបស់ខ្លួន ដែលស្ថិតនៅក្នុងក្របខណ្ឌកិច្ចសហប្រតិបត្តិការវៀតណាម-ជប៉ុន២០២០ ។ នេះបើតាមប្រភពព័ត៌មានដដែល ។
ជាមួយគ្នានេះដែរ រដ្ឋមន្ត្រីសេដ្ឋកិច្ចជប៉ុន ក៏បានប្រាប់ភាគីភាគីវៀតណាមវិញថា ជប៉ុន ក៏បានត្រៀមខ្លួនជានិច្ចក្នុងការចែករំលែកបទពិសោធន៍ជាមួយនឹងភាគីវៀតណាមលើការកែទម្រង់សហគ្រាសសាធារណៈ និងពន្លឿនការពិនិត្យលើសំណើនាំការចូលផ្លែឈើទៅកាន់ជប៉ុនផងដែរ។ លោករដ្ឋមន្ត្រី សន្យាផ្តល់ការជ្រោមជ្រែងវៀតណាម ក្នុងដំណើរការអនុវត្តយុទ្ធសាស្ត្រឧស្សាតូបនីយកម្ម។
សូមជម្រាបផងដែរថា កន្លងមក ក្រៅពីមានកិច្ចសហប្រតិបត្តិការសេដ្ឋកិច្ចជិតស្និទ្ធិជាមួយនឹងវៀតណាម ជប៉ុន ក៏តែងតែជួយជ្រោមជ្រែងកិច្ចការការពារជាតិរបស់វៀតណាមផងដែរ។ ជប៉ុន បានផ្តល់នាវាល្បាតដល់វៀតណាម ដើម្បីល្បាតតាមដែនសមុទ្ររបស់ខ្លួន ជាពិសេសនោះ ដែនសមុទ្រ ដែលកំពុងតែមានជម្លោះជាមួយនឹងចិនតែម្តង ៕
© រក្សាសិទ្ធិដោយ thmeythmey.com