អន្តរជាតិ
គីម ជុងអ៊ុន តែងតាំងប្អូនស្រីខ្លួនឲ្យធ្វើការក្នុង«ការិយាល័យនយោបាយ»ដើម្បីពង្រឹងអំណាច 09, Oct 2017 , 11:48 am
× លោក គីម ជុងអ៊ុន បានសម្រេចតែងតាំងប្អូនស្រីរបស់ខ្លួន គីម យូចុង (Kim Yo-jong)ជាសមាជិកការិយាល័យនយោបាយដ៏មានឥទ្ធិពលនៃបក្សពលករកូរ៉េខាងជើងចុងសប្តាហ៍កន្លងទៅ។ ការសម្រេចដាក់ប្អូនស្រីខ្លួនកៀកនឹងក្បាលម៉ាស៊ីនដឹកនាំរដ្ឋបែបនេះជាជំហានមួយក្នុងការពង្រឹង និងក្តោបក្តាប់អំណាចនៃក្រុមគ្រួសារត្រកូលគីមនេះដែរ។
អ្នកស្រី គីម យូចុង វ័យ ៣០ឆ្នាំជាប្អូនស្រីបង្កើតរបស់ប្រមុខដឹកនាំកូរ៉េខាងជើងលោក គីម ជុងអ៊ុន ត្រូវបានតែងតាំងឲ្យក្លាយជាសមាជិកការិយាល័យនយោបាយនៃគណបក្សពលករកូរ៉េខាងជើងកាលពីចុងសប្តាហ៍មុន។ នេះបើតាមការចុះផ្សាយរបស់សារព័ត៌មានអាមេរិក Washington Post។
ការសម្រេចតែងតាំងនេះធ្វើឡើងប៉ុន្មានថ្ងៃប៉ុណ្ណោះមុនការមកដល់នៃពិធីខួបលើកទី ៧២ នៃការបង្កើតគណបក្សពលករដែលកើតចេញពីក្រុមគ្រួសារត្រកូលគីមនោះ។ អ្នកវិភាគស្ថានការណ៍បានវាយតម្លៃថា ការសម្រេចតែងតាំងប្អូនស្រីបង្កើតរបស់ខ្លួនឲ្យចូលបម្រើការងារក្នុងស្ថាប័នដ៏មានឥទ្ធិពល និងកៀកក្បាលម៉ាស៊ីនដឹកនាំនេះជាយុទ្ធសាស្ត្រពង្រឹងអំណាចគ្រប់គ្រងរដ្ឋរបស់គ្រួសារត្រកូលគីមនេះផង។
អ្នកស្រី គីម យូចុង ចេញមុខចេញមាត់ច្រើនក្នុងបរិបទនយោបាយកូរ៉េខាងជើងក្នុងរយៈពេលប៉ុន្មានឆ្នាំចុងក្រោយ។ លោកស្រីចូលរួមក្នុងដំណើរការនៃការផ្ទេអំណាចមកលោក គីម ជុងអ៊ុន បន្ទាប់ពីការស្លាប់របស់លោក គីម ជុង អ៊ីល ជាឪពុករបស់ខ្លួនផង។ ក្នុងឆ្នាំ ២០១៤ លោកស្រីបានក្លាយជាអនុប្រធាននាយកដ្ឋានឃោសនាការនៃបក្សពលករផងដែរ។
ដោយឡែក មកដល់ពេលបច្ចុប្បន្ននេះគេបារម្ភថា នៅក្នុងពិធីរម្លឹកខួបនៃការបង្កើតគណបក្សពលករនៅថ្ងៃអង្គារ ទី ១០ ខែតុលា កូរ៉េខាងជើងនឹងចាប់ផ្តើមបង្ករឿងដោយបាញ់បង្ហោះមីស៊ីលទៀតផង។ ជាធម្មតាកូរ៉េខាងជើងតែបាញ់សាកល្បងអាវុធរបស់ខ្លួននៅពេលដែលមានកម្មវិធីធំៗ ដូចជាខួបកំណើតបក្សនិងមេដឹកនាំជាដើមផងដែរ។
នៅថ្ងៃសៅរ៍ ប្រធានាធិបតីអាមេរិកលោក ដូណាល់ ត្រាំ បានព្រមានកូរ៉េខាងជើងជាថ្មីម្តងទៀតតាមរយៈសារបង្ហោះតាមគណនី Twitter របស់ខ្លួន។ លោកសង្កត់ធ្ងន់ថា ការប្រើប្រាស់ការចរចាការទូត និងព្រមព្រៀងគ្នាជាមួយកូរ៉េខាងជើងមិនបានបង្កើតអ្វីជាផ្លែផ្កាសោះ ហើយវាមានវិធីតែមួយគត់ដែលអាចដោះស្រាយបាន។ ប៉ុន្តែមេដឹកនាំរូបនេះមិនបានបកស្រាយឲ្យអស់សង្ស័យឡើយថា តើវិធីតែមួយគត់នោះជាអ្វីឲ្យប្រាកដនោះ។
ដល់ថ្ងៃអាទិត្យ មេដឹកនាំកំពូលកូរ៉េខាងជើង គីម ជុងអ៊ុន ក៏បានប្រាប់មន្ត្រីរបស់ខ្លួនថា កម្មវិធីនុយក្លេអ៊ែរកូរ៉េខាងជើងជាអាវុធដ៏មានឥទ្ធិពលខ្លាំងដើម្បីការពារអធិបតេយ្យ និងជោគវាសនារបស់កូរ៉េខាងជើងដើម្បីទប់ទល់នឹងក្រុមចក្រព័ត្តអាមេរិកផង។
Tag:
គីម ជុងអ៊ុន
គីម យូចុង
ដូណាល់ ត្រាំ
© រក្សាសិទ្ធិដោយ thmeythmey.com