អន្តរជាតិ
រដ្ឋាភិបាលអ៊ីតាលីថ្មីថា ខ្លួនមិនមែនជារដ្ឋាភិបាល«បាទទាន» ចាំតែស្តាប់រាល់បញ្ជារបស់រដ្ឋអឺរ៉ុបឡើយ 08, Jun 2018 , 10:39 pm
× រដ្ឋាភិបាលអ៊ីតាលីថ្មីដែលមាននិន្នាការប្រឆាំងអឺរ៉ុបនោះបានបញ្ជាក់ថា ខ្លួនមិនមែនចាំតែស្តាប់បញ្ជាប្រទេសអឺរ៉ុបណាមួយឡើយជុំវិញការដាក់ទណ្ឌកម្មរុស្ស៊ី ហើយខ្លួនក៏ចង់ពង្រឹងចំណងមិត្តភាពជាមួយរុស្ស៊ីដែរ។ នេះជាការឆ្លើយតបចំពោះបក្សសម្ព័ន្ធយោធាណាតូដែលទាមទារឲ្យអ៊ីតាលីរក្សាទណ្ឌកម្មប្រឆាំងរុស្ស៊ីកន្លងមកនេះ។
«រដ្ឋាភិបាលថ្មីរបស់អ៊ីតាលីមិនមែនអនុវត្តគោលនយោបាយ បាទទាន ដូចមុនឡើយ»។ នេះជាសម្តីរបស់ឧបនាយករដ្ឋមន្ត្រី និងជារដ្ឋមន្ត្រីអភិវឌ្ឍសេដ្ឋកិច្ច Luigi Di Maio នៅថ្ងៃព្រហស្បតិ៍ដោយឆ្លើយតបនឹងការព្រមានរបស់បក្សសម្ព័ន្ធយោធាណាតូចំពោះអ៊ីតាលីជុំវិញការដកទណ្ឌកម្មប្រឆាំងរុស្ស៊ី។
បើតាមសារព័ត៌មានរុស្ស៊ី RT មន្ត្រីជាន់ខ្ពស់នៃរដ្ឋាភិបាលក្រុងរ៉ូមថ្មីនេះ បានថ្លែងថា រដ្ឋបាលថ្មីនឹងមិនកំសាកស្តាប់បញ្ជារបស់រដ្ឋដទៃឡើយ ហើយក៏គ្មានចេតនាណាមួយប្រើប្រាស់គោលនយោបាយការទូតរណបតាមគេរហូតដែរ។
តាមពិតទៅរដ្ឋាភិបាលថ្មីរបស់អ៊ីតាលីនេះបង្ហាញការជំទាស់ចំពោះឥរិយាបថប្រទេសអឺរ៉ុបផ្សេងទៀតចំពោះរុស្ស៊ីកន្លងមក ហើយនាយករដ្ឋមន្ត្រីអ៊ីតាលី Giuseppe Conte ក៏បង្ហាញជំហរផ្សាចង់ភ្ជាប់ទំនាក់ទំនងឲ្យកាន់តែស៊ីជម្រៅជាមួយរុស្ស៊ី និងដកទណ្ឌកម្មសេដ្ឋកិច្ចផងដែរ ។
ម្យ៉ាងទៀតការប្រកាសបែបនេះក៏ជាការឆ្លើយតបនឹងសម្តីរបស់ប្រមុខបក្សសម្ព័ន្ធយោធាណាតូ និងអាមេរិកដែលព្រមានអ៊ីតាលីជុំវិញការឈានទៅដកទណ្ឌកម្មប្រឆាំងរុស្ស៊ីដែរ។
អគ្គលេខាធិការអង្គការណាតូលោក Jens Stoltenberg បានថ្លែងដូច្នេះ៖« យើងត្រូវរក្សាកិច្ចសន្ទនានយោបាយជាមួយរុស្ស៊ី ប៉ុន្តែទណ្ឌកម្មសេដ្ឋកិច្ចនៅតែសំខាន់»។ ចំណែកឯកអគ្គរដ្ឋទូតអាមេរិកប្រចាំអង្គការណាតូលោក Kay Bailey វិញបានព្រមានអ៊ីតាលីចំៗថា ក្នុងនាមជាសមាជិកណាតូ ប្រទេសនេះត្រូវរក្សាទណ្ឌកម្មប្រឆាំងរុស្ស៊ីរហូតដល់ប្រទេសនេះប្តូរឥរិយាបទ។ បើមិនដូច្នោះទេ វានឹងធ្វើឲ្យស្ថានការណ៍កាន់តែអាក្រក់។
ត្រឡប់មកវិញលោក Luigi Di Maio បានបញ្ជាក់ផងដែរថា រដ្ឋាភិបាលលោកនឹងបន្តកិច្ចពិភាក្សានយោបាយជាមួយរុស្ស៊ី ហើយទោះក្នុងនាមជាសមាជិករបស់ណាតូក៏ដោយ អ៊ីតាលីគ្មានចេតនាធ្វើប៉ះពាល់ទំនាក់ទំនងជាមួយរុស្ស៊ីឡើយ។
មន្ត្រីជាន់ខ្ពស់រូបនេះក៏ពន្យល់បន្ថែមថា អ៊ីតាលីក៏បន្តធ្វើយ៉ាងណារក្សាប្រយោជន៍ជាតិខ្លួន រាល់ការចរចា និងកិច្ចសហប្រតិបត្តិការនៅពេលអនាគតជាមួយសហភាពអឺរ៉ុបផងដែរ។ លោកសង្កត់ធ្ងន់ថា បច្ចប្បន្ននេះ អ៊ីតាលីបានឃើញលទ្ធផលខ្លះហើយ ក្រោយពេលដែលរដ្ឋាភិបាលចម្រុះរបស់លោករក្សាជំហររឹងត្អឹង និងជំទាស់សហភាពអឺរ៉ុបនោះ៕
Tag:
រុស្ស៊ី
អ៊ីតាលី
អឺរ៉ុប
© រក្សាសិទ្ធិដោយ thmeythmey.com