កីឡាអន្តរជាតិ
អន្តរជាតិ
កាតា បង្ហាញកីឡដ្ឋានដ៏អស្ចារ្យរបស់ខ្លួនសម្រាប់ប្រកួតវគ្គផ្តាច់ព្រ័ត្រ World Cup
18, Dec 2018 , 9:19 pm
×![]()
ដោយ: ទេព ពិទូរ្យ
អ្នករៀបចំការប្រកួតពានរង្វាន់កីឡាបាល់ទាត់ពិភពលោក FIFA World Cup ឆ្នាំ ២០២២ នៅកាតា បានបង្ហាញការរចនាកីឡដ្ឋានដ៏អស្ចារ្យមួយរបស់ខ្លួនដែលនឹងត្រូវយកមកប្រើប្រាស់សម្រាប់ជំនួបវគ្គផ្តាច់ព្រ័ត្រនៃព្រឹត្តិការណ៍ជាប្រវត្តិសាស្ត្ររបស់ប្រទេសក្នុងតំបន់អាស៊ីមួយនេះ។
កីឡដ្ឋានមានឈ្មោះថា Lusail ដែលអាចផ្ទុកអ្នកទស្សនាដល់ទៅ ៨០០០០នាក់ នឹងក្លាយជាទីលានធំបំផុតសម្រាប់ព្រឹត្តិកាណ៍នេះ និងជាកីឡដ្ឋានធំទី១ក្នុងពិភពអារ៉ាប់។
មានចម្ងាយ ១៥ គីឡូម៉ែត្រពីទីក្រុងដូហា កីឡដ្ឋានដែលរចនាឡើងដោយក្រុមហ៊ុនរបស់ចក្រភពអង់គ្លេស Foster + Partners នេះក៏នឹងត្រូវប្រើសម្រាប់ការប្រកួតបើកឆាក World Cup ផងដែរ។
ព្រឹត្តិការណ៍កីឡាបាល់ទាត់លំដាប់ទី១ពិភពលោកនៅកាតានេះ គឺជាលើកទីមួយដែលត្រូវធ្វើនៅរដូវរងារដែលនឹងចាប់ផ្តើមពីថ្ងៃទី ២១ ខែវិច្ឆិកា ឆ្នាំ ២០២២ តទៅ។ ការប្រកួតប្រជែងនេះអាចនឹងមានការចូលរួមរហូតដល់៤៨ក្រុមជាលើកដំបូងតែម្តង តែត្រូវរង់ចាំការសម្រេចចុងក្រោយរបស់ FIFA នៅខែមីនា ឆ្នាំ២០១៩។
កាតា បានឈ្នះសិទ្ធិដេញថ្លៃធ្វើម្ចាស់ផ្ទះដើម្បីរៀបចំព្រឹត្តិការណ៍ World Cup 2022 រយៈពេល៤ឆ្នាំមកហើយពោលគឺតាំងពីឆ្នាំ២០១៤ ដែលត្រូវប្រកាសនៅប្រេស៊ីល។ តែបើគិតមកទល់ពេលនេះ ពួកគេនៅសល់ពេលតែ៤ឆ្នាំទៀតប៉ុណ្ណោះដើម្បីរៀបចំហេដ្ឋារចនាសម្ព័ន្ធ និងទីលានប្រកួត។
ដំណើរការសាងសង់ Lusail Stadium បច្ចុប្បន្នរួចរាល់បាន៨០ភាគរយហើយ និងរំពឹងថារួចរាល់នៅឆ្នាំ២០២០។ លោក Al-Thawadi អគ្គលេខាធិការនៃគណៈកម្មាធិការជាន់ខ្ពស់របស់កាតា និយាយថាការចំណាយសរុបនៃការសាងសង់កីឡាដ្ឋានទាំងអស់ គឺប្រហែល ៧ ពាន់លានដុល្លារអាមេរិក៕
Tag:
បាល់ទាត់
FIFA World Cup
កាតា
© រក្សាសិទ្ធិដោយ thmeythmey.com
