អន្តរជាតិ
វ៉េណេស៊ុយអេឡា បង្វែរការនាំចេញប្រេងទៅទីផ្សារអឺរ៉ុបនិងអាស៊ី ក្រោយរងទណ្ឌកម្មអាមេរិក 07, Feb 2019 , 12:09 pm
រូបភាព Reuters
× បន្ទាប់ពីវិបត្តិនយោបាយនៅវ៉េណេស៊ុយអេឡាឡើងកម្ដៅខ្លាំង អាមេរិកដែលគាំទ្រមេដឹកនាំប្រឆាំង ហ័ន ក្វៃដូ បានសម្រេចចិត្តដាក់ទណ្ឌកម្មលើក្រុមហ៊ុនប្រេងរដ្ឋវ៉េណេស៊ុយអេឡា PDVSA ។ គោលដៅនៃការដាក់ទណ្ឌកម្មនេះ គឺកាត់ផ្ដាច់ប្រភពហិរញ្ញវត្ថុ និងជាការដាក់សម្ពាធលើរបបដឹកនាំលោក នីកូឡាស់ ម៉ាឌុយរ៉ូ ។ ប៉ុន្តែក្រុងការ៉ាកាស់ ក៏មិននៅស្ងៀមដែរប្រឈមមុខនឹងចំណាត់ការរបស់ក្រុងវ៉ាស៊ីនតោន ដោយបានសម្លឹងរកទីផ្សារថ្មីដើម្បីលក់ប្រេងរបស់ខ្លួន។
អាមេរិក គឺជាទីផ្សារដ៏ធំមួយរបស់វ៉េណេស៊ុយអេឡាក្នុងជំនួញប្រេងឆៅរបស់ខ្លួន។ ប៉ុន្តែវិបត្តិនយោបាយដណ្ដើមអំណាចនៅវ៉េណេស៊ុយអេឡា ធ្វើឲ្យអាមេរិកសម្រេចដាក់ទណ្ឌកម្មលើក្រុមហ៊ុនប្រេង PDVSA នៅពេលថ្មីៗនេះ។ ក្រុមហ៊ុន PDVSA ដែលជាក្រុមហ៊ុនរដ្ឋ ក៏ត្រូវរកច្រកចេញពីទណ្ឌកម្មរបស់ម៉ូយប្រេងរបស់ខ្លួន។
លោក Ronny Romero ទីប្រឹក្សាបច្ចេកទេសក្រុមហ៊ុន PDVSA បានប្រាប់សារព័ត៌មានរុស្ស៊ី Sputnik ថា ក្រុងការ៉ាកាស់នឹងធ្វើអ្វីគ្រប់យ៉ាងដើម្បីកាត់បន្ថយផលប៉ះពាល់ពីទណ្ឌកម្មរបស់អាមេរិកក្នុងវិស័យប្រេងនេះ។ លោក Romero ចាត់ទុកទណ្ឌកម្មអាមេរិកជារឿងខុសច្បាប់ ខណៈវ៉េណេស៊ុយអេឡានាំចេញប្រេងទៅអាមេរិកចំនួនប្រហែល៥សែនបារ៉ែលក្នុងមួយថ្ងៃ។ ជំនួសឲ្យទីផ្សារអាមេរិក វ៉េណេស៊ុយអេឡានឹងប្ដូរទីផ្សារទៅអឺរ៉ុប និងអាស៊ីវិញ។
តំណាងវ៉េណេស៊ុយអេឡានៅអង្គការប្រទេសនាំចេញប្រេង (OPEC) រូបនេះប្រាប់អតិថិជនអឺរ៉ុប និងអាស៊ី កុំបាច់ភ័យបារម្ភនឹងទណ្ឌកម្មរបស់អាមេរិកឲ្យសោះ ព្រោះវិធានការនេះសំដៅលើក្រុមហ៊ុនអាមេរិករកស៊ីជាមួយវ៉េណេស៊ុយអេឡាប៉ុណ្ណោះ។ យ៉ាងណាមិញ បើតាមមន្ត្រីដដែលនេះ រុស្ស៊ី និងចិនមិនព្រួយអ្វីទេនឹងទណ្ឌកម្មអាមេរិក ខណៈមហាអំណាចទាំងពីរនេះក៏ជាម៉ូយប្រេងសំខាន់ៗរបស់វ៉េណេស៊ុយអេឡាដែរ។
កាលពីសប្ដាហ៍មុន ក្រុងវ៉ាស៊ីនតោនបានប្រកាសដាក់ទណ្ឌកម្មលើក្រុមហ៊ុនប្រេងរដ្ឋវ៉េណេស៊ុយអេឡា និងបានរឹបអូសទ្រព្យសម្បត្តិជាច្រើនផង។ ទណ្ឌកម្មនេះ ក៏នឹងប៉ះពាល់ដល់ការនាំចេញប្រេងរបស់រដ្ឋអាមេរិកឡាទីនមួយនេះដែលតម្លៃដល់ទៅ១១ពាន់លានដុល្លារនៅឆ្នាំខាងមុខទៀត។ ទោះទទួលស្គាល់ថា ទណ្ឌកម្មនេះនឹងមានផលអវិជ្ជមានសម្រាប់អាមេរិក រដ្ឋមន្ត្រីរតនាគារ Steven Mnuchin អះអាងថា ក្រុមហ៊ុនចម្រាញ់ប្រេងនៅអាមេរិកនឹងរងផលប៉ះពាល់មិនខ្លាំងឡើយ។
សូមរំឭកថា វ៉េណេស៊ុយអេឡា ជាប្រទេសមានប្រេងបម្រុងទុកធំជាងគេលើពិភពលោក។ សេដ្ឋកច្ចប្រទេសនេះពឹងផ្អែកស្ទើរទាំងស្រុងលើការនាំចេញប្រេងឆៅ ដែលមានចំណែក៩៨ភាគរយនៃការនាំចេញសរុប និងស្មើ៥០ភាគរយនៃផលិតក្នុងស្រុកសរុបផង។ ការធ្លាក់ចុះតម្លៃប្រេងលើទីផ្សារអន្តរជាតិ គួបផ្សំទណ្ឌកម្មអាមេរិក ធ្វើឲ្យរដ្ឋាភិបាលលោក ម៉ាឌុយរ៉ូ កាន់តែខ្សត់ប្រាក់ក្នុងឃ្លាំង និងកំពុងពឹងផ្អែកខ្លាំងលើមាសវិញ៕
Tag:
វ៉េណេស៊ុយអេឡា
អាមេរិក
អឺរ៉ុប
អាស៊ី
© រក្សាសិទ្ធិដោយ thmeythmey.com