អន្តរជាតិ
វៀតណាម-ហ្វីលីពីន ព្រមព្រៀងគ្នាប្រយុទ្ធប្រឆាំងគ្រឿងញៀន និងប្រតិបត្តិការសង្គ្រោះក្នុងដែនសមុទ្រ
11, Mar 2019 , 9:51 am
×![]()
រដ្ឋាភិបាលក្រុងម៉ានីល និងរដ្ឋាភិបាលក្រុងហាណូយ បានព្រមព្រៀងធ្វើការរួមគ្នាដើម្បីប្រយុទ្ធប្រឆាំងនឹងបញ្ហាគ្រឿងញៀន និងធ្វើប្រតិបត្តិការរុករក និងសង្គ្រោះនៅក្នុងដែនសមុទ្រទៀតផង។ ភាគីទាំងពីរ ក៏បានប្តេជ្ញារក្សាសមុទ្រចិនខាងត្បូង ជាសមុទ្រប្រកបដោយសន្តិសុខ និងសន្តិភាពផងដែរ។
តាមរយៈជំនួបទ្វេភាគីលើកទី៩ក្នុងរដ្ឋធានីម៉ានីលនៅថ្ងៃ៦ មីនា រដ្ឋមន្ត្រីការបរទេសហ្វីលីពីនលោក Teodoro Lopez Locsin និងសមភាគីវៀតណាមលោក Phạm Bình Minh បានបង្ហាញសុទិដ្ឋិនិយមលើភាពល្អប្រសើរនៃកិច្ចសហប្រតិបត្តិការនៅក្នុងវិស័យការពារជាតិ និងសន្តិសុខ ក៏ដូចជាការចែករំលែកព័ត៌មាន និងបទពិសោធន៍រវាងកងទ័ពរបស់ប្រទេសទាំងពីរ។ នេះបើយោងតាមការចុះផ្សាយរបស់ភ្នាក់ងារព័ត៌មានវៀតណាម Vietnam News។
តាមប្រភពព័ត៌មានដដែលនោះ នាជំនួបដដែលនោះ ប្រមុខការទូតទាំងពីរ បានឯកភាពក្នុងការធ្វើការរួមគ្នាដើម្បីប្រយុទ្ធប្រឆាំងអំពើភេរវកម្ម, បទល្មើសឆ្លងព្រំដែន និងជាពិសេសនោះលើប្រតិបត្តិការពាក់ព័ន្ធគ្រឿងញៀន និងការស្វែងរក និងសង្គ្រោះនៅក្នុងសមុទ្រ។ ការធានាពីកំណើនទំហំពាណិជ្ជកម្មមិនឲ្យក្រោម២០ភាគរយ ក៏ស្ថិតនៅក្នុងចំណុចឯកភាពរបស់ភាគីទាំងពីរផងដែរ។
ពាក់ព័ន្ធនឹងបញ្ហាក្នុងតំបន់វិញ ប្រមុខការទូតហ្វីលីពីន បានកើតសរសើរវៀតណាម ក្នុងការដឹកនាំ និងសម្របសម្រួលជំនួបកំពូលរបស់មេដឹកនាំអាមេរិក និងកូរ៉េខាងជើង ដែលបានស្តែងឲ្យឃើញពីតួនាទីដ៏សកម្មរបស់វៀតណាមលើបញ្ហាក្នុងតំបន់ និងអន្តរជាតិ។ ភាគីទាំងពីរ ក៏បានប្តេជ្ញារួមគ្នាក្នុងការធ្វើឲ្យអាស៊ាន ក្លាយជាអង្គការមួយក្នុងការផ្តល់ដំណោះស្រាយយុទ្ធសាស្ត្រសម្រាប់បញ្ហាក្នុងតំបន់ផងដែរ។
ជាមួយគ្នាផងដែរនោះ ភាគីទាំងពីរ ក៏មិនភ្លេចលើកយកបញ្ហាសមុទ្រចិនខាងត្បូងមកជជែកដែរ។ តាមរយៈជំនួបនោះ ខណៈប្តេជ្ញារួមគ្នាបង្កើតក្រមប្រតិបត្តិឲ្យបានឆាប់ ភាគីទាំងពីរ ក៏បានអះអាងជាថ្មីក្នុងការគោរព និងអនុវត្តតាមបទដ្ឋានច្បាប់ដែលបង្កើតកន្លងមកក្នុងការធានាឲ្យបានថា សមុទ្រចិនខាងត្បូង មិនត្រូវបានធ្វើយោធូបនីយកម្ម ហើយស្ថានភាពត្រូវស្ថិរភាព និងសន្តិភាព៕
Tag:
ហ្វីលីពីន
វៀតណាម
© រក្សាសិទ្ធិដោយ thmeythmey.com
