ជាតិ
UN រៀបចំមហាពិធីវិសាខបូជាលើកទី១៦ នៅវៀតណាម ពីថ្ងៃទី១២ ដល់ថ្ងៃទី១៤ ខែឧសភា 13, May 2019 , 10:39 pm
![](https://image.thmeythmey.com/pictures/2019/05/13/thumb2/60051636_2332553540362936_3866778581510127616_n.jpg)
×![]()
ប្រតិភូប្រមាណ១៥០០អង្គ/នាក់ ពី១០៦ប្រទេស និងតំបន់ រួមទាំងអង្គការសហប្រជាជាតិ (UN) ចូលរួមក្នុងមហាពិធីវិសាខបូជាអង្គការសហប្រជាជាតិ (UN Day of Vesak) លើកទី១៦ នៅខេត្ត Ha Nam ប្រទេសវៀតណាម ពីថ្ងៃទី១២ ដល់ថ្ងៃទី១៤ ខែឧសភា។
វិសាខបូជា គឺជាបុណ្យដ៏ធំមួយ ក្នុងព្រះពុទ្ធសាសនា ដើម្បីរម្លឹកដល់ព្រឹត្តិការណ៍ដ៏ពិសេសចំនួន៣ ដែលទាក់ទងនឹងព្រះសមា្មសម្ពុទ្ធ។ ព្រឹត្តិការណ៍ទាំងនោះ គឺ ការប្រសូត ការត្រាស់ដឹង និងការចូលនិព្វាន។ អង្គការសហប្រជាជាតិ បានអនុម័តនិងទទួលស្គាល់ វិសាខបូជា ជាបុណ្យអន្តរជាតិ កាលពីថ្ងៃទី១៥ ខែធ្នូ ឆ្នាំ១៩៩៩ ។
កាលពីឆ្នាំ២០០០ អង្គការសហប្រជាជាតិ បានប្រារព្ធពិធីបុណ្យវិសាខបូជាអន្តរជាតិជាលើកដំបូងនៅទីស្នាក់ការរបស់ខ្លួននៅក្រុងញូវយ៉ក ដោយមានតំណាងជាង៣០ប្រទេសចូលរួម។ ចាប់ពីឆ្នាំ២០០៤ ដល់ឆ្នាំ២០១៩នេះ អង្គ ជំនួប Asian Summit សម្រាប់ព្រឹត្តិការណ៍ UN Day of Vesak ដំណើរការដល់១៦លើក ដោយ១២លើកនៅថៃ ១លើកនៅស្រីលង្កា ហើយនេះជាលើកទី៣ដែលវៀតណាមធ្វើជាម្ចាស់ផ្ទះ។
ព្រះធម្មឃោសាចារ្យបណ្ឌិតឃី សុវណ្ណរតនា ព្រះសាកលវិទ្យាធិការរងនៃពុទ្ឋិកសាកលវិទ្យាល័យ ព្រះសីហនុរាជ និងមន្ត្រីសង្ឃជាន់ខ្ពស់ជាច្រើនអង្គទៀត ក៏បាននិមន្តចូលរួមក្នុងព្រឹត្តិការណ៍នេះដែរ។ ព្រះអង្គបានបញ្ជាក់នៅលើហ្វេសប៊ុកថា ក្រៅពីថ្លែងសង្កថា និងអានសារអបអរសាទររបស់សម្តេចព្រះអគ្គមហាសង្ឃរាជាធិបតី ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា ព្រះអង្គក៏បានធ្វើជាវាគ្មិនមួយអង្គក្រោមប្រធានបទ «វិធីសាស្ត្រពុទ្ធសាសនាសម្រាប់ការអប់រំសីលធម៌សាកល» ផងដែរ។
ថ្នាក់ដឹកនាំជាច្រើនដែលបានចូលរួមក្នុងព្រឹត្តិការណ៍នេះ មានដូចជាលោកនាយករដ្ឋមន្ត្រីវៀតណាម Nguyen Xuan Phoc, ប្រធានាធិបតីមីយ៉ាន់ម៉ា Min Myint, នាយករដ្ឋមន្ត្រីនេប៉ាល់ KP Sharma Oliç អនុប្រធានាធិបតីឥណ្ឌា Venkaiah Naidu និងលោកស្រី Armida Salsiah Alisjahbana លេខាប្រតិបត្តិអង្គការ UNESCAP ជាដើម៕
© រក្សាសិទ្ធិដោយ thmeythmey.com