អន្តរជាតិ
នយោបាយអន្តរជាតិ
កូរ៉េខាងត្បូងធ្វើសមយុទ្ធយោធា ខណៈភាពតានតឹងជាមួយជប៉ុនកាន់តែខ្លាំង
26, Aug 2019 , 2:06 pm
ប្រភពរូប៖ AFP
×![]()
ដោយ: ធៀន ភារិន្ទ
កូរ៉េខាងត្បូង កាលពីថ្ងៃទី២៥ ខែសីហា បានចាប់ផ្តើមធ្វើសមយុទ្ធយោធារយៈពេលពីរថ្ងៃ ដើម្បីត្រៀមខ្លួនក្នុងការការពារកោះមួយនៅក្នុងសមុទ្រខាងកើត ជាពិសេសគឺប្រឆាំងនឹងការលួចវាយប្រហារពីសំណាក់យោធាជប៉ុនដោយប្រការណាមួយ។ បន្ថែមពីលើនេះ ការធ្វើសមយុទ្ធយោធា ធ្វើឲ្យភាពតានតឹងរវាងប្រទេសទាំងពីរកាន់តែធ្លាក់ដុនដាបខ្លាំងឡើងៗ។
ការធ្វើសមយុទ្ធយោធាប្រចាំឆ្នាំទីក្រុងសេអ៊ូល ត្រូវបានគេប្រារព្ធឡើងតែប៉ុន្មានថ្ងៃប៉ុណ្ណោះ បន្ទាប់ពីកូរ៉េខាងត្បូងលុបចោលកិច្ចព្រមព្រៀងចែករំលែកព័ត៌មានសម្ងាត់យោធាជាមួយជប៉ុន ដោយសារតែរឿងបង្ខំឲ្យប្រជាជនកូរ៉េធ្វើការ ក្នុងអំឡុងសម័យសង្គ្រាមលោកលើកទី២។
តាមការចុះផ្សាយរបស់ទីភ្នាក់ងារព័ត៌មាន AFP មន្ត្រីកងទ័ពជើងទឹកកូរ៉េខាងត្បូង បាននិយាយថា ការហ្វឹកហាត់យោធាបែបនេះ ត្រូវបានដាក់ឈ្មោះជាថ្មីថា «សមយុទ្ធការពារទឹកដីក្នុងសមុទ្រខាងកើត» ក្នុងគោលបំណងការពារប្រជុំកោះដុកដូ (Dokdo) និងតំបន់នៅជុំវិញសមុទ្រជប៉ុន។ ដោយមិនបានបញ្ជាក់ព័ត៌មានលម្អិត មន្ត្រីរូបនេះ បានបន្តថា សមយុទ្ធនេះ នឹងមាននាវាសង្គ្រាម និងយន្តហោះចម្បាំង។
ការធ្វើសមយុទ្ធបែបនេះ កើតឡើង២ដងក្នុងមួយឆ្នាំ ដោយបានចាប់ផ្តើមឡើងតាំងពីឆ្នាំ១៩៨៦មកម្ល៉េះ ។ ជាធម្មតា សមយុទ្ធនេះ ធ្វើឡើងក្នុងចន្លោះខែកញ្ញា និងធ្នូ ។
បន្ទាប់ពីជប៉ុនបានដាក់អាណានិគមលើកូរ៉េអស់រយៈពេល៣៥ឆ្នាំរួចមក រដ្ឋាភិបាលទីក្រុងសេអ៊ូល បានចូលទៅគ្រប់គ្រងកូនកោះមួយនៅក្នុងសមុទ្រជប៉ុន ចាប់តាំងពីឆ្នាំ១៩៤៥ មកម្លេះ។ ប៉ុន្តែទង្វើនេះ ត្រូវបានជប៉ុនបដិសេធ និងចោទកូរ៉េខាងត្បូងថាជាការគ្រប់គ្រងដោយខុសច្បាប់។
សូមបញ្ជាក់ថា មួយរយៈចុងក្រោយមកនេះ ភាពចម្រូងចម្រាសរវាងកូរ៉េខាងត្បូង និងជប៉ុនកាន់តែក្តៅឡើងៗ ដោយសារតែរឿងសាលក្រមរបស់កូរ៉េខាងត្បូងបញ្ជាឲ្យក្រុមហ៊ុនជប៉ុនសងសំណងទៅជនរងគ្រោះពីការបង្ខំឲ្យធ្វើការធ្ងន់ធ្ងរអំឡុងសម័យសង្គ្រាម។
ចំណែកទីក្រុងតូក្យូ បានចេញវិធានការសងសឹកវិញ ដោយរឹតត្បិតការនាំចេញធាតុកម្រ ៣ប្រភេទពាក់ព័ន្ធនឹងការផលិតគ្រឿងអេឡិចត្រូនិចទៅកូរ៉េខាងត្បូង។ ដោយសារតែបញ្ហាដូចខាងលើ ជប៉ុននិង កូរ៉េខាងត្បូង បានលុបចោល «បញ្ជីដៃគូរពាណិជ្ជកម្មទុកចិត្តបាន» ជាមួយគ្នា ជាពិសេស គឺឈានដល់ការដកខ្លួនចេញពីកិច្ចព្រមព្រៀងចែករំលែកព័ត៌មានសម្ងាត់យោធាថែមទៀត៕
Tag:
កូរ៉េខាងត្បូង
ជប៉ុន
© រក្សាសិទ្ធិដោយ thmeythmey.com
