សមាគមមីក្រូហិរញ្ញវត្ថុកម្ពុជា រៀបចំមហាសន្និបាតប្រចាំឆ្នាំលើកទី១៤ និងសម្ពោធគម្រោងបរិយាបន្នហិរញ្ញវត្ថុ ព្រមទាំង បោះឆ្នោតជ្រើសរើសក្រុមប្រឹក្សាភិបាល

អត្ថបទពាណិជ្ជកម្ម

សមាគមមីក្រូហិរញ្ញវត្ថុកម្ពុជា រៀបចំមហាសន្និបាតប្រចាំឆ្នាំលើកទី១៤ និងសម្ពោធគម្រោងបរិយាបន្នហិរញ្ញវត្ថុ ព្រមទាំង បោះឆ្នោតជ្រើសរើសក្រុមប្រឹក្សាភិបាល

03, Feb 2020 , 5:15 pm

រូបភាព

ដោយ: ថ្មីៗ

ភ្នំពេញ៖ កាលពីថ្ងៃទី៣១ ខែ មករា ឆ្នាំ ២០១៩ សមាគមមីក្រូហិរញ្ញវត្ថុកម្ពុជា (សមក) បានរៀបចំមហាសន្និបាតប្រចាំឆ្នាំលើកទី១៤ និងសម្ពោធគម្រោង បរិយាបន្នហិរញ្ញវត្ថុប្រកបដោយការទទួលខុសត្រូវ ក្នុងគោលដៅឆ្លើយតបការព្រួយបារម្ភនានា និងរួមចំណែកក្នុងកំណើនសេដ្ឋកិច្ច តាមរយៈការធ្វើឲ្យប្រជាជនកម្ពុជា មានលទ្ធភាពទទួលបានសេវាកម្មហិរញ្ញវត្ថុផ្លូវការ ប្រកបដោយការទទួលខុសត្រូវ។

គម្រោង៣ឆ្នាំនេះ ទទួលបានវិភាគទានពីសមាជិករបស់ សមក នឹងរួមចំណែកដល់យុទ្ធសាស្ត្រជាតិស្តីពី បរិយាបន្នហិរញ្ញវត្ថុឆ្នាំ២០១៩-២០២៥ របស់ធនាគារជាតិនៃកម្ពុជា។ សមាគមមីក្រូហិរញ្ញវត្ថុកម្ពុជា គឺជាស្ថាប័នតែមួយគត់ តំណាងឲ្យស្ថាប័នមីក្រូហិរញ្ញវត្ថុទាំងអស់ ដែលបានចុះបញ្ជីស្របច្បាប់ នឹងអនុវត្តនៅគម្រោងតម្លៃជិត១លានដុល្លារ ដោយសហការយ៉ាងជិតស្និទ្ធជាមួយសមាជិករបស់ខ្លួន ព្រមទាំងដៃគូសំខាន់ៗដូចជា ធនាគារជាតិនៃកម្ពុជា សមាគមធនាគារជាតិនៅកម្ពុជា ការិយាល័យឥណទានកម្ពុជា និងដៃគូអភិវឌ្ឍនានា។

គិតត្រឹមខែកញ្ញា ឆ្នាំ២០១៩ វិស័យមីក្រូហិរញ្ញវត្ថុកម្ពុជា បានផ្តល់ឥណទានចំនួនប្រហែល៧ពាន់លានដុល្លា ដល់អតិថិជនប្រហែល ២លាននាក់ ខណៈអ្នកសន្សំមានចំនួន ជិត៣លាននាក់ ដោយមានទឹកប្រាក់ ជិត៤ពាន់លាន នៅតាមការិយាល័យចំនួន ១,៤០០ ដែលមានបុគ្គលិកចំនួន ៣៤,០០០នាក់។

វិស័យហិរញ្ញវត្ថុមានការផ្លាស់ប្តូរគួរឲ្យកត់សម្គាល់ ក្នុងរយៈពេល១០ឆ្នាំចុងក្រោយនេះ។ ជាបឋមផលប័ត្រឥណទានបានកើនជាងមុន១៨ដង នៅពេលដែលចំនួនអតិថិជនកើនជាងមុខ២ដង។ ជាងនេះទៅទៀត វិស័យនេះ ប្រែប្រួលខ្លាំងពីវិស័យអង្គកាអភិវឌ្ឍន៍ ទៅជាស្ថាប័នហិរញ្ញវត្ថុដែលគ្រប់គ្រងដោយម្ចាស់ទុនឯកជន។ វិស័យនេះបានការផ្តោតខ្លាំងទៅលើ សហគ្រាសទុនតូច និងមធ្យម ទន្ទឹមនឹង ធនាគារមួយចំនួនតូចក៏បានហក់ចូលក្នុងផ្សារនេះដែរ។ ការដាក់ពិដានអត្រាការប្រាក់របស់រដ្ឋ នៅខែមេសា ឆ្នាំ២០១៧ បានធ្វើឲ្យចំនួនអតិថិជននៅតែថេរ តែទំហំឥណទានមធ្យមកាន់តែកើនឡើងគួរឲ្យកត់សម្គាល់ កំណើននេះជំរុញឲ្យមានការកោតសរសើរ ក៏ដូចជាក្តីបារម្ភថា អាចនឹងមានបញ្ហាប្រឈមដូចជាបំណុលវ័ណ្ឌក ដោយសារតែមានការប្រកួតប្រជែងខ្លាំងក្នុងវិស័យនេះ។

លោក គា បូរាណ ប្រធានក្រុមប្រឹក្សាភិបាល សមក បានមានប្រសាសន៍ថា៖ «គម្រោងបរិយាបន្នហិរញ្ញវត្ថុប្រកបដោយការទទួលខុសត្រូវ ឆ្លើយតបបន្ថែមទៀត ទៅនឹងការព្រួយបារម្ភនានា ព្រមទាំងចូលរួមចំណែក ក្នុងកំណើនសេដ្ឋកិច្ច ដែលធ្វើឲ្យប្រជាជនកម្ពុជាមានសិទ្ធិទទួលសេវាហិរញ្ញវត្ថុផ្លូវការបន្ថែម ក្នុងពេលដែលបាន និងកំពុងធ្វើការងារនេះ ជាមួយសមាជិករបស់ខ្លួនផងដែរ ចាប់តាំងពីឆ្នាំ២០១៧»។

គេរំពឹងថាគម្រោងនេះ នឹងជួយលើកម្ពស់បរិយាបន្នមីក្រូហិរញ្ញវត្ថុ ដោយប្រើប្រាស់ស្តង់អន្តរជាតិប្រកបដោយក្រមសីលធម៌ មានដូចជា គោលការណ៍ការពារអតិថិជន ឥណទានភ្ជាប់ជាមួយកិច្ចការសង្គម គោលការណ៍ផ្តល់ប្រាក់កម្ចី ព្រមទាំងយន្តការដោះស្រាយបណ្តឹងអតិថិជន។ លើកកម្ពស់វិស័យអប់រំហិរញ្ញវត្ថុ ដល់អតិថិជន និងសាធារណជន ដោយសហការជាមួយធនាគារជាតិនៃកម្ពុជា និងដៃគូផ្សេងៗ។ លើកកម្ពស់ដល់ការយល់ដឹង ពីតួនាទីមីក្រូហិរញ្ញវត្ថុ ក្នុងការកាត់បន្ថយភាពក្រីក្រ និងជួយកំណើនសេដ្ឋកិច្ចតាមទីជនបទ ក៏ដូចជា ស្រាវជ្រាវ និងអភិវឌ្ឍបន្ថែមវិស័យមីក្រូហិរញ្ញវត្ថុ។ សមាគមមីក្រូហិរញ្ញវត្ថុ គឺជាសមាគមវិជ្ជាជីវៈ ដែលជួយធ្វើឲ្យមានវិបុលភាព និងនិរន្តរភាពវិស័យមីក្រូហិរញ្ញវត្ថុនៅក្នុងប្រទេសកម្ពុជា ដោយជម្រុញឲ្យមានកំណើនសេដ្ឋកិច្ចព្រមទាំងការអភិវឌ្ឍ។ សមក មានសមាជិកចំនួន១០១ស្ថាប័ន សុទ្ធសឹងជាគ្រឹះស្ថានមីក្រូហិរញ្ញវត្ថុ គ្រឹះស្ថានឥណទានជនបទ ព្រមទាំងក្រុមហ៊ុនភតិសន្យា(បង់រំលស់)។ នេះបើតាមលោក គា បូរាណក្នុងមហាសន្និបាតប្រចាំឆ្នាំលើកទី ១៤ នៃសមាគមមីក្រូហិរញ្ញវត្ថុកម្ពុជា (CMA) ក៏មានរៀបចំការបោះឆ្នោតជ្រើសរើសក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា ជាលទ្ធផលនៃការបោះឆ្នោតជ្រើសរើស លោក គា បូរាណ ត្រូវបានជាប់ឆ្នោតជាប្រធានក្រុមប្រឹក្សាភិបាលសម្រាប់អាណត្តិ ឆ្នាំ២០២០-២០២១៕

(អត្ថបទពាណិជ្ជកម្ម)