ស្ទឹងត្រែង ថ្ងៃទី២៩ ខែមករា ឆ្នាំ២០២០៖ តំណាងមកពីក្រុមហ៊ុនព្រូដិនសលកម្ពុជា អង្គការភ្លែនអន្តរជាតិកម្ពុជា និងមូលនិធិសិទ្ធិកុមារ បានចូលរួមសហការជាមួយមន្ទីរអប់រំ យុវជន និងកីឡាខេត្តស្ទឹងត្រែង ក្នុងការលើកកម្ពស់សុវត្ថិភាព (ពីគ្រោះមហន្តរាយ) នៅតាមសាលារៀន និងកាត់បន្ថយផលប៉ះពាល់ ពីគ្រោះមហន្តរាយធម្មជាតិ តាមរយៈកម្មវិធីសាលារៀនសុវត្ថិភាព ។
ជាផ្នែកមួយ នៃកម្មវិធីក្នុងការលើកកម្ពស់គោលគំនិត និងការអនុវត្តសកម្មភាពដើម្បីសាលារៀនសុវត្ថិភាព ប្រជាពលរដ្ឋក្នុងខេត្តស្ទឹងត្រែងរាប់រយនាក់ បានចូលរួមក្នុងក្បួនដង្ហែ ដែលរៀបចំឡើងដោយមន្ទីរអប់រំ យុវជន និងកីឡា គ្រូបង្រៀន អង្គការដៃគូក្រៅរាជរដ្ឋាភិបាល និងសមាជិកក្រុមត្រួតពិនិត្យក្នុងមូលដ្ឋាន។
លោក វណ្ណដេត តារារដ្ឋ ប្រធានគ្រប់គ្រងជាន់ខ្ពស់ ផ្នែកផ្សព្វផ្សាយ ទំនាក់ទំនង និងអភិវឌ្ឍន៍សហគមន៍ នៃក្រុមហ៊ុនព្រូដិនសលកម្ពុជា បានមានប្រសាសន៍ថា កុមារ និងសិស្សានុសិស្សទាំងអស់ គួរតែមានសុវត្ថិភាពជានិច្ច ជាពិសេស ពេលពួកគេមកសាលារៀន។ លោកបន្តថា៖«យើងប្តេជ្ញា បន្តការគាំទ្រដល់សិស្សានុសិស្ស និងព្យាយាមធានាឱ្យបានថា ពួកគេអាចបន្តការសិក្សាបាន ទោះបីមានការរំខានដែលបណ្តាលមកពីគ្រោះមហន្តរាយធម្មជាតិក៏ដោយ។ យើងមានមោទកភាពណាស់ ដែលបានធ្វើការជាមួយ ក្រសួងអប់រំ យុវជន និងកីឡា អង្គការដៃគូ ដូចជា អង្គការភ្លែនអន្តរជាតិកម្ពុជា និងមូលនិធិសិទ្ធិកុមារ ដើម្បីលើកកម្ពស់ការយល់ដឹងអំពីសុវត្ថិភាពនៅតាមសហគមន៍ និងមូលដ្ឋាន ដោយផ្អែកលើក្របខណ្ឌសាលារៀនសុវត្ថិភាព»។
ក្នុងនាមជាក្រុមហ៊ុនធានារ៉ាប់រងអាយុជីវិតឈានមុខគេនៅកម្ពុជា ព្រូដិនសលកម្ពុជា រីករាយបន្តកិច្ចសហការរបស់ខ្លួន ជាមួយក្រសួងអប់រំ យុវជន និងកីឡា និងអង្គការដៃគូ ដើម្បីបង្កើតបរិយាកាសសិក្សា ប្រកបដោយសុវត្ថិភាពសម្រាប់សិស្សានុសិស្ស។ កម្មវិធីនេះ មានគោលបំណងឱ្យសាលារៀន ចេះកំណត់អត្តសញ្ញាណនៃគ្រោះមហន្តរាយតូច ឬធំ និងរៀបចំសម្រាប់សុវត្ថិភាពឱ្យបានសមស្រប។
លោក តារារដ្ឋ បានបន្ថែមទៀតថា៖ «យើងបានដាក់ឱ្យអនុវត្ត កម្មវិធីសាលារៀនសុវត្ថិភាពនេះដល់សាលារៀនចំនួន ១៥ សាលា ក្នុងឃុំចំនួន៥ តាមរយៈការបង្កើតកម្មវិធីសាលារៀនសុវត្ថិភាព«គំរូ» ស្របតាមក្របខណ្ឌកម្មវិធីសាលារៀនសុវត្ថិភាពរបស់អាស៊ាន។ កម្មវិធីគំនិតផ្តួចផ្តើមនេះ មានបំណងជួយអប់រំសិស្សានុសិស្សជាង ៣,០០០ នាក់»។
សាលារៀនសុវត្ថិភាព គឺជាកម្មវិធីបណ្តុះបណ្តាល អំពីការកាត់បន្ថយហានិភ័យនៃគ្រោះមហន្តរាយប្រចាំតំបន់អាស៊ី គាំទ្រដោយ មូលនិធិព្រូដិនស៍ ដែលជាដៃគូអភិវឌ្ឍន៍សហគមន៍របស់សាជីវកម្មព្រូដិនសលអាស៊ី និងអាហ្វ្រិក។ កម្មវិធីសាលារៀនសុវត្ថិភាព ដែលចាប់តាំងពីឆ្នាំ២០១៣មក ស្របទៅនឹងកម្មវិធីគ្រោះមហន្តរាយធម្មជាតិ របស់ មូលនិធិព្រូដិនស៍ ដើម្បីជួយសង្គ្រោះអាយុជីវិត និងធានាថាសាលារៀន និងសហគមន៍ត្រៀមខ្លួនបានល្អរួចជាស្រេច នៅពេលមានគ្រោះមហន្តរាយធម្មជាតិ។
លោក ជា ប៊ុនសាង ប្រធានការិយាល័យអប់រំ យុវជន និងកីឡា ស្រុកបុរីអូរស្វាយសែនជ័យ បានមានប្រសាសន៍ថា៖«កម្មវិធីរបស់យើង បានជួយដល់សិស្សានុសិស្ស និងឪពុកម្តាយបន្ថែមទៀត ដើម្បីឱ្យចេះត្រៀមទប់ទល់នឹងគ្រោះថ្នាក់ និងហានិភ័យ នៃគ្រោះមហន្តរាយធម្មជាតិ រួមមានទឹកជំនន់ អគ្គិភ័យ ឬសកម្មភាពខាងក្រៅ ដែលអាចបង្កគ្រោះថ្នាក់។ ឥឡូវនេះសិស្សានុសិស្សទទួលបានការយល់ដឹងកាន់តែច្បាស់ អំពីសុវត្ថិភាព»។
លោកស្រី ហម ចាន់ថន ជាពលរដ្ឋក្នុងស្រុកបុរីអូរស្វាយសែនជ័យ ដែលបានចូលរួមក្នុងកម្មវិធីនេះ បានលើកឡើងថា៖«កម្មវិធីនេះ ទទួលបានជោគជ័យក្នុងការលើកកម្ពស់ការយល់ដឹងអំពីហានិភ័យនៃគ្រោះមហន្តរាយធម្មជាតិ និងជួយសិស្សានុសិស្ស និងកុមារឱ្យចេះត្រៀមខ្លួនប្រឆាំងនឹងគ្រោះមហន្តរាយធម្មជាតិ។ ខ្ញុំចង់ឱ្យមានយុទ្ធនាការសុវត្តិភាព ក្នុងសាលារៀន និងសហគមន៍ផ្សេងៗទៀតដែរ»។
ចាប់តាំងពីបានផ្ដើមប្រតិបត្តិការរបស់ខ្លួន នៅប្រទេសកម្ពុជាក្នុងឆ្នាំ ២០១៣មក ក្រុមហ៊ុន ព្រូដិនសលកម្ពុជា បានខិតខំស្វែងរកកម្មវិធីផ្តួចផ្តើម និងឱកាសដើម្បីជួយកសាងសហគមន៍ ដែលមានភាពធន់ឱ្យច្រើនបន្ថែមទៀត នៅទូទាំងប្រទេសកម្ពុជា៕
![](https://image.thmeythmey.com/pictures/2020/02/05/thumb2/005.jpg)
![](https://image.thmeythmey.com/pictures/2020/02/05/thumb2/006.jpg)
![](https://image.thmeythmey.com/pictures/2020/02/05/thumb2/007.jpg)
![](https://image.thmeythmey.com/pictures/2020/02/05/thumb2/008.jpg)
![](https://image.thmeythmey.com/pictures/2020/02/05/thumb2/009.jpg)
(អត្ថបទពាណិជ្ជកម្ម)