ជាតិ
សង្គមជាតិ
ដី១២ហិចតាដែលកាន់កាប់ខុសច្បាប់នៅឧទ្យានជាតិគិរីរម្យ ត្រូវបានដកហូត 10, Jul 2020 , 7:59 am
![](https://image.thmeythmey.com/pictures/2020/07/09/thumb2/kps__2_.jpg)
×![]()
ដោយ៖ ខន ណារី
លោក វ៉ី សំណាង អភិបាលខេត្តកំពង់ស្ពឺបានចាត់វិធានការក្ដៅទៅលើជនខិលខូចដែលរំលោភបំពានដីយកធ្វើជាកម្មសិទ្ធិផ្ទាល់ខ្លួនចំនួន ១២ហិកតា នៅតំបន់ឧទ្យានជាតិព្រះសុរាម្រិតកុសមៈ «គិរីរម្យ» កាលពីថ្ងៃទី ៧ ខែកក្កដា ឆ្នាំ២០២០។
អភិបាលខេត្តកំពង់ស្ពឺបានប្រាប់ ThmeyThmey25 តាមទូរសព្ទថា លោកបានបញ្ជាឲ្យមន្ត្រីឧទ្យានុរក្សចុះចាត់វិធានការបន្ទាន់ នៅពេលដឹងដំណឹងថាមានអ្នកធ្វើរបង និងសាងសង់តូបរំលោភយកដីរដ្ឋ ធ្វើកម្មសិទ្ធិរបស់ខ្លួន។
![](https://image.thmeythmey.com/pictures/2020/07/09/thumb2/kps__1_.jpg)
លោកបន្ថែមថា៖«ពេលនេះមិនមែនជាលើកដំបូងនោះទេ មានច្រើនលើកមកហើយសម្រាប់សកម្មភាពរំលោភបំពានបែបនេះ ហើយពេលនេះរដ្ឋបាលខេត្ត កំពុងស្រាវជ្រាវរកមុខជនខិលខូច ដែលបានធ្វើសកម្មភាពទាំងនោះ ដើម្បីមកទទួលទោសតាមផ្លូវច្បាប់ និងអំពាវនាវដល់ប្រជាពលរដ្ឋ អ្នកពាក់ព័ន្ធទាំងអស់ចូលរួម រាយការណ៍ ថែរក្សា ការពារ កម្មសិទ្ធិសាធារណៈទាំងអស់»។
លោកបានសង្កត់ធ្ងន់ថា សកម្មភាពនេះជនខិលខូច បានលួចសាងសង់រោងទាំងយប់ ដោយមិនឲ្យអាជ្ញាធរដឹងនោះទេ ហើយសូមឲ្យជនខិលខូចទាំងនោះ បញ្ឈប់ចំពោះការរំលោភបំពានកម្មសិទ្ធិសាធារណៈ ធ្វើជារបស់ផ្ទាល់ខ្លួន ព្រោះវាមិនរួចពីផ្លូវច្បាប់នោះទេ។
![](https://image.thmeythmey.com/pictures/2020/07/09/thumb2/kps__3_.jpg)
សូមបញ្ជាក់ថាឧទ្យានជាតិព្រះសុរាម្រិតកុសមៈ «គិរីរម្យ» មានចម្ងាយប្រមាណ ១១២គីឡូម៉ែត្រ ពីរាជធានីភ្នំពេញ និងចម្ងាយប្រមាណ ៦៥ គីឡូម៉ែត្រ ពីទីរួមខេត្តកំពង់ស្ពឺ មានផ្ទៃដីប្រមាណ ៨ពាន់ហិកតា មានទីតាំងស្ថិតនៅភូមិដំរីផុត ឃុំគិរីរម្យ ស្រុកភ្នំស្រួច ខេត្តកំពង់ស្ពឺ ជាឧទ្យានជាតិដ៏ល្បីមួយ ក្នុងចំណោមឧទ្យានជាតិដទៃ ក្នុងប្រទេសកម្ពុជា ហើយត្រូវបានរដ្ឋាភិបាលកម្ពុជា សម្រេចចុះបញ្ជីរមណីយដ្ឋានគិរីរម្យជា «ឧទ្យានជាតិព្រះសុរាម្រិត» ដោយព្រះករុណា ព្រះបាទ សម្ដេច នរោត្ដម សីហនុ នៅថ្ងៃទី ១ ខែវិច្ឆិកា ឆ្នាំ១៩៩៣ និង
សម្ពោធដាក់ឲ្យប្រើប្រាស់ជាផ្លូវការ នៅថ្ងៃទី ០៥ ខែ មិថុនា ឆ្នាំ១៩៩៥ រហូតមកដល់បច្ចុប្បន្ន ៕
![](https://image.thmeythmey.com/pictures/2020/07/09/thumb2/kps__4_.jpg)
Tag:
ឧទ្យានជាតិគិរីរម្យ
កំពង់ស្ពឺ
© រក្សាសិទ្ធិដោយ thmeythmey.com