អន្តរជាតិ
យោធាតៃវ៉ាន់ពីរនាក់ស្លាប់ ក្រោយហេតុការណ៍ធ្លាក់ឧទ្ធម្ភាគចក្រដែលត្រលប់ពីធ្វើសមយុទ្ធ 17, Jul 2020 , 2:08 pm
![រូបភាព៖ AP](https://image.thmeythmey.com/pictures/2020/07/17/thumb2/______________________ap.jpg)
រូបភាព៖ AP
×![]()
ឧទ្ធម្ភាគចក្រយោធាមួយគ្រឿងរបស់តៃវ៉ាន់ នៅថ្ងៃទី១៦ ខែកក្កដា បានជួបឧបទ្ទវហេតុ ដែលបានបង្កឲ្យអ្នកបើកឧទ្ធម្ភាចក្រចំនួន ពីរនាក់ស្លាប់បាត់បង់ជីវិត។ ហេតុការណ៍នេះ កើតឡើងក្រោយឧទ្ធម្ភាគចក្រមួយគ្រឿងនេះបន្ទាប់ត្រលប់មកពីធ្វើសមយុទ្ធយោធា។
ឧទ្ធម្ភាគចក្រយោធាប្រភេទOH-58D ត្រូវបានយោធាតៃវ៉ាន់រាយការណ៍ថា បានធ្លាក់នៅមូលដ្ឋានយោធាមួយក្នុងក្រុង Hsinchu ។ ឧទ្ធម្ភាគចក្រនេះ បានធ្លាក់ក្នុងអំឡុងពេលចុះចតនៅមូលដ្ឋានយោធា និងបង្កឲ្យមានភ្លើងឆេះយ៉ាងខ្លាំង។ អ្នកបើកបរចំនួនពីរនាក់ ត្រូវគេបញ្ជូនទៅមន្ទីរពេទ្យភ្លាមៗ ប៉ុន្តែត្រូវបាត់បង់ជីវិត ដោយសារតែរងរបួសធ្ងន់។
តាមសេចក្តីថ្លែងការណ៍របស់ក្រសួងការពារជាតិតៃវ៉ាន់ ឧទ្ធម្ភាគចក្រប្រភេទ OH-58D ដែលជាប្រភេទឧទ្ធម្ភាគចក្រស៊ើបអង្កេត និងយកការណ៍ បានធ្លាក់នៅលើដី បន្ទាប់ពីត្រលប់មកពីសមយុទ្ធយោធាប្រចាំឆ្នាំ Han Kuang ចំណែកមូលហេតុដែលបណ្តាលឲ្យធ្លាក់នេះ គឺមិនទាន់រកឃើញនៅឡើយទេ។ ឧទ្ធម្ភាគចក្រនេះ បានធ្លាក់ នៅពេលកំពុងចុះចត នៅកម្ពស់ប្រមាណ៣០០ម៉ែត្រទៅ៤០០ម៉ែត្រ។ នេះបើតាមការចុះផ្សាយរបស់កាសែត South China Morning Post។
បន្ទាប់ពីហេតុការណ៍នេះ ក្រសួងការពារជាតិតៃវ៉ាន់ បានបង្កើតគណៈកម្មាធិការមួយ ដើម្បីស៊ើបអង្កេតពីការធ្លាក់មួយនេះ។
ឧទ្ធម្ភាគចក្រប្រភេទ OH-58D ត្រូវបានតៃវ៉ាន់ទិញពីក្រុមហ៊ុនរបស់អាមេរិក Bell Helicopter។ កាលពីខែឧសភាកន្លងមក ឧទ្ធម្ភាគចក្រប្រភេទដដែលនេះមួយគ្រឿងផ្សេងទៀតរបស់តៃវ៉ាន់ ក៏ធ្លាប់ជួបបញ្ហាពិបាក ក្នុងការចុះចតនៅមូលដ្ឋានយោធាក្នុងក្រុង Tainan ដែរ។ ពេលនោះ វាបង្កឲ្យអ្នកបើកបររបួសបន្តិចបន្តួចប៉ុណ្ណោះ។
សូមបញ្ជាក់ថា កាលពីខែមករា កន្លងទៅ តៃវ៉ាន់ក៏មានឧបទ្ទវហេតុធ្លាក់ឧទ្ធម្ភាគចក្រមួយដែរ នៅក្នុងតំបន់ New Taipei។ ហេតុការណ៍នោះ បានបណ្តាលឲ្យប្រមុខកងទ័ពតៃវ៉ាន់ និងយោធា ៧នាក់ផ្សេងទៀតបាត់បង់ជីវិតនៅក្នុងឧទ្ធម្ភាគចក្រ Black Hawk ៕
© រក្សាសិទ្ធិដោយ thmeythmey.com